☔ Weather
Bengaluru: ☀️ 24°C | AQI 113
Mysore: ☀️ 22°C | AQI 110
Mangalore: ☀️ 27°C | AQI 172
Bengaluru: ☀️ 24°C | AQI 113
☔ Weather
Bengaluru: ☀️ 24°C | AQI 113
Mysore: ☀️ 22°C | AQI 110
Mangalore: ☀️ 27°C | AQI 172
Bengaluru: ☀️ 24°C | AQI 113

HIGHCOURT : ಉಚಿತ ಭಾಗ್ಯದ ಹೆಸರಲ್ಲಿ ದುಬಾರಿಯಾದ ಬದುಕು: ಬೆಲೆ ಏರಿಕೆಗೆ ಕೋರ್ಟ್ ತರಾಟೆ

Image of Karnataka Highcourt
ದರ ಹೆಚ್ಚಳಕ್ಕೆ ಹೈಕೋರ್ಟ್ (Highcourt) ಕೆಂಡಾಮಂಡಲವಾಗಿದೆ. ದಿನಬಳಕೆಯ ವಸ್ತುಗಳ ಬೆಲೆ ಗಗನಕ್ಕೇರಿರುವ ಬಗ್ಗೆ ಹೈಕೋರ್ಟ್ ತೀವ್ರ ಅಸಮಾಧಾನ

ಮುಖ್ಯಾಂಶಗಳು

  • ರಾಜ್ಯ ಸರ್ಕಾರಕ್ಕೆ ಹೈಕೋರ್ಟ್ ತರಾಟೆ
  • ಬೆಲೆ ಏರಿಕೆ ವಿರುದ್ಧ ಗರಂ

ಬೆಂಗಳೂರು: ಅಗತ್ಯ ವಸ್ತುಗಳ ದರ ಹೆಚ್ಚಳಕ್ಕೆ ಹೈಕೋರ್ಟ್ (Highcourt) ಕೆಂಡಾಮಂಡಲವಾಗಿದೆ. ರಾಜ್ಯದಲ್ಲಿ ದಿನಬಳಕೆಯ ವಸ್ತುಗಳ ಬೆಲೆ ಗಗನಕ್ಕೇರಿರುವ ಬಗ್ಗೆ ಕರ್ನಾಟಕ ಹೈಕೋರ್ಟ್ ರಾಜ್ಯ ಸರ್ಕಾರದ ವಿರುದ್ಧ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದೆ. ಸರ್ಕಾರದ ಯೋಜನೆಗಳು ಉಚಿತವಾದರೆ ಅಗತ್ಯ ಸಾಮಗ್ರಿಗಳ ದರ ಏರಿಕೆಯಾಗುವುದು ಖಚಿತ ಎಂಬಂತಾಗಿದೆ ಎಂದು ಚಾಟಿ ಬೀಸಿರುವ ನ್ಯಾಯಪೀಠ, ಹೀಗೆ ಎಲ್ಲ ವಸ್ತುಗಳ ಬೆಲೆ ಹೆಚ್ಚುತ್ತಾ ಹೋದರೆ ಸಾಮಾನ್ಯ ಜನರು ಬದುಕು ಸಾಗಿಸುವುದಾದರೂ ಹೇಗೆ ಎಂದು ಕಳವಳ ವ್ಯಕ್ತಪಡಿಸಿದೆ. ಒಂದು ಪ್ರಕರಣದ ವಿಚಾರಣೆ ವೇಳೆ ನ್ಯಾಯಮೂರ್ತಿ ವಿ. ಶ್ರೀಶಾನಂದ ಅವರಿದ್ದ ನ್ಯಾಯಪೀಠವು ಬೆಲೆ ಏರಿಕೆಯ ಬಿಸಿ ಜನಸಾಮಾನ್ಯರಿಗೆ ತಟ್ಟುತ್ತಿರುವ ಬಗೆಯನ್ನು ನಿದರ್ಶನ ಸಹಿತ ಉಲ್ಲೇಖಿಸಿತು. ಕಳೆದ ತಿಂಗಳು 650 ರೂಪಾಯಿ ಇದ್ದ ಒಂದು ಕೆಜಿ ತುಪ್ಪದ ಪ್ಯಾಕೆಟ್ ಬೆಲೆ ಈಗ 850 ರೂಪಾಯಿಗೆ ಏರಿಕೆಯಾಗಿದೆ. ದೀಪಾವಳಿ ಹಬ್ಬಕ್ಕೆ ತುಪ್ಪದ ಯಮದೀಪ ಹಚ್ಚಲು ಹೊರಟರೆ ಇಷ್ಟೊಂದು ದುಬಾರಿ ದರ ನೀಡಬೇಕಿದೆ. ಹೀಗಿರುವಾಗ ತುಪ್ಪದ ಯಮದೀಪ ಹಚ್ಚುವ ಬದಲು ನೇರವಾಗಿ ಯಮನನ್ನೇ ಕರೆದುಕೊಂಡು ಹೋಗು ಎಂದು ಕೇಳುವಂತಾಗಿದೆ ಎಂದು ನ್ಯಾಯಮೂರ್ತಿಗಳು ವ್ಯಂಗ್ಯವಾಡಿದರು.

ಅಕ್ಕಿ, ಹಾಲು, ಬಸ್ ಟಿಕೆಟ್ ಎಲ್ಲವೂ ದುಬಾರಿ..!

ರಾಜ್ಯದಲ್ಲಿ ಅಕ್ಕಿ ದರ ಕೆಜಿಗೆ 103 ರೂಪಾಯಿ ತಲುಪಿದ್ದು, ಹಾಲಿನ ದರ ಹಾಗೂ ಬಸ್ ಟಿಕೆಟ್ ದರಗಳನ್ನೂ ಹೆಚ್ಚಿಸಲಾಗಿದೆ ಎಂದು ನ್ಯಾಯಪೀಠ ಪ್ರಸ್ತಾಪಿಸಿತು. ಸರ್ಕಾರ ಸಕ್ಕರೆ ಕಬ್ಬಿಗೆ ಪ್ರತಿ ಟನ್‌ಗೆ 3,000 ರೂಪಾಯಿಗೂ ಅಧಿಕ ಬೆಂಬಲ ಬೆಲೆ ಘೋಷಿಸಿದೆ. ದೀಪಾವಳಿ ಹಬ್ಬ ಮುಗಿದ ತಕ್ಷಣ ಸಕ್ಕರೆ ದರ ಪ್ರತಿ ಕೆಜಿಗೆ 90 ರೂಪಾಯಿ ಆದರೂ ಅಚ್ಚರಿಯಿಲ್ಲ. ಸರ್ಕಾರ ನೀಡುವ ಹಣವೇನೂ ತನ್ನ ಜೇಬಿನಿಂದ ಬರುವುದಿಲ್ಲ, ಬದಲಾಗಿ ಜನಸಾಮಾನ್ಯರು ಪಾವತಿಸುವ ತೆರಿಗೆ ಹಣದಿಂದಲೇ ನೀಡಲಾಗುತ್ತದೆ. ಒಂದು ಕಡೆ ಜನರಿಗೆ ಉಚಿತ ಎಂದು ನೀಡುತ್ತಾ, ಮತ್ತೊಂದೆಡೆ ಅಗತ್ಯ ವಸ್ತುಗಳ ಬೆಲೆ ಹೆಚ್ಚಿಸುತ್ತಿರುವುದು ಎಷ್ಟರಮಟ್ಟಿಗೆ ಸರಿ ಎಂದು ನ್ಯಾಯಪೀಠ ಕಿಡಿಕಾರಿತು. ಮೈಸೂರಿನ ಗೋದಾಮಿನಲ್ಲಿ ಅನ್ನಭಾಗ್ಯ ಯೋಜನೆಯಡಿ ದಾಸ್ತಾನು ಮಾಡಲಾಗಿದ್ದ ಆಹಾರ ಧಾನ್ಯಗಳಲ್ಲಿ 320 ಕ್ವಿಂಟಾಲ್ ಅಕ್ಕಿ ಮತ್ತು 85 ಕ್ವಿಂಟಾಲ್ ಗೋಧಿ ಕೊರತೆ ಕಂಡುಬಂದಿತ್ತು. ಈ ಸಂಬಂಧ ಕರ್ನಾಟಕ ಅಗತ್ಯ ವಸ್ತುಗಳ ನಿಯಂತ್ರಣ ಆದೇಶ-1992 ನಿಯಮಗಳ ಅಡಿಯಲ್ಲಿ ದಾಖಲಾಗಿರುವ ಕ್ರಿಮಿನಲ್ ಪ್ರಕರಣ ರದ್ದುಪಡಿಸುವಂತೆ ಕೋರಿ ಗೋದಾಮಿನ ಹಿರಿಯ ವ್ಯವಸ್ಥಾಪಕರು ಹೈಕೋರ್ಟ್‌ಗೆ ಅರ್ಜಿ ಸಲ್ಲಿಸಿದ್ದರು. ಈ ಅರ್ಜಿಯ ವಿಚಾರಣೆ ವೇಳೆ ನ್ಯಾಯಪೀಠ, ಅಗತ್ಯ ವಸ್ತುಗಳ ಬೆಲೆ ಹೆಚ್ಚಾದ ತಕ್ಷಣ ಹಳೆಯ ದಾಸ್ತಾನಿನ ಮೇಲೆ ಹೊಸ ದರ ಮುದ್ರಿಸಿ ಮಾರಾಟ ಮಾಡುವ ಪ್ರವೃತ್ತಿ ನಡೆಯುತ್ತಿದೆ ಎಂದು ಆಕ್ಷೇಪಿಸಿತು. ಬಡವರಿಗೆ ಉಚಿತವಾಗಿ ವಿತರಿಸಬೇಕಾದ ಆಹಾರ ಧಾನ್ಯಗಳನ್ನು ಕ್ವಿಂಟಾಲ್ ಗಟ್ಟಲೆ ಕದ್ದು ಕಾಳಸಂತೆಯಲ್ಲಿ ಮಾರಾಟ ಮಾಡುವ ಅಕ್ರಮವನ್ನು ಎಂದಿಗೂ ಸಹಿಸಲು ಸಾಧ್ಯವಿಲ್ಲ ಎಂದು ಎಚ್ಚರಿಸಿದ ನ್ಯಾಯಪೀಠ, ಅರ್ಜಿಯ ವಿಚಾರಣೆಯನ್ನು ನವೆಂಬರ್ 11ಕ್ಕೆ ಮುಂದೂಡಿದೆ.

ಇದನ್ನೂ ಓದಿ : ಬೆಂಗಳೂರಿನಲ್ಲಿ ನಿಲ್ಲದ ಪೋಸ್ಟರ್ ಪಾಲಿಟಿಕ್ಸ್ – ಬಿಜೆಪಿ ನಾಯಕರ ಮನೆ ಎದುರೇ ಬಿತ್ತಿಪತ್ರ ಪ್ರತ್ಯಕ್ಷ

ಈ ಪ್ರಕರಣ ಕೇವಲ ಒಂದು ಗೋದಾಮಿನ ಅಕ್ರಮದ ಪ್ರಶ್ನೆಯಲ್ಲ, ಉಚಿತ ಯೋಜನೆಗಳು ಮತ್ತು ಬೆಲೆ ಏರಿಕೆಯ ನಡುವಿನ ಸಂಬಂಧದ ಬಗ್ಗೆ ನ್ಯಾಯಾಲಯ ಎತ್ತಿರುವ ದೊಡ್ಡ ಪ್ರಶ್ನೆಯಾಗಿದೆ. ಸರ್ಕಾರ ಉಚಿತವಾಗಿ ನೀಡುತ್ತೇನೆ ಎನ್ನುವ ಪ್ರತಿ ರೂಪಾಯಿಯೂ ಅಂತಿಮವಾಗಿ ಜನರ ತೆರಿಗೆ ಹಣವೇ ಆಗಿರುವುದರಿಂದ, ಒಂದು ಕೈಯಲ್ಲಿ ಕೊಟ್ಟು ಮತ್ತೊಂದು ಕೈಯಲ್ಲಿ ಬೆಲೆ ಏರಿಕೆಯ ಮೂಲಕ ವಸೂಲಿ ಮಾಡುವಂತಾದರೆ ಆ ಯೋಜನೆಯ ಉದ್ದೇಶವೇ ಕುಂಠಿತವಾಗುತ್ತದೆ. ಅದರಲ್ಲೂ ಅನ್ನಭಾಗ್ಯದಂತಹ ಬಡವರ ಹೊಟ್ಟೆಯ ಪ್ರಶ್ನೆಗೆ ಸಂಬಂಧಿಸಿದ ಯೋಜನೆಯಲ್ಲಿ ಧಾನ್ಯ ನಾಪತ್ತೆಯಾಗುವುದು ಗಂಭೀರ ಎಚ್ಚರಿಕೆಯಾಗಿದೆ. ಬೆಲೆ ಏರಿಕೆಯಾದ ಕೂಡಲೇ ಹಳೆಯ ಸ್ಟಾಕ್ ಮೇಲೆ ಹೊಸ ದರ ಹಾಕುವ ಅಭ್ಯಾಸಕ್ಕೆ ಕಡಿವಾಣ ಹಾಕದಿದ್ದರೆ, ಹಬ್ಬದ ಸಮಯದಲ್ಲಿ ಸಾಮಾನ್ಯ ಕುಟುಂಬಗಳ ಬಜೆಟ್ ಸಂಪೂರ್ಣ ಹಳಿ ತಪ್ಪುತ್ತದೆ. ಆದ್ದರಿಂದ ನ್ಯಾಯಾಲಯದ ಈ ಕಿಡಿ ಸರ್ಕಾರಕ್ಕೆ ಕೇವಲ ಟೀಕೆಯಾಗಿ ಉಳಿಯದೆ, ಬೆಲೆ ನಿಯಂತ್ರಣ, ಪಡಿತರ ವ್ಯವಸ್ಥೆಯಲ್ಲಿ ಪಾರದರ್ಶಕತೆ ಮತ್ತು ಕಾಳಸಂತೆ ತಡೆಗೆ ಕಠಿಣ ಕ್ರಮಕ್ಕೆ ದಾರಿಯಾಗಬೇಕಿದೆ.