Photo Credits: @tnitkannada (Instagram)
ರೇಣುಕಾಸ್ವಾಮಿ ಕೊಲೆ ಪ್ರಕರಣದಲ್ಲಿ ಎ-14 ಆರೋಪಿ ಪ್ರದೋಷ್ ಮಾಫಿ ಸಾಕ್ಷಿಯಾಗುವ (ಅಪ್ರೂವರ್) ಅರ್ಜಿ ವಿಚಾರಣೆ ತೀವ್ರ ಕುತೂಹಲ ಮೂಡಿಸಿದೆ. ಕೋರ್ಟ್ ಮಾಫಿ ಸಾಕ್ಷಿ ಹೇಳಿಕೆ ದಾಖಲಿಸಿಕೊಳ್ಳುವ ಪ್ರಕ್ರಿಯೆಯನ್ನು ಆಗಸ್ಟ್ 20ಕ್ಕೆ ಮುಂದೂಡಿದ್ದು, ವಾದ-ಪ್ರತಿವಾದಗಳು ಬಿರುಸಿನಿಂದ ಸಾಗಿವೆ. ಒಂದು ವೇಳೆ ನ್ಯಾಯಾಲಯ ಈ ಅರ್ಜಿಯನ್ನು ತಿರಸ್ಕರಿಸಿದರೆ ಆರೋಪಿ ಪ್ರದೋಷ್ಗೆ ಕಾನೂನಾತ್ಮಕವಾಗಿ ದೊಡ್ಡ ಹಿನ್ನಡೆಯಾಗಲಿದೆ.
ಕೋರ್ಟ್ನಲ್ಲಿ ಜಡ್ಜ್ ನೇರ ಪ್ರಶ್ನೆ: ‘ಅಪ್ರೂವರ್’ ಅರ್ಜಿ ಒಪ್ಪದಿದ್ದರೆ ಜೈಲೇ ಗತಿ…
ವಿಚಾರಣೆ ವೇಳೆ ನ್ಯಾಯಾಧೀಶರು ಪ್ರದೋಷ್ಗೆ ಮಾಫಿ ಸಾಕ್ಷಿಯಾಗುವ ಪ್ರಕ್ರಿಯೆಯ ಕಾನೂನು ಪರಿಣಾಮಗಳ ಬಗ್ಗೆ ನೇರ ಎಚ್ಚರಿಕೆ ನೀಡಿದ್ದಾರೆ. “ನಿಮ್ಮ ಮಾಫಿ ಸಾಕ್ಷಿ ಅರ್ಜಿಯನ್ನು ಕೋರ್ಟ್ ಒಪ್ಪದೇ ಇದ್ದರೆ ನೀವು ಜೈಲಿನಲ್ಲೇ ಇರಬೇಕಾಗುತ್ತದೆ ಎಂಬ ಅರಿವಿದೆಯಾ?” ಎಂದು ಪ್ರಶ್ನಿಸಿದ್ದಾರೆ. “ಪ್ರಕರಣದ ಸಂಪೂರ್ಣ ಸತ್ಯವನ್ನು ಬಹಿರಂಗಪಡಿಸದಿದ್ದರೆ ನಿಮ್ಮನ್ನು ಮತ್ತೆ ಮುಖ್ಯ ಆರೋಪಿಯನ್ನಾಗಿ ಮಾಡಲಾಗುತ್ತದೆ” ಎಂದು ಜಡ್ಜ್ ಸ್ಪಷ್ಟಪಡಿಸಿದ್ದಾರೆ. ಇದಕ್ಕೆ ಉತ್ತರಿಸಿದ ಪ್ರದೋಷ್, “ತಮಗೆ ತಮ್ಮ ವಕೀಲರು ಈ ಎಲ್ಲಾ ವಿಚಾರಗಳ ಬಗ್ಗೆ ಸಂಪೂರ್ಣ ಮಾಹಿತಿ ನೀಡಿದ್ದಾರೆ” ಎಂದು ಕೋರ್ಟ್ಗೆ ತಿಳಿಸಿದ್ದಾನೆ. ಸಂಪೂರ್ಣ ಸತ್ಯ ಹೊರಹಾಕದಿದ್ದರೆ ಅಥವಾ ಸಬೂಬು ನೀಡಿದರೆ ಮಾಫಿ ಸಾಕ್ಷಿಗೆ ಸಿಗುವ ಕಾನೂನು ರಕ್ಷಣೆ ತಕ್ಷಣವೇ ರದ್ದಾಗುತ್ತದೆ.
ಹಿರಿಯ ವಕೀಲ ಹಶ್ಮತ್ ಪಾಷಾ ವಾದ: ಸ್ವತಂತ್ರ ವಿಚಾರಣೆಗೆ ದರ್ಶನ್ ಪರ ವಕೀಲರ ಮನವಿ…
ದರ್ಶನ್ ಪರ ಹಿರಿಯ ವಕೀಲ ಹಶ್ಮತ್ ಪಾಷಾ ಕೋರ್ಟ್ನಲ್ಲಿ ಸುದೀರ್ಘ ವಾದ ಮಂಡಿಸಿ, ಮಾಫಿ ಸಾಕ್ಷಿ ಪ್ರಕ್ರಿಯೆಯನ್ನು ಪ್ರಶ್ನಿಸಿದ್ದಾರೆ. “ಪ್ರದೋಷ್ ಈ ಕೊಲೆ ಪ್ರಕರಣದಲ್ಲಿ ಪ್ರಮುಖ ಪಾತ್ರ ವಹಿಸಿದ್ದು, ಸಹ ಆರೋಪಿಗಳಿಂದ ಸಾಕಷ್ಟು ಲಾಭ ಮತ್ತು ನೆರವು ಪಡೆದಿದ್ದಾನೆ” ಎಂದಿದ್ದಾರೆ. “ಜೈಲಿನಿಂದ ಬೇಗ ಬಿಡುಗಡೆಯಾಗಬಹುದು ಎಂಬ ಆಸೆಯಿಂದಲೇ ಆತ ಮಾಫಿ ಸಾಕ್ಷಿಯಾಗಲು ಮುಂದಾಗಿರುವ ಸಾಧ್ಯತೆಯಿದೆ” ಎಂದು ವಾದಿಸಿದ್ದಾರೆ. ಆದ್ದರಿಂದ ಪ್ರದೋಷ್ ಮೇಲೆ ಯಾರಾದರೂ ಒತ್ತಡ ಹೇರಿದ್ದಾರೆಯೇ ಅಥವಾ ಆಮಿಷ ಒಡ್ಡಿದ್ದಾರೆಯೇ ಎಂದು ಸ್ವತಂತ್ರವಾಗಿ ತನಿಖೆ ನಡೆಸಬೇಕು ಎಂದಿದ್ದಾರೆ. ಪ್ರಾಸಿಕ್ಯೂಷನ್ ತನ್ನ ಅನುಕೂಲಕ್ಕೆ ತಕ್ಕಂತೆ ಪ್ರದೋಷ್ನನ್ನು ಬಳಸಿಕೊಳ್ಳುತ್ತಿದೆ ಎಂದು ಹಶ್ಮತ್ ಪಾಷಾ ನ್ಯಾಯಪೀಠದ ಗಮನಕ್ಕೆ ತಂದಿದ್ದಾರೆ.
ಆಗಸ್ಟ್ 20ಕ್ಕೆ ವಿಚಾರಣೆ ಮುಂದೂಡಿಕೆ…
ಎರಡೂ ಕಡೆಗಳ ವಾದ ಆಲಿಸಿದ ನ್ಯಾಯಾಲಯ, ಪ್ರದೋಷ್ ಪರ ವಕೀಲರಿಂದ ಕಾನೂನು ಪರಿಣಾಮಗಳ ಖಾತ್ರಿ ಪಡೆದುಕೊಂಡಿದೆ. ಬಳಿಕ ಮಾಫಿ ಸಾಕ್ಷಿಯ ಅಪ್ರೂವರ್ ಸ್ಟೇಟ್ಮೆಂಟ್ (ಮಾಫಿ ಸಾಕ್ಷಿ ಹೇಳಿಕೆ) ದಾಖಲಿಸಿಕೊಳ್ಳುವ ಪ್ರಕ್ರಿಯೆಯನ್ನು ಆಗಸ್ಟ್ 20ಕ್ಕೆ ನಿಗದಿಪಡಿಸಿದೆ. ಆಗಸ್ಟ್ 20ರಂದು ಪ್ರದೋಷ್ ನೀಡುವ ಹೇಳಿಕೆ ಮತ್ತು ಕೋರ್ಟ್ ತೆಗೆದುಕೊಳ್ಳುವ ನಿರ್ಧಾರ ಪ್ರಕರಣಕ್ಕೆ ದೊಡ್ಡ ತಿರುವು ನೀಡಲಿದೆ. ಒಂದು ವೇಳೆ ಕೋರ್ಟ್ ಅರ್ಜಿಯನ್ನು ಪುರಸ್ಕರಿಸಿದರೆ ಪ್ರದೋಷ್ ಸರ್ಕಾರಿ ಸಾಕ್ಷಿಯಾಗಲಿದ್ದು, ದರ್ಶನ್ ತಂಡಕ್ಕೆ ತೀವ್ರ ಹಿನ್ನಡೆಯಾಗಲಿದೆ. ಆದರೆ ಅರ್ಜಿ ವಜಾಗೊಂಡರೆ ಪ್ರದೋಷ್ ಸಾಮಾನ್ಯ ಆರೋಪಿಯಾಗಿ ಜೈಲಿನಲ್ಲಿಯೇ ಉಳಿದು ಕಾನೂನು ಹೋರಾಟ ಎದುರಿಸಬೇಕಾಗುತ್ತದೆ.
