ಬೆಂಗಳೂರು: ಕೋಲಾರ ಮತ್ತು ಚಿಕ್ಕಬಳ್ಳಾಪುರ ಜಿಲ್ಲೆಗಳ ಕಾಂಗ್ರೆಸ್ (Congress) ಪಕ್ಷದೊಳಗಿನ ಬಣ ಬಡಿದಾಟ ತಾರಕಕ್ಕೇರಿದ ಬೆನ್ನಲ್ಲೇ ಎರಡೂ ಜಿಲ್ಲೆಗಳ ಶಾಸಕರ ದಂಡೊಂದು ಸದಾಶಿವನಗರದಲ್ಲಿರುವ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರ ನಿವಾಸದಲ್ಲಿ ಭೇಟಿಯಾಗಿ ಮಾತುಕತೆ ನಡೆಸಿದೆ. ಪ್ರದೀಪ್ ಈಶ್ವರ್ ಅವರ ಬೆಳವಣಿಗೆಗಳು ಸೇರಿದಂತೆ ಜಿಲ್ಲೆಗಳ ಆಂತರಿಕ ಕಲಹವನ್ನು ತಣ್ಣಗಾಗಿಸುವ ನಿಟ್ಟಿನಲ್ಲಿ ನಡೆದ ಈ ಭೇಟಿ ರಾಜ್ಯ ರಾಜಕಾರಣದಲ್ಲಿ ತೀವ್ರ ಕುತೂಹಲಕ್ಕೆ ಕಾರಣವಾಗಿದೆ.
ಕೋಲಾರ ಕದನ – ಚಿಕ್ಕಬಳ್ಳಾಪುರ ಜಟಾಪಟಿ!
ಈ ನಿಯೋಗದಲ್ಲಿ ಮಾಜಿ ಸಚಿವ ಹಾಗೂ ಚಿಂತಾಮಣಿ ಶಾಸಕ ಎಂ.ಸಿ. ಸುಧಾಕರ್, ನಂಜೇಗೌಡ, ಬಂಗಾರಪೇಟೆ ಶಾಸಕ ನಾರಾಯಣಸ್ವಾಮಿ, ಬಾಗೇಪಲ್ಲಿ ಶಾಸಕ ಸುಬ್ಬರೆಡ್ಡಿ, ಕೊತ್ತನೂರು ಮಂಜುನಾಥ್ ಮತ್ತು ಕೆಜಿಎಫ್ ಶಾಸಕಿ ರೂಪಕಲಾ ಶಶಿಧರ್ ಭಾಗಿಯಾಗಿದ್ದರು. ಇತ್ತೀಚಿನ ವಿಧಾನಸಭಾ ಅಧಿವೇಶನದಲ್ಲಿ ರೂಪಕಲಾ ಶಶಿಧರ್ ಮತ್ತು ಕೆ.ಆರ್. ರಮೇಶ್ ಕುಮಾರ್ ಬಣದ ನಾರಾಯಣಸ್ವಾಮಿ ನಡುವೆ ಸದನದ ಒಳಗೆಯೇ ತೀವ್ರ ವಾಕ್ಸಮರ ನಡೆದಿದ್ದು, ರೂಪಕಲಾ ತಮಗೆ ಬೆದರಿಕೆ ಹಾಕಿದ್ದಾರೆ ಎಂದು ನಾರಾಯಣಸ್ವಾಮಿ ಆರೋಪಿಸಿದ್ದರು. ಕೋಲಾರದ ಈ ಜಟಾಪಟಿ ಶಾಸಕಾಂಗ ಪಕ್ಷದ ಸಭೆಯಲ್ಲೂ ಗಂಭೀರ ಚರ್ಚೆಗೆ ಕಾರಣವಾಗಿತ್ತು.
ಅದೇ ಹೊತ್ತಿನಲ್ಲಿ ಚಿಕ್ಕಬಳ್ಳಾಪುರ ಶಾಸಕ ಪ್ರದೀಪ್ ಈಶ್ವರ್ ನಮ್ಮದೇ ಸರ್ಕಾರ ಇದ್ದರೂ ದಲಿತರಿಗೆ ದೇವಸ್ಥಾನ ಪ್ರವೇಶಕ್ಕೆ ಅವಕಾಶ ಸಿಗುತ್ತಿಲ್ಲ ಎಂದು ಬಹಿರಂಗವಾಗಿ ಅಸಮಾಧಾನ ಹೊರಹಾಕಿದ್ದರು. ಅವರ ಕಾರ್ಯವೈಖರಿಯನ್ನು ಎಂ.ಸಿ. ಸುಧಾಕರ್ ಬಣ ತೀವ್ರವಾಗಿ ವಿರೋಧಿಸಿದ್ದು, ಮುಂದಿನ ಚುನಾವಣೆಯಲ್ಲಿ ಪ್ರದೀಪ್ ಈಶ್ವರ್ ಅವರಿಗೆ ಟಿಕೆಟ್ ನೀಡಬಾರದು ಎಂದು ಸ್ಥಳೀಯ ಮುಖಂಡರು ಮತ್ತು ಕಾರ್ಯಕರ್ತರು ಕೆಪಿಸಿಸಿಗೆ ಮನವಿ ಮಾಡಿದ್ದಾರೆ.
ಇದನ್ನೂ ಓದಿ : ರಾಹುಲ್ ಗಾಂಧಿ ಪಾಕ್, ಚೀನಾ ಪರ ಏಜೆಂಟ್ ಇದ್ದಂತೆ – ಯತ್ನಾಳ್ ಹೊಸ ವಿವಾದ
ಕೋಲಾರ ಮತ್ತು ಚಿಕ್ಕಬಳ್ಳಾಪುರ ಜಿಲ್ಲೆಗಳ ಕಾಂಗ್ರೆಸ್ ರಾಜಕಾರಣದಲ್ಲಿ ಬಣ ರಾಜಕೀಯ ದಶಕಗಳಿಂದಲೂ ಬೆರೆತು ಹೋಗಿದೆ. ಆದರೆ ಈ ಬಾರಿ ಸದನದ ಒಳಗೆ ಶಾಸಕರು ಪರಸ್ಪರ ಬೆದರಿಕೆ ಆರೋಪ ಮಾಡುವ ಹಂತಕ್ಕೆ ತಲುಪಿರುವುದು ಪಕ್ಷದ ಶಿಸ್ತಿಗೆ ದೊಡ್ಡ ಸವಾಲಾಗಿದೆ. ಕೆ.ಆರ್. ರಮೇಶ್ ಕುಮಾರ್ ಅವರ ಮಾರ್ಗದರ್ಶನದಲ್ಲಿ ಗುರುತಿಸಿಕೊಳ್ಳುವ ನಾರಾಯಣಸ್ವಾಮಿ ಮತ್ತು ಕೆಜಿಎಫ್ ಶಾಸಕಿ ರೂಪಕಲಾ ಶಶಿಧರ್ ನಡುವಿನ ಸಂಘರ್ಷ ಕೇವಲ ವೈಯಕ್ತಿಕ ಮನಸ್ತಾಪವಲ್ಲ. ಅದು ಕೋಲಾರ ಜಿಲ್ಲೆಯ ದಲಿತ ಮತ್ತು ಪ್ರಬಲ ಸಮುದಾಯಗಳ ನಡುವಿನ ನಾಯಕತ್ವದ ಹಿಡಿತದ ಕದನದ ಪ್ರತಿಬಿಂಬವಾಗಿದೆ.
ಇತ್ತ ಚಿಕ್ಕಬಳ್ಳಾಪುರದಲ್ಲಿ ಪ್ರದೀಪ್ ಈಶ್ವರ್ ಮತ್ತು ಎಂ.ಸಿ. ಸುಧಾಕರ್ ನಡುವಿನ ಕದನ ಹೊಸಬರು ಮತ್ತು ಹಳಬರ ನಡುವಿನ ಅಧಿಕಾರದ ಕಿತ್ತಾಟವಾಗಿದೆ. ಪ್ರದೀಪ್ ಈಶ್ವರ್ ದಲಿತರ ದೇವಸ್ಥಾನ ಪ್ರವೇಶದ ವಿಷಯವನ್ನು ಎತ್ತಿ ತಮ್ಮದೇ ಸರ್ಕಾರದ ವಿರುದ್ಧ ಧ್ವನಿ ಎತ್ತಿರುವುದು ಸಾಮಾಜಿಕ ನ್ಯಾಯದ ವಿಚಾರದಲ್ಲಿ ಸರ್ಕಾರದ ಬದ್ಧತೆಯನ್ನು ಪ್ರಶ್ನಿಸುವಂತಿದೆ. ಇದು ಸರ್ಕಾರಕ್ಕೆ ಮುಜುಗರ ತಂದರೂ, ತಳಮಟ್ಟದಲ್ಲಿ ಅವರಿಗೆ ಯುವ ಮತ್ತು ದಲಿತ ಸಮುದಾಯದ ಬೆಂಬಲವನ್ನು ಹೆಚ್ಚಿಸಬಹುದು. ಆದರೆ ಹಿರಿಯ ನಾಯಕರನ್ನು ವಿಶ್ವಾಸಕ್ಕೆ ತೆಗೆದುಕೊಳ್ಳದೆ ಬಹಿರಂಗ ಹೇಳಿಕೆ ನೀಡುವುದು ಪಕ್ಷಕ್ಕೆ ವಿರುದ್ಧವಾಗಿದೆ. ಸ್ಥಳೀಯ ಮುಖಂಡರು ಟಿಕೆಟ್ ನಿರಾಕರಿಸುವಂತೆ ಕೆಪಿಸಿಸಿಗೆ ಮನವಿ ಮಾಡಿರುವುದು ಪಕ್ಷದೊಳಗೆ ಅಸಮಾಧಾನ ಎಷ್ಟು ಆಳವಾಗಿದೆ ಎಂಬುದನ್ನು ತೋರಿಸುತ್ತದೆ. ಈ ಒಳಜಗಳ ಹೀಗೆ ಮುಂದುವರಿದರೆ ಮುಂಬರುವ ಜಿಲ್ಲಾ ಪಂಚಾಯಿತಿ, ತಾಲ್ಲೂಕು ಪಂಚಾಯಿತಿ ಮತ್ತು ನಗರಸಭೆ ಚುನಾವಣೆಗಳಲ್ಲಿ ಕಾಂಗ್ರೆಸ್ ಗೆ ಹಿನ್ನಡೆಯಾಗುವ ಸಾಧ್ಯತೆ ಹೆಚ್ಚು.
