Photo Credits: @ra_nagaravani (Instagram)
ಚಿತ್ರದುರ್ಗದ ರೇಣುಕಾಸ್ವಾಮಿ ಕೊಲೆ ಪ್ರಕರಣದಲ್ಲಿ ಇದೀಗ ಸರಣಿ ಕಾನೂನು ಬೆಳವಣಿಗೆಗಳು ನಡೆಯುತ್ತಿದ್ದು, ಭಾರಿ ಕುತೂಹಲ ಮೂಡಿಸಿವೆ. ಆರೋಪಿ ಪ್ರದೂಷ್ ತಟಸ್ಥ ಮಾಫಿ ಸಾಕ್ಷಿಯಾಗಲು ಸಲ್ಲಿಸಿರುವ ಅರ್ಜಿಯ ಮೇಲೆ 59ನೇ ಸಿಸಿಹೆಚ್ ನ್ಯಾಯಾಲಯ ಮಹತ್ವದ ಕ್ರಮ ಕೈಗೊಂಡಿದೆ. ಅರ್ಜಿ ವಿಚಾರಣೆ ನಡೆಸಿರುವ ನ್ಯಾಯಪೀಠವು ಪ್ರದೂಷ್‌ನ ಅಪರಾಧ ಹಿನ್ನೆಲೆ ಪರಿಶೀಲಿಸಲು ತನಿಖಾಧಿಕಾರಿಯಿಂದ ಅಧಿಕೃತ ವರದಿ ಕೇಳಿದೆ.
ಪ್ರದೂಷ್ ಹಿನ್ನೆಲೆ ವರದಿಗೆ ಸೂಚನೆ: ತನಿಖಾಧಿಕಾರಿಗೆ 59ನೇ ಸಿಸಿಹೆಚ್ ಕೋರ್ಟ್ ಆದೇಶ…
ಪ್ರದೂಷ್ ಮಾಫಿ ಸಾಕ್ಷಿಯಾಗುವ (ಅಪ್ರೂವರ್) ಅರ್ಜಿಯ ಸುದೀರ್ಘ ವಿಚಾರಣೆ ನಡೆಸಿದ ನ್ಯಾಯಾಲಯವು ಪ್ರಮುಖ ನಿರ್ಧಾರಕ್ಕೆ ಬಂದಿದೆ. ಪ್ರದೂಷ್‌ನ ಹಿಂದಿನ ಅಪರಾಧ ಕೃತ್ಯಗಳು ಹಾಗೂ ಹಿನ್ನೆಲೆಗೆ ಸಂಬಂಧಿಸಿದ ಸಂಪೂರ್ಣ ಮಾಹಿತಿಯನ್ನು ಸಲ್ಲಿಸಲು ತನಿಖಾಧಿಕಾರಿಗೆ ಸೂಚಿಸಿದೆ. ಅರ್ಜಿಯ ಕುರಿತು ಅಂತಿಮ ತೀರ್ಪು ಪ್ರಕಟಿಸುವ ಮುನ್ನ ಈ ಎಲ್ಲಾ ಅಂಶಗಳನ್ನು ಪರಿಶೀಲಿಸುವುದು ಅತ್ಯಗತ್ಯ ಎಂದು ಕೋರ್ಟ್ ತಿಳಿಸಿದೆ. ತನಿಖಾಧಿಕಾರಿ ನೀಡುವ ವರದಿ ಆಧಾರದ ಮೇಲೆಯೇ ಪ್ರದೂಷ್ ಮಾಫಿ ಸಾಕ್ಷಿ ಅರ್ಜಿಯ ಮುಂದಿನ ಕಾನೂನು ಭವಿಷ್ಯ ನಿರ್ಧಾರವಾಗಲಿದೆ.
ವಿನಯ್‌ನಿಂದಲೂ ಅಪ್ರೂವರ್ ಅರ್ಜಿ: ಒಂದೇ ಕೇಸ್‌ನಲ್ಲಿ ಇಬ್ಬರು ಆರೋಪಿಗಳಿಂದ ಮಾಫಿ ಸಾಕ್ಷಿ ಯತ್ನ…
ರೇಣುಕಾಸ್ವಾಮಿ ಕೊಲೆ ಪ್ರಕರಣದಲ್ಲಿ ಇದೀಗ ಮತ್ತೊಬ್ಬ ಆರೋಪಿ ವಿನಯ್ ಕೂಡ ಮಾಫಿ ಸಾಕ್ಷಿಯಾಗಲು ಮುಂದಾಗಿರುವುದು ದೊಡ್ಡ ಟ್ವಿಸ್ಟ್ ನೀಡಿದೆ. ವಿನಯ್ ಪರ ವಕೀಲರು ಅಪ್ರೂವರ್ ಅರ್ಜಿಗೆ ಸಂಬಂಧಿಸಿದಂತೆ ವಿಸ್ತೃತವಾದ ವಿವರ ಸಲ್ಲಿಸಲು ಕೋರ್ಟ್ ಬಳಿ ಹೆಚ್ಚಿನ ಸಮಯ ಕೋರಿದ್ದಾರೆ. ಒಂದೇ ಕೊಲೆ ಪ್ರಕರಣದಲ್ಲಿ ಇಬ್ಬರು ಪ್ರಮುಖ ಆರೋಪಿಗಳು ಮಾಫಿ ಸಾಕ್ಷಿಯಾಗಲು ಅರ್ಜಿ ಸಲ್ಲಿಸಿರುವುದು ಸಂಚಲನ ಮೂಡಿಸಿದೆ. ಕೋರ್ಟ್ ಕಾಯ್ದಿರಿಸಿರುವ ಆದೇಶ ಮತ್ತು ಮುಂದಿನ ವಿಚಾರಣೆಯ ಮೇಲೆ ದರ್ಶನ್ ಗ್ಯಾಂಗ್‌ನ ಭವಿಷ್ಯ ನಿಂತಿದೆ.
ಇಂದು ಕೋರ್ಟ್‌ನಿಂದ ಬಿಗ್ ಆರ್ಡರ್: ದರ್ಶನ್ ಪರ ವಕೀಲರಿಗೆ ಶುರುವಾಯ್ತು ತಲೆಬಿಸು…
ಪ್ರದೂಷ್ ಮತ್ತು ವಿನಯ್ ಸಲ್ಲಿಸಿರುವ ಈ ಅರ್ಜಿಗಳಿಗೆ ಸಂಬಂಧಿಸಿದಂತೆ ಇಂದು ನ್ಯಾಯಾಲಯದಿಂದ ಪ್ರಮುಖ ಆದೇಶ ಹೊರಬೀಳುವ ಸಾಧ್ಯತೆಯಿದೆ. ಅರ್ಜಿಗಳನ್ನು ಕೋರ್ಟ್ ಪುರಸ್ಕರಿಸಿದರೆ ಇಬ್ಬರೂ ಸರ್ಕಾರಿ ಸಾಕ್ಷಿಗಳಾಗಿ ಬದಲಾಗಿ ದರ್ಶನ್ ಪಡೆಗೆ ಭಾರಿ ಹಿನ್ನಡೆಯಾಗಲಿದೆ. ಒಂದು ವೇಳೆ ಹಿನ್ನೆಲೆ ವರದಿ ಸರಿ ಇಲ್ಲದಿದ್ದರೆ ಅಥವಾ ಅರ್ಜಿಯನ್ನು ತಳ್ಳಿಹಾಕಿದರೆ ಇಬ್ಬರೂ ಆರೋಪಿಗಳಾಗಿಯೇ ಜೈಲಿನಲ್ಲಿ ಇರಬೇಕಾಗುತ್ತದೆ. ಹೀಗಾಗಿ 59ನೇ ಸೆಷನ್ಸ್ ನ್ಯಾಯಾಲಯ ನೀಡುವ ಇಂದಿನ ತೀರ್ಪಿನತ್ತ ಇಡೀ ರಾಜ್ಯದ ಕಣ್ಣು ನೆಟ್ಟಿದೆ.
