Premada Oorali: ಸ್ಯಾಂಡಲ್‌ವುಡ್‌ನ ‘ಪ್ರೇಮದ ಊರಲಿ’ ಸಿನಿಮಾ ಬಾಕ್ಸ್ ಆಫೀಸ್‌ನಲ್ಲಿ ಭರ್ಜರಿ ಪ್ರದರ್ಶನ ಕಾಣುತ್ತಿದ್ದು, ದಿನದಿಂದ ದಿನಕ್ಕೆ ತನ್ನ ಗಳಿಕೆಯನ್ನು ಹೆಚ್ಚಿಸಿಕೊಳ್ಳುತ್ತಿದೆ. ಆರಂಭದ ದಿನಗಳಲ್ಲಿ ಸಾಧಾರಣ ಕಲೆಕ್ಷನ್ ಮಾಡಿದ್ದ ಚಿತ್ರ, ದಿನಗಳು ಕಳೆದಂತೆ ಪ್ರೇಕ್ಷಕರಿಂದ ಉತ್ತಮ ಪ್ರಶಂಸೆ ಪಡೆದು ಸದ್ದು ಮಾಡುತ್ತಿದೆ. ವಿಶೇಷವಾಗಿ ಎರಡನೇ ವಾರಾಂತ್ಯದಲ್ಲಿ ಈ ಸಿನಿಮಾ ಭಾರಿ ಕಲೆಕ್ಷನ್ ಮಾಡುವ ಮೂಲಕ ಗಾಂಧಿನಗರವೇ ಬೆರಗಾಗುವಂತೆ ಮಾಡಿದೆ.
10ನೇ ದಿನ ಭಾನುವಾರ ಬರೋಬ್ಬರಿ 3.85 ಕೋಟಿ ರೂ. ನೆಟ್ ಕಲೆಕ್ಷನ್
ಚಿತ್ರವು ತನ್ನ 10ನೇ ದಿನವಾದ ಭಾನುವಾರ (ಅಕ್ಟೋಬರ್ 4) ರಾಜ್ಯಾದ್ಯಂತ ಬರೋಬ್ಬರಿ 3.85 ಕೋಟಿ ರೂಪಾಯಿ ನೆಟ್ ಕಲೆಕ್ಷನ್ ಮಾಡಿದೆ. ಒಟ್ಟು 663 ಶೋಗಳಲ್ಲಿ ಪ್ರದರ್ಶನಗೊಂಡ ಈ ಚಿತ್ರ, ಶನಿವಾರದ ಗಳಿಕೆಗೆ (2.80 ಕೋಟಿ ರೂ.) ಹೋಲಿಸಿದರೆ ಶೇ. 37.5 ರಷ್ಟು ಪ್ರಗತಿ ಕಂಡಿದೆ. ಇದರೊಂದಿಗೆ ಚಿತ್ರದ ಒಟ್ಟು ಭಾರತೀಯ ನೆಟ್ ಕಲೆಕ್ಷನ್ 14.57 ಕೋಟಿ ರೂಪಾಯಿ ತಲುಪಿದ್ದು, ಗ್ರಾಸ್ ಕಲೆಕ್ಷನ್ 16.96 ಕೋಟಿ ರೂಪಾಯಿ ಗಡಿ ದಾಟಿದೆ.
ಕೇವಲ 9 ಲಕ್ಷದಿಂದ ಆರಂಭವಾಗಿದ್ದ ಮೊದಲ ವಾರದ ಗಳಿಕೆ ಗ್ರಾಫ್
ಚಿತ್ರವು ಬಿಡುಗಡೆಯಾದ ಮೊದಲ ದಿನವಾದ ಸೆಪ್ಟೆಂಬರ್ 25ರ ಶುಕ್ರವಾರ ಕೇವಲ 9 ಲಕ್ಷ ರೂಪಾಯಿ ಕಲೆಕ್ಷನ್ ಮಾಡಿತ್ತು. ನಂತರ ಶನಿವಾರ 23 ಲಕ್ಷ ರೂಪಾಯಿ ಹಾಗೂ ಭಾನುವಾರ 55 ಲಕ್ಷ ರೂಪಾಯಿ ಗಳಿಕೆ ಕಾಣುವ ಮೂಲಕ ಪ್ರೇಕ್ಷಕರ ಗಮನ ಸೆಳೆಯಿತು.
ಇದನ್ನು ಓದಿ: Premada Oorali:’ಪ್ರೇಮದ ಊರಲಿ’ ಸಿನಿಮಾಗೆ ಅನ್ಯಾಯ? ಈ ಚಿತ್ರಮಂದಿರದಲ್ಲಿ ನಕಲಿ ಟಿಕೆಟ್ ಸೇಲ್?
ವಾರದ ಕೆಲಸದ ದಿನಗಳಲ್ಲೂ ಅಂದರೆ ಸೋಮವಾರ 65 ಲಕ್ಷ, ಮಂಗಳವಾರ 95 ಲಕ್ಷ, ಬುಧವಾರ 1.15 ಕೋಟಿ ಹಾಗೂ ಗುರುವಾರ 1.70 ಕೋಟಿ ರೂಪಾಯಿ ಸಂಗ್ರಹ ಮಾಡಿತ್ತು. ಈ ಮೂಲಕ ಸಿನಿಮಾ ತನ್ನ ಮೊದಲ ವಾರದಲ್ಲೇ ಒಟ್ಟು 5.32 ಕೋಟಿ ರೂಪಾಯಿ ಬಾಚಿಕೊಳ್ಳುವಲ್ಲಿ ಯಶಸ್ವಿಯಾಗಿತ್ತು.
Premada Oorali: ಗಾಂಧಿ ಜಯಂತಿ ರಜಾದಿನದಿಂದ ಎರಡನೇ ವಾರಾಂತ್ಯದಲ್ಲಿ ಭಾರಿ ಜಿಗಿತ
ಎರಡನೇ ವಾರದಲ್ಲಿ ಈ ಚಿತ್ರದ ಕಲೆಕ್ಷನ್ ಗ್ರಾಫ್ ಅತ್ಯಂತ ವೇಗವಾಗಿ ಮೇಲೇರಿ ಬಾಕ್ಸ್ ಆಫೀಸ್‌ನಲ್ಲಿ ಹೊಸ ದಾಖಲೆ ಬರೆದಿದೆ. ಗಾಂಧಿ ಜಯಂತಿಯ ರಜಾದಿನವಾದ ಶುಕ್ರವಾರ (ಅಕ್ಟೋಬರ್ 2) ಬರೋಬ್ಬರಿ 2.60 ಕೋಟಿ ರೂಪಾಯಿ ಗಳಿಸಿದರೆ, ಶನಿವಾರ 2.80 ಕೋಟಿ ರೂಪಾಯಿ ಹರಿದುಬಂದಿತ್ತು.
ಪ್ರೇಕ್ಷಕರ ಉತ್ತಮ ‘ಮೌತ್ ಪಬ್ಲಿಸಿಟಿ’ ಯಿಂದಾಗಿ ಚಿತ್ರದ ಪ್ರದರ್ಶನಗಳ ಸಂಖ್ಯೆ ಕೇವಲ 60 ರಿಂದ 663ಕ್ಕೆ ಏರಿಕೆಯಾಗಿದೆ. ಹೌಸ್‌ಫುಲ್ ಪ್ರದರ್ಶನ ಕಾಣುತ್ತಿರುವ ‘ಪ್ರೇಮದ ಊರಲಿ’ ಸಿನಿಮಾ ಮುಂಬರುವ ದಿನಗಳಲ್ಲೂ ತನ್ನ ಸಫಲ ಪಯಣ ಮುಂದುವರಿಸುವ ಲಕ್ಷಣಗಳು ಕಾಣಿಸುತ್ತಿವೆ.
