ಭಾರತ ಜಗತ್ತಿನಲ್ಲಿ ಮಹಾಶಕ್ತಿಯಾಗಿ ಮೆರೆಯಲು ಬಯಸುವುದಿಲ್ಲ, ಬದಲಿಗೆ ಜಗತ್ತಿಗೆ ಮಾರ್ಗದರ್ಶನ ನೀಡುವ ವಿಶ್ವಗುರುವಾಗಿ ಗುರುತಿಸಿಕೊಂಡಿದೆ ಎಂದು ಆರ್ಎಸ್ಎಸ್ ಸರಸಂಘಚಾಲಕ ಮೋಹನ್ ಭಾಗವತ್ ಹೇಳಿದ್ದಾರೆ. ಕೆನಡಾದ ಟೊರೊಂಟೋದಲ್ಲಿ ನಡೆದ ಹಿಂದೂ ವಿಶ್ವ ಬಂಧು ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ವಿಶ್ವಬಂಧುತ್ವ, ನಿರಾಶ್ರಿತರಿಗೆ ಆಶ್ರಯ ಮತ್ತು ವೈವಿಧ್ಯತೆಯನ್ನು ಗೌರವಿಸುವುದು ಭಾರತೀಯ ಸಂಸ್ಕೃತಿಯ ಮೂಲ ಸ್ವಭಾವದಲ್ಲೇ ಇದೆ ಎಂದು ಪ್ರತಿಪಾದಿಸಿದರು.
ತಮ್ಮ ಮಾತಿನಲ್ಲಿ ಅವರು ಭಾರತದ ಮಾನವೀಯ ನಿಲುವಿನ ಹಲವು ಉದಾಹರಣೆಗಳನ್ನು ನೀಡಿದರು. ಎರಡನೇ ಮಹಾಯುದ್ಧದ ವೇಳೆ ಪೋಲೆಂಡ್ ನಿರಾಶ್ರಿತರಿಗೆ ಜಾಮ್ ನಗರದ ಮಹಾರಾಜರು ಆಶ್ರಯ ನೀಡಿದ್ದನ್ನು ಸ್ಮರಿಸಿದ ಅವರು, ಇತ್ತೀಚೆಗೆ ಮಧ್ಯಪ್ರಾಚ್ಯದಲ್ಲಿ ಸಂಘರ್ಷ ನಡೆದಾಗ ಭಾರತೀಯ ವಾಯುಪಡೆಯ ವಿಮಾನಗಳು ಭಾರತೀಯರನ್ನು ಮಾತ್ರವಲ್ಲದೆ ಇತರ ಏಳು ರಾಷ್ಟ್ರಗಳ ನಾಗರಿಕರನ್ನೂ ಸುರಕ್ಷಿತವಾಗಿ ಕರೆತಂದಿದ್ದನ್ನು ಉಲ್ಲೇಖಿಸಿದರು. ಮುಸ್ಲಿಮರು, ಕ್ರಿಶ್ಚಿಯನ್ನರು, ಯಹೂದಿಗಳು, ಪಾರ್ಸಿಗಳು ಸೇರಿದಂತೆ ಸಂಕಷ್ಟಕ್ಕೆ ಸಿಲುಕಿದ ಯಾವುದೇ ಸಮುದಾಯಕ್ಕೆ ಭಾರತ ಯಾವಾಗಲೂ ಅಭಯ ನೀಡಿದೆ ಎಂದು ಹೇಳಿದರು.
ಭಾರತೀಯ ಪೂರ್ವಜರು ಖಗೋಳ, ಆಯುರ್ವೇದ, ಮೌಲ್ಯಗಳನ್ನು ಹಂಚಲು ಜಗತ್ತಿನಾದ್ಯಂತ ಸಂಚರಿಸಿದರು ಹೊರತು ಯಾವ ದೇಶವನ್ನೂ ಆಕ್ರಮಿಸಲಿಲ್ಲ. ಅದೇ ಕಾರಣಕ್ಕೆ ಇಂದು ಸಾಮಾನ್ಯ ಭಾರತೀಯ ವಿದೇಶಕ್ಕೆ ಹೋದರೂ ಗೌರವ ಸಿಗುತ್ತದೆ ಎಂದು ಅವರು ವಿವರಿಸಿದರು. ಹಿಂದೂ ಎಂಬುದು ಪೂಜಾ ಪದ್ಧತಿಯಲ್ಲ, ಎಲ್ಲರನ್ನೂ ಒಪ್ಪಿಕೊಳ್ಳುವ ಜೀವನ ವಿಧಾನ, ವಸುಧೈವ ಕುಟುಂಬಕಂ ತತ್ವವೇ ಭಾರತೀಯರ ಕರ್ತವ್ಯ ಎಂದು ಅವರು ಹೇಳಿದರು.
ಈ ಹೇಳಿಕೆಯು ಕೇವಲ ಸಾಂಸ್ಕೃತಿಕ ಉಪನ್ಯಾಸವಾಗಿ ಕಾಣುವುದಿಲ್ಲ, ಇದರ ಹಿಂದೆ ರಾಜಕೀಯ ಮತ್ತು ಜಾಗತಿಕ ಸಂದೇಶವೂ ಇದೆ. ಭಾರತ ಮಹಾಶಕ್ತಿ ಆಗಬೇಕು ಎಂಬ ಚರ್ಚೆ ದೇಶದೊಳಗೆ ಜೋರಾಗಿರುವಾಗಲೇ ಭಾಗವತ್ ಅವರು ಮಹಾಶಕ್ತಿ ಪದವನ್ನು ನಿರಾಕರಿಸಿ ವಿಶ್ವಗುರು ಪದಕ್ಕೆ ಒತ್ತು ನೀಡಿರುವುದು ಗಮನಾರ್ಹ. ಮಹಾಶಕ್ತಿ ಎಂದರೆ ಸಾಮಾನ್ಯವಾಗಿ ಮಿಲಿಟರಿ ಮತ್ತು ಆರ್ಥಿಕ ದಬ್ಬಾಳಿಕೆ ಎಂಬ ಅರ್ಥ ಬರುತ್ತದೆ, ಆದರೆ ವಿಶ್ವಗುರು ಎಂದರೆ ನೈತಿಕ ಮತ್ತು ಜ್ಞಾನದ ನಾಯಕತ್ವ ಎಂಬ ವ್ಯಾಖ್ಯಾನವನ್ನು ಅವರು ಮುಂದಿಟ್ಟಿದ್ದಾರೆ.
ವಿದೇಶದ ನೆಲದಲ್ಲಿ, ಅದರಲ್ಲೂ ಕೆನಡಾದಂತಹ ದೇಶದಲ್ಲಿ ಈ ಮಾತು ಹೇಳಿರುವುದು ಕೂಡ ಮುಖ್ಯವಾಗುತ್ತದೆ. ಇತ್ತೀಚಿನ ವರ್ಷಗಳಲ್ಲಿ ಭಾರತ-ಕೆನಡಾ ಸಂಬಂಧದಲ್ಲಿ ಬಿರುಕು ಮೂಡಿದ್ದ ಹಿನ್ನೆಲೆಯಲ್ಲಿ ಭಾರತದ ಸರ್ವಸಮಾವೇಶಿ ಚಿತ್ರಣವನ್ನು ಅವರು ಅನಿವಾಸಿ ಭಾರತೀಯರ ಮುಂದೆ ಬಿಂಬಿಸಲು ಯತ್ನಿಸಿದ್ದಾರೆ. ಇದು ಆರ್ಎಸ್ಎಸ್ ನ ಸಾಫ್ಟ್ ಪವರ್ ಪ್ರತಿಪಾದನೆಯ ಮುಂದುವರಿಕೆಯಾಗಿದೆ.
