BBK 13: ‘ಬಿಗ್ ಬಾಸ್ ಕನ್ನಡ ಸೀಸನ್ 13’ರಲ್ಲಿ ದಿನಕ್ಕೊಂದು ಹೊಸ ತಿರುವು ಹಾಗೂ ವಿವಾದಗಳು ಸೃಷ್ಟಿಯಾಗುತ್ತಲೇ ಇವೆ. ಈ ವಾರ ಕ್ಯಾಪ್ಟನ್ಸಿ ಟಾಸ್ಕ್‌ನಲ್ಲಿ ಉಸ್ತುವಾರಿ ವಹಿಸಿಕೊಂಡಿದ್ದ ಸ್ಪರ್ಧಿಗಳ ಎಡವಟ್ಟಿನಿಂದಾಗಿ ಇಡೀ ಆಟವೇ ಸಂಪೂರ್ಣವಾಗಿ ರದ್ದಾಗಿದೆ. ಆದರೆ ಅತ್ಯುತ್ತಮವಾಗಿ ಆಟವಾಡಿ ತಂಡವನ್ನು ಗೆಲ್ಲಿಸಿದ ವೈಲ್ಡ್ ಕಾರ್ಡ್ ಸ್ಪರ್ಧಿ ಗಾನವಿಗೆ ಮನೆಯವರು ‘ಕಳಪೆ’ ನೀಡಿದ್ದು ಭಾರಿ ಚರ್ಚೆಗೆ ಗ್ರಾಸವಾಗಿದೆ.
ಟಾಸ್ಕ್ ರದ್ದಾಗಲು ಉಸ್ತುವಾರಿಗಳ ನಡೆ ಕಾರಣ
ಈ ವಾರ ಬಿಗ್ ಬಾಸ್ ನೀಡಿದ್ದ ಕ್ಯಾಪ್ಟನ್ಸಿ ಟಾಸ್ಕ್ ಅನ್ನು ಉಸ್ತುವಾರಿಗಳು ಸರಿಯಾಗಿ ಅರ್ಥ ಮಾಡಿಕೊಳ್ಳಲಿಲ್ಲ. ತಮ್ಮ ಮನಸ್ಸಿಗೆ ಬಂದಂತೆ ನಿಯಮಗಳನ್ನು ಮಾಡಿ ಇಡೀ ಆಟದ ವಾತಾವರಣವನ್ನು ಹಾಳು ಮಾಡಿದರು. ಉಸ್ತುವಾರಿಗಳ ಈ ಎಡವಟ್ಟು ತೀವ್ರ ಸ್ವರೂಪ ಪಡೆದುಕೊಂಡಿದ್ದರಿಂದ ಬಿಗ್ ಬಾಸ್ ಅನಿವಾರ್ಯವಾಗಿ ಕ್ಯಾಪ್ಟನ್ಸಿ ಟಾಸ್ಕ್ ಅನ್ನೇ ರದ್ದು ಮಾಡಿದರು.
ಇದನ್ನು ಓದಿ: BBK 13: ವೈಲ್ಡ್ ಕಾರ್ಡ್ ಎಂಟ್ರಿ ಕೊಟ್ಟ ಗಾನವಿ ಗೌಡ ಧಮಾಕಾ; ಶಾಸ್ತ್ರಿ-ಯಶಸ್ ವಿಮಾನಕ್ಕೆ ಹೈಜಾಕ್
ಗಾನವಿ ನಾಯಕತ್ವಕ್ಕೆ ಸಿಕ್ಕಿದ್ದು ಬೈಗುಳ ಹಾಗೂ ಕಳಪೆ
ವೈಲ್ಡ್ ಕಾರ್ಡ್ ಮೂಲಕ ಎಂಟ್ರಿ ಕೊಟ್ಟಿದ್ದ ಗಾನವಿ ಅವರು ಟಾಸ್ಕ್‌ನಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡಿದರು. ತಂಡದ ನಾಯಕಿಯಾಗಿ ಎಲ್ಲರನ್ನೂ ಒಟ್ಟಿಗೆ ಕರೆದೊಯ್ದು ತಮ್ಮ ತಂಡಕ್ಕೆ ಅದ್ಭುತ ಗೆಲುವು ತಂದಿತ್ತರು. ಆದರೆ ಗೆಲುವಿನ ಸಂಭ್ರಮದ ಬದಲಿಗೆ ಗಾನವಿಗೆ ಸೌಂದರ್ಯಾ ಶೆಟ್ಟಿ ಹಾಗೂ ಗಗನ್ ಸೇರಿದಂತೆ ಮನೆ ಮಂದಿಯಿಂದ ಟೀಕೆ ಮತ್ತು ಕಳಪೆ ಪಟ್ಟ ಸಿಕ್ಕಿತು.
BBK 13: ಮಂಜು, ಲಿಖಿತ್ ಬಚಾವ್; ವೀಕ್ಷಕರ ತೀವ್ರ ಆಕ್ರೋಶ
ಅಸಲಿಗೆ ಉಸ್ತುವಾರಿ ವಹಿಸಿಕೊಂಡು ಇಡೀ ವಾರದ ಶ್ರಮ ಹಾಗೂ ಕ್ಯಾಪ್ಟನ್ಸಿಯನ್ನು ಹಾಳು ಮಾಡಿದ ಮಂಜು ಮತ್ತು ಲಿಖಿತ್ ಕಳಪೆಗೆ ಅರ್ಹರಾಗಿದ್ದರು. ಆದರೆ ಅವರಿಬ್ಬರೂ ಜಾಣತನದಿಂದ ಬಚಾವ್ ಆಗಿದ್ದು, ಮನೆಯವರು ಕೂಡ ಈ ಬಗ್ಗೆ ಮೌನ ತಾಳಿದ್ದಾರೆ. ಅತ್ಯುತ್ತಮವಾಗಿ ಆಡಿದ ಗಾನವಿಗೆ ಕಳಪೆ ನೀಡಿ, ನಿಜವಾದ ತಪ್ಪಿತಸ್ಥರನ್ನು ರಕ್ಷಿಸಿರುವುದಕ್ಕೆ ಸೋಶಿಯಲ್ ಮೀಡಿಯಾದಲ್ಲಿ ವೀಕ್ಷಕರು ತೀವ್ರ ಆಕ್ರೋಶ ಹೊರಹಾಕುತ್ತಿದ್ದಾರೆ.
