ಟಾಲಿವುಡ್ನ ಸ್ಟಾರ್ ನಟ ಅಲ್ಲು ಅರ್ಜುನ್ (Allu Arjun) ಅಭಿನಯದ ‘ರಾಕಾ’ ಸಿನಿಮಾ ಭಾರಿ ಕುತೂಹಲ ಮೂಡಿಸಿದೆ. ನಿರ್ದೇಶಕ ಅಟ್ಲಿ (Atlee) ಜೊತೆಗಿನ ಈ ಬಿಗ್ ಬಜೆಟ್ ಸಿನಿಮಾ ಇನ್ನು ಚಿತ್ರಮಂದಿರಕ್ಕೆ ಬರಬೇಕಿದೆ. ಆದರೆ ಅದಕ್ಕೂ ಮುನ್ನವೇ ಈ ಚಿತ್ರ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಅತಿ ದೊಡ್ಡ ಸಾಧನೆ ಮಾಡಿದೆ.
ಈ ಸಿನಿಮಾ ಬಿಡುಗಡೆಗೂ ಮುನ್ನವೇ ಗಿನ್ನೆಸ್ ವಿಶ್ವ ದಾಖಲೆಯನ್ನು ತನ್ನದಾಗಿಸಿಕೊಂಡಿದೆ. ಚಿತ್ರದಲ್ಲಿ ಬಳಸಿರುವ ಅತ್ಯಾಧುನಿಕ ತಂತ್ರಜ್ಞಾನದಿಂದಾಗಿ ಈ ಜಾಗತಿಕ ಗೌರವ ಲಭಿಸಿದೆ. ಭಾರತೀಯ ಚಿತ್ರರಂಗದ ಇತಿಹಾಸದಲ್ಲೇ ಇದೊಂದು ಅಪರೂಪದ ಮೈಲಿಗಲ್ಲಾಗಿದೆ.
ಸಿನಿಮಾದಲ್ಲಿ ಒಂದೇ ಸಮಯದಲ್ಲಿ 37 ಕಲಾವಿದರನ್ನು ಬಳಸಿಕೊಳ್ಳಲಾಗಿದೆ. ಇವರನ್ನು ಒಂದೇ ಬಾರಿಗೆ ರಿಯಲ್-ಟೈಮ್ ಮೋಷನ್-ಕ್ಯಾಪ್ಚರ್ ಮಾಡಲಾಗಿದೆ. ಹೀಗೆ ಮಾಡಿದ ಜಗತ್ತಿನ ಮೊದಲ ಸಿನಿಮಾ ಎಂಬ ಹೆಗ್ಗಳಿಕೆಗೆ ‘ರಾಕಾ’ (Raaka) ಪಾತ್ರವಾಗಿದೆ.
Raaka Movie: ಸೆಪ್ಟೆಂಬರ್ 21ರಂದು ಸಂತಸದ ಸುದ್ದಿ ಹಂಚಿಕೊಂಡ ಸನ್ ಪಿಕ್ಚರ್ಸ್
ಸನ್ ಪಿಕ್ಚರ್ಸ್ ಸಂಸ್ಥೆಯು ಸೆಪ್ಟೆಂಬರ್ 21ರಂದು ಈ ವಿಷಯವನ್ನು ಅಧಿಕೃತವಾಗಿ ಹಂಚಿಕೊಂಡಿದೆ. ನಿರ್ದೇಶಕ ಅಟ್ಲಿ ಹಾಗೂ ನಟ ಅಲ್ಲು ಅರ್ಜುನ್ ಗಿನ್ನೆಸ್ ಪ್ರಶಸ್ತಿ ಪತ್ರ ಹಿಡಿದಿರುವ ಚಿತ್ರವನ್ನು ಸೋಷಿಯಲ್ ಮೀಡಿಯಾದಲ್ಲಿ ಪೋಸ್ಟ್ ಮಾಡಿದೆ. ಭಾರತೀಯ ಸಿನಿಮಾವನ್ನು ಜಾಗತಿಕ ಮಟ್ಟಕ್ಕೆ ಕೊಂಡೊಯ್ಯುವ ಮತ್ತೊಂದು ಹೆಜ್ಜೆ ಇದಾಗಿದೆ ಎಂದು ನಿರ್ಮಾಣ ಸಂಸ್ಥೆ ತಿಳಿಸಿದೆ.
ಮುಂಬೈನಲ್ಲಿ ದಾಖಲಾದ ಜಾಗತಿಕ ಸಾಧನೆ
ಗಿನ್ನೆಸ್ ವಿಶ್ವ ದಾಖಲೆಗಳ ಅಧಿಕೃತ ಮಾಹಿತಿಯ ಪ್ರಕಾರ, 2026ರ ಸೆಪ್ಟೆಂಬರ್ 15ರಂದು ಮುಂಬೈನಲ್ಲಿ ಈ ಸಾಧನೆ ದಾಖಲಾಗಿದೆ. ಸನ್ ಟಿವಿ ನೆಟ್ವರ್ಕ್ ಲಿಮಿಟೆಡ್ ಮತ್ತು ನಿರ್ದೇಶಕ ಅಟ್ಲಿ ಅವರು ಅಲ್ಲು ಅರ್ಜುನ್ ಅಭಿನಯದ ‘ರಾಕಾ’ ಸಿನಿಮಾಗಾಗಿ ಈ ಮಹತ್ವದ ದಾಖಲೆಯನ್ನು ನಿರ್ಮಿಸಿದ್ದಾರೆ.
ಇದನ್ನು ಓದಿ: Raaka Glimpse Sep 21: ಅಲ್ಲು ಅರ್ಜುನ್ ‘ರಾಕಾ’ ಧಮಾಕಾ ದಿನಾಂಕ ಫಿಕ್ಸ್
ಏಪ್ರಿಲ್ 8ರಂದು ಬಿಡುಗಡೆಯಾಗಿದ್ದ ವಿಭಿನ್ನ ಫಸ್ಟ್ ಲುಕ್
ರಾಕಾ ಸಿನಿಮಾದ ಫಸ್ಟ್ ಲುಕ್ ಅನ್ನು ಏಪ್ರಿಲ್ 8ರಂದು ಅಲ್ಲು ಅರ್ಜುನ್ ಅವರ ಹುಟ್ಟುಹಬ್ಬದ ಸಂದರ್ಭದಲ್ಲಿ ಬಿಡುಗಡೆ ಮಾಡಲಾಗಿತ್ತು. ಈ ಪೋಸ್ಟರ್ನಲ್ಲಿನ ಅಲ್ಲು ಅರ್ಜುನ್ ಅವರ ವಿಭಿನ್ನ ಗೆಟಪ್ ಅಭಿಮಾನಿಗಳ ಗಮನ ಸೆಳೆದಿತ್ತು. ಬೋಳು ತಲೆ, ಕಣ್ಣಿಗೆ ಕಾಡಿಗೆ ಹಾಗೂ ಪ್ರಾಣಿಗಳ ಉಗುರುಗಳನ್ನು ಹೋಲುವ ಆಭರಣಗಳನ್ನು ಧರಿಸಿದ್ದ ಅವರ ಪೋಸ್ಟರ್ ವೈರಲ್ ಆಗಿತ್ತು.
18 ವರ್ಷಗಳ ಕನಸಿನ ಯೋಜನೆ ಎಂದಿದ್ದ ಅಟ್ಲಿ
ರಾಕಾ ಕುರಿತು ನಿರ್ದೇಶಕ ಅಟ್ಲಿ ಈ ಹಿಂದೆ ತಮ್ಮದೇ ಆದ ಕುತೂಹಲಕಾರಿ ಮಾತುಗಳನ್ನು ಹಂಚಿಕೊಂಡಿದ್ದರು. ಈ ಸಿನಿಮಾ ಕೇವಲ ಒಂದು ಚಿತ್ರವಲ್ಲ ಎಂದಿದ್ದರು. ಕಳೆದ 18 ವರ್ಷಗಳಿಂದ ತಮ್ಮ ಮನಸ್ಸಿನಲ್ಲಿದ್ದ ಒಂದು ಆಲೋಚನೆ ಎಂದು ಹೇಳಿಕೊಂಡಿದ್ದರು. ಆ ಆಲೋಚನೆಯೇ ಈಗ ದೊಡ್ಡ ಬಜೆಟ್ನ ಸಿನಿಮಾವಾಗಿ ರೂಪುಗೊಳ್ಳುತ್ತಿದೆ.
ದೀಪಿಕಾ ಪಡುಕೋಣೆ ನಾಯಕಿ, 2027ರಲ್ಲಿ ಬಿಡುಗಡೆ
ರಾಕಾ ಚಿತ್ರದಲ್ಲಿ ಅಲ್ಲು ಅರ್ಜುನ್ ಅವರೊಂದಿಗೆ ಬಾಲಿವುಡ್ ನಟಿ ದೀಪಿಕಾ ಪಡುಕೋಣೆ (Deepika Padukone) ಪ್ರಮುಖ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ಸನ್ ಪಿಕ್ಚರ್ಸ್ ಬ್ಯಾನರ್ ಅಡಿಯಲ್ಲಿ ಕಲಾನಿಧಿ ಮಾರನ್ ಈ ಚಿತ್ರವನ್ನು ನಿರ್ಮಿಸುತ್ತಿದ್ದಾರೆ. ಸದ್ಯ ಚಿತ್ರೀಕರಣ ನಡೆಯುತ್ತಿದ್ದು, 2027ರಲ್ಲಿ ಸಿನಿಮಾ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗುವ ನಿರೀಕ್ಷೆಯಿದೆ.
