Photo Credits: @ColorsKannada (Youtube)
ಬಿಗ್ ಬಾಸ್ ಕನ್ನಡ ಸೀಸನ್-13 ಆರಂಭಕ್ಕೆ ಕ್ಷಣಗಣನೆ ಶುರುವಾಗಿದೆ. ಸೆಪ್ಟೆಂಬರ್ 6 ರಿಂದ ಈ ಶೋ ಅದ್ಧೂರಿಯಾಗಿ ಚಾಲನೆ ಪಡೆಯಲಿದೆ.
ಈ ಹಿನ್ನೆಲೆಯಲ್ಲಿ ಬೆಂಗಳೂರಿನಲ್ಲಿ ವಿಶೇಷ ಪತ್ರಿಕಾಗೋಷ್ಠಿ ಆಯೋಜಿಸಲಾಗಿತ್ತು. ಸುದ್ದಿಗೋಷ್ಠಿಯಲ್ಲಿ ಕಿಚ್ಚ ಸುದೀಪ್ ಹಾಗೂ ಬಿಗ್ ಬಾಸ್ ನಿರ್ದೇಶಕ ಪ್ರಕಾಶ್ ಹಲವು ಪ್ರಶ್ನೆಗಳಿಗೆ ಉತ್ತರಿಸಿದ್ದಾರೆ.
ಅದರಲ್ಲಿಯೂ ಬಿಗ್ ಬಾಸ್ ವಿನ್ನರ್ ಬಹುಮಾನ ಮೊತ್ತ 50 ಲಕ್ಷ ಮಾತ್ರ ಯಾಕೆ ಇರುತ್ತದೆ ಎಂಬ ಆಸಕ್ತಿಕರ ಪ್ರಶ್ನೆಗೆ ಸುದೀಪ್ ಸ್ಪಷ್ಟನೆ ನೀಡಿದ್ದಾರೆ.
ವಿನ್ನರ್‌ಗೆ 50 ಲಕ್ಷ ಮಾತ್ರ ಯಾಕೆ? ಕಿಚ್ಚ ಸುದೀಪ್ ಸ್ಪಷ್ಟನೆ
ಕನ್ನಡ ಬಿಗ್ ಬಾಸ್ ವಿನ್ನರ್‌ಗೆ ಕಳೆದ ಹಲವು ಸೀಸನ್‌ಗಳಿಂದಲೂ 50 ಲಕ್ಷ ರೂಪಾಯಿ ಬಹುಮಾನ ಮೊತ್ತ ನೀಡಲಾಗುತ್ತಿದೆ. ಈ ಮೊತ್ತದಲ್ಲಿ ಬದಲಾವಣೆ ಇಲ್ಲವೇ ಎಂದು ಪತ್ರಕರ್ತರು ನೇರವಾಗಿ ಪ್ರಶ್ನಿಸಿದ್ದಾರೆ.
ಇದಕ್ಕೆ ಉತ್ತರಿಸಿದ ಸುದೀಪ್, “ಈ ಮೊತ್ತ ಬದಲಾಗುವುದಿಲ್ಲ. ಇದು ಬಿಗ್ ಬಾಸ್‌ನ ನಿಗದಿತ ಫಾರ್ಮ್ಯಾಟ್ ಆಗಿದ್ದು, ಇದನ್ನು ಬದಲಾಯಿಸಲು ಸಾಧ್ಯವಿಲ್ಲ” ಎಂದಿದ್ದಾರೆ.
ಮೊದಲ ಸೀಸನ್‌ನಿಂದಲೂ ವಿನ್ನರ್‌ಗೆ ಗಿಫ್ಟ್ ರೂಪದಲ್ಲಿ ಕಾರು ಹಾಗೂ ಮನೆಗಳನ್ನು ನೀಡುತ್ತಾ ಬರಲಾಗಿದೆ, ಆದರೆ ಮೂಲ ನಗದು ಬಹುಮಾನ 50 ಲಕ್ಷವೇ ಇರಲಿದೆ ಎಂದು ಸುದೀಪ್ ಹೇಳಿದ್ದಾರೆ.
ಬಹುಮಾನ ಮೊತ್ತ ಬದಲಾಗದಿರಲು ನೈಜ ಕಾರಣವೇನು?
ಬಹುಮಾನ ಮೊತ್ತ ಬದಲಾಗದಿರುವ ಹಿಂದಿರುವ ತಾರ್ಕಿಕ ಕಾರಣವನ್ನು ಕಿಚ್ಚ ಸುದೀಪ್ ಸುದ್ದಿಗೋಷ್ಠಿಯಲ್ಲಿ ಸವಿಸ್ತಾರವಾಗಿ ವಿವರಿಸಿದ್ದಾರೆ.
ಬಿಗ್ ಬಾಸ್ ಶೋ ಪ್ರಾದೇಶಿಕವಾಗಿ ಹಲವು ಭಾಷೆಗಳಲ್ಲಿ ಯಶಸ್ವಿಯಾಗಿ ನಡೆಯುತ್ತಿದೆ. ಒಂದು ವೇಳೆ ಬಹುಮಾನ ಮೊತ್ತ ಹೆಚ್ಚಿಸಿದರೆ ಭಾಷೆಗಳ ನಡುವೆ ಅನಗತ್ಯ ಸ್ಪರ್ಧೆ ಏರ್ಪಡುತ್ತದೆ.
ಆ ಭಾಷೆಯಲ್ಲಿ ಇಷ್ಟು ಕೊಟ್ಟಿದ್ದಾರೆ, ನಾವೂ ಇಷ್ಟೇ ಕೊಡಬೇಕು ಎಂಬ ಕಾಂಪಿಟೇಷನ್ ತಡೆಯಲು ಎಲ್ಲ ಭಾಷೆಯ ಶೋಗಳಿಗೂ ಒಂದೇ ರೀತಿಯ ಫಾರ್ಮ್ಯಾಟ್ ರೂಪಿಸಲಾಗಿದೆ ಎಂದು ಅವರು ತಿಳಿಸಿದ್ದಾರೆ.
ಸುದೀಪ್ ಮೆಚ್ಚಿದ ಸೀಸನ್ ಹಾಗೂ ಕಹಿ ಅನುಭವದ ದಿನಗಳು
ಬಿಗ್ ಬಾಸ್ ಸೀಸನ್‌ಗಳ ಪೈಕಿ ಸುದೀಪ್ ಅವರಿಗೆ ಮೊದಲ ಸೀಸನ್ ಅತ್ಯಂತ ಪ್ರಿಯವಾದದ್ದು. ‘ಹುಚ್ಚ’ ಸಿನಿಮಾ ತಂದುಕೊಟ್ಟ ಖುಷಿಯನ್ನು ಈ ಸೀಸನ್ ನೀಡಿದೆ ಎಂದಿದ್ದಾರೆ.
ಸೀಸನ್-6 ತಮಗೆ ಅತ್ಯಂತ ಕೆಟ್ಟ ಅನುಭವ ನೀಡಿ ಸಾಕಪ್ಪ ಸಾಕು ಎನಿಸಿತ್ತು ಎಂದು ಸುದೀಪ್ ಮುಕ್ತವಾಗಿ ಹಂಚಿಕೊಂಡಿದ್ದಾರೆ. ಆದರೆ ಶೈನ್ ಶೆಟ್ಟಿ ಮತ್ತು ವಾಸುಕಿ ವೈಭವ್ ಇದ್ದ ಸೀಸನ್-7 ತಮ್ಮ ನೆಚ್ಚಿನ ಹಾಗೂ ಅತ್ಯುತ್ತಮ ಸೀಸನ್ ಎಂದು ಸುದೀಪ್ ನೆನಪಿಸಿಕೊಂಡಿದ್ದಾರೆ.
