Darshan Case: ಚಿತ್ರದುರ್ಗದ ರೇಣುಕಾಸ್ವಾಮಿ ಕೊಲೆ ಪ್ರಕರಣದಲ್ಲಿ ನಟ ದರ್ಶನ್ ಹಾಗೂ ಅವರ ಗ್ಯಾಂಗ್‌ಗೆ ಇದೀಗ ಬೃಹತ್ ಮಟ್ಟದ ಸಂಕಷ್ಟ ಎದುರಾಗಿದೆ. ಆರೋಪಿ ಪ್ರದೋಷ್ ಮಾಫಿ ಸಾಕ್ಷಿಯಾಗಲು ಮುಂದಾಗಿರುವುದು ಇಡೀ ಡಿ-ಗ್ಯಾಂಗ್ ಪಾಲಿಗೆ ನಿಜಕ್ಕೂ ದೊಡ್ಡ ದುಃಸ್ವಪ್ನವಾಗಿ ಪರಿಣಮಿಸಿದೆ. ಪೊಲೀಸರ ಸುದೀರ್ಘ ತನಿಖೆಯಲ್ಲಿಯೂ ಬಯಲಾಗದ ಹಲವು ತನಿಖಾ ರಹಸ್ಯಗಳು ಇದೀಗ ಪ್ರದೋಷ್ ನೀಡುತ್ತಿರುವ ಹೇಳಿಕೆಯಿಂದ ಹೊರಬರುತ್ತಿವೆ.
83 ಪುಟಗಳ ಸುದೀರ್ಘ ಹೇಳಿಕೆ ದಾಖಲು
ಸೆಪ್ಟೆಂಬರ್ 28ರಂದು ಬಿಗಿ ಭದ್ರತೆಯ ನಡುವೆ ಪ್ರದೋಷ್ ಅವರನ್ನು 59ನೇ ಸಿಟಿ ಸಿವಿಲ್ ಮತ್ತು ಸೆಷನ್ಸ್ ಕೋರ್ಟ್‌ಗೆ ಹಾಜರುಪಡಿಸಲಾಗಿತ್ತು. ಕಳೆದ ಮೂರು ದಿನಗಳಲ್ಲಿ ನ್ಯಾಯಾಧೀಶರ ಮುಂದೆ ಬರೋಬ್ಬರಿ 83 ಪುಟಗಳ ಅತ್ಯಂತ ಪ್ರಮುಖ ಹಾಗೂ ಸುದೀರ್ಘ ಹೇಳಿಕೆಯನ್ನು ದಾಖಲಿಸಲಾಗಿದೆ. ಹೇಳಿಕೆ ದಾಖಲಾತಿ ಪ್ರಕ್ರಿಯೆ ಇನ್ನೂ ಪೂರ್ಣಗೊಳ್ಳದ ಹಿನ್ನೆಲೆಯಲ್ಲಿ ಕೋರ್ಟ್ ಈ ವಿಚಾರಣೆಯನ್ನು ಸೋಮವಾರಕ್ಕೆ ಮುಂದೂಡಿಕೆ ಮಾಡಿದೆ.
ಇದನ್ನು ಓದಿ: Darshan Case: 3 ಗಂಟೆ ಪ್ರದೋಷ್ ಸಾಕ್ಷ್ಯ ವಿಚಾರಣೆ; ಶೆಡ್‌ನಲ್ಲಿ ಅಂದು ನಡೆದಿದ್ದೇನು?
ಪೊಲೀಸರಿಗೆ ಸಿಗದ ಸಾಕ್ಷ್ಯಗಳು ಈಗ ರಿವೀಲ್
ಪೊಲೀಸರು ಎಷ್ಟೇ ವಿಚಾರಣೆ ನಡೆಸಿದರೂ ತಿಳಿದುಬರದಿದ್ದ ಕೆಲ ಆಘಾತಕಾರಿ ಸತ್ಯಗಳು ಪ್ರದೋಷ್ ನೀಡಿದ ಮಾಫಿ ಸಾಕ್ಷಿಯಿಂದ ಬಯಲಾಗಿವೆ. ರೇಣುಕಾಸ್ವಾಮಿ ಮೃತದೇಹವನ್ನು ಅಪಾರ್ಟ್‌ಮೆಂಟ್ ಬಳಿ ಎಸೆದದ್ದು ಹಾಗೂ ಆತನ ಮೊಬೈಲ್ ನಾಶಪಡಿಸಿದ ಸಂಪೂರ್ಣ ವಿವರವನ್ನು ನೀಡಲಾಗಿದೆ. ಈ ಸ್ಫೋಟಕ ಹೇಳಿಕೆಗಳು ಮುಂಬರುವ ದಿನಗಳಲ್ಲಿ ನಟ ದರ್ಶನ್ ಹಾಗೂ ಅವರ ತಂಡಕ್ಕೆ ತೀವ್ರ ಕಾನೂನು ಮುಳುವಾಗುವ ಸಾಧ್ಯತೆಯಿದೆ.
Darshan Case: ಸೋಮವಾರ ಸರೆಂಡರ್ ಮತ್ತು ಡೀಲ್ ಕಥೆ ರಿವೀಲ್?
ಬರುವ ಸೋಮವಾರದಿಂದ ಪ್ರದೋಷ್ ಮತ್ತೆ ಕೋರ್ಟ್ ಮುಂದೆ ತನ್ನ ಉಳಿದ ಮಾಫಿ ಸಾಕ್ಷಿ ಹೇಳಿಕೆಯನ್ನು ಮುಂದುವರಿಸಲಿದ್ದಾನೆ. ಪ್ರಕರಣದಲ್ಲಿ ಯಾರೆಲ್ಲ ಶರಣಾಗಬೇಕು ಹಾಗೂ ಶರಣಾಗುವ ಆರೋಪಿಗಳಿಗೆ ಎಷ್ಟೆಷ್ಟು ಹಣ ಕೊಡುವುದಾಗಿ ಒಪ್ಪಂದವಾಗಿತ್ತು ಎಂಬ ವಿವರ ಬಯಲಾಗಲಿದೆ. ಇದರ ಜೊತೆಗೆ ಸಾಕ್ಷ್ಯ ನಾಶಪಡಿಸಿದ ರಹಸ್ಯಗಳು ಕೋರ್ಟ್ ಮೆಟ್ಟಿಲೇರಲಿದ್ದು, ದರ್ಶನ್ ಅಂಡ್ ಗ್ಯಾಂಗ್ ಭವಿಷ್ಯ ಈಗ ಅನಿಶ್ಚಿತತೆಯಲ್ಲಿದೆ.
