ನಿತೇಶ್ ತಿವಾರಿ ನಿರ್ದೇಶನದ ಹಾಗೂ ರಣಬೀರ್ ಕಪೂರ್ ಅಭಿನಯದ ‘ರಾಮಾಯಣ’ ಸಿನಿಮಾ ಬಾಕ್ಸ್ ಆಫೀಸ್ನಲ್ಲಿ (Ramayana Box Office Collection) ಸೃಷ್ಟಿಸಿರುವ ಸುನಾಮಿ ಮುಂದುವರಿದಿದೆ. ಪ್ರದರ್ಶನಗೊಂಡ ಕೇವಲ ನಾಲ್ಕೇ ದಿನಗಳಲ್ಲಿ ಈ ಬ್ರಹ್ಮಾಂಡ ಚಿತ್ರವು ಜಾಗತಿಕವಾಗಿ ಭಾರಿ ಗಳಿಕೆ ಮಾಡಿದೆ.
ಚಿತ್ರವು ಬಿಡುಗಡೆಯಾದ ಮೊದಲ ದಿನದಿಂದಲೇ ಪ್ರೇಕ್ಷಕರಿಂದ ಅಭೂತಪೂರ್ವ ಬೆಂಬಲ ಪಡೆದುಕೊಂಡಿದೆ. ಭಾನುವಾರದ ರಜಾದಿನದಂದು ದೇಶ-ವಿದೇಶಗಳಲ್ಲಿ ಭರ್ಜರಿ ಕಲೆಕ್ಷನ್ ಮಾಡುವ ಮೂಲಕ ಬಾಕ್ಸ್ ಆಫೀಸ್ನಲ್ಲಿ ತನ್ನ ಅಧಿಪತ್ಯವನ್ನು ಸಂಪೂರ್ಣವಾಗಿ ಸ್ಥಾಪಿಸಿದೆ.
ನಾಲ್ಕನೇ ದಿನಕ್ಕೆ ಭಾರತದಲ್ಲೇ ₹238.85 ಕೋಟಿ ನಿವ್ವಳ ಗಳಿಕೆ ಕಂಡಿದ್ದು, ವಿಶ್ವಾದ್ಯಂತ ಒಟ್ಟು ₹499.20 ಕೋಟಿ ಗ್ರೋಸ್ ಸಂಗ್ರಹಿಸಿ 500 ಕೋಟಿ ರೂಪಾಯಿ ಕ್ಲಬ್ನ ಹೊಸ್ತಿಲಲ್ಲಿ ಬಂದು ನಿಂತಿದೆ.
ಭಾನುವಾರ ಭರ್ಜರಿ ಕಲೆಕ್ಷನ್; ಕನ್ನಡದಲ್ಲೂ ಧಮಾಕಾ
ನಾಲ್ಕನೇ ದಿನವಾದ ಭಾನುವಾರ (ನವೆಂಬರ್ 8) ‘ರಾಮಾಯಣ’ ಚಿತ್ರವು ಭಾರತದಾದ್ಯಂತ ಒಟ್ಟು 21,770 ಪ್ರದರ್ಶನಗಳಿಂದ 56.15 ಕೋಟಿ ರೂಪಾಯಿ ನೆಟ್ ಕಲೆಕ್ಷನ್ ಮಾಡಿದೆ.
ಹಿಂದಿ ಆವೃತ್ತಿಯು 36.75 ಕೋಟಿ ಗಳಿಸಿದರೆ, ಕನ್ನಡ ಆವೃತ್ತಿಯಿಂದ 910 ಪ್ರದರ್ಶನಗಳಲ್ಲಿ ಬರೋಬ್ಬರಿ 7.25 ಕೋಟಿ ರೂಪಾಯಿ ಕಲೆಕ್ಷನ್ ಆಗಿದೆ. ತೆಲುಗಿನಲ್ಲಿ 6.25 ಕೋಟಿ, ತಮಿಳಿನಲ್ಲಿ 3.15 ಕೋಟಿ ಹಾಗೂ ಮಲಯಾಳಂನಲ್ಲಿ 2.75 ಕೋಟಿ ರೂಪಾಯಿ ಸಂಗ್ರಹವಾಗಿದೆ.
ಇದನ್ನು ಓದಿ: Ramayana Box Office: ಯಶ್ ರಾವಣನ ಪಾತ್ರಕ್ಕೆ ಕನ್ನಡಿಗರು ಫಿದಾ; ಕರ್ನಾಟಕದಲ್ಲೆಷ್ಟು ಕೋಟಿ ಗಳಿಸಿತು ‘ರಾಮಾಯಣ’?
ಭಾನುವಾರ ಭಾರತದಾದ್ಯಂತ ಚಿತ್ರಮಂದಿರಗಳಲ್ಲಿ ಶೇಕಡಾ 38.0 ರಷ್ಟು ಭರ್ತಿ ಪ್ರಮಾಣ (ಆಕ್ಯುಪೆನ್ಸಿ) ದಾಖಲಾಗಿದ್ದು, ಪ್ರೇಕ್ಷಕರು ಥಿಯೇಟರ್ಗಳತ್ತ ಹರಿದುಬರುತ್ತಿದ್ದಾರೆ.
Ramayana Box Office Collection: ಭಾರತದಲ್ಲಿ 238 ಕೋಟಿ; ವಿಶ್ವಾದ್ಯಂತ 500 ಕೋಟಿಯತ್ತ ಜಿಗಿತ
ಭಾರತೀಯ ಬಾಕ್ಸ್ ಆಫೀಸ್ನಲ್ಲಿ ಮೊದಲ ದಿನ 64.85 ಕೋಟಿ ನೆಟ್, ಎರಡನೇ ದಿನ 48.05 ಕೋಟಿ ನೆಟ್, ಮೂರನೇ ದಿನ 69.80 ಕೋಟಿ ನೆಟ್ ಗಳಿಸಿತ್ತು.
ನಾಲ್ಕನೇ ದಿನದ 56.15 ಕೋಟಿ ನೆಟ್ ಸೇರಿ ನಾಲ್ಕು ದಿನಗಳ ಅಂತ್ಯಕ್ಕೆ ಭಾರತದಲ್ಲಿ ಒಟ್ಟು ನೆಟ್ ಸಂಗ್ರಹ 238.85 ಕೋಟಿ ರೂಪಾಯಿ ತಲುಪಿದ್ದು, ಭಾರತದ ಒಟ್ಟು ಗ್ರಾಸ್ ಗಳಿಕೆ 285.20 ಕೋಟಿ ರೂಪಾಯಿ ಆಗಿದೆ.
ಇನ್ನೊಂದೆಡೆ ವಿದೇಶಗಳ ಓವರ್ಸೀಸ್ ಮಾರುಕಟ್ಟೆಯಲ್ಲೂ ನಾಲ್ಕನೇ ದಿನವೇ 45.00 ಕೋಟಿ ಕಲೆಕ್ಷನ್ ಆಗಿದ್ದು, ವಿದೇಶಿ ಗ್ರಾಸ್ ಗಳಿಕೆ 214.00 ಕೋಟಿಗೆ ಜಿಗಿದಿದೆ. ಈ ಮೂಲಕ ಜಾಗತಿಕವಾಗಿ 499.20 ಕೋಟಿ ರೂಪಾಯಿ ಗಳಿಸಿ ಶೀಘ್ರದಲ್ಲೇ 500 ಕೋಟಿ ಕ್ಲಬ್ ಸೇರಲಿದೆ.




