ಕ್ರೇಜಿ ಸ್ಟಾರ್ ರವಿಚಂದ್ರನ್ ನಿರ್ದೇಶಿಸಿ, ನಿರ್ಮಿಸಿ ಹಾಗೂ ಅಭಿನಯಿಸಿದ್ದ ಕನಸಿನ ಕಾವ್ಯ ‘ಶಾಂತಿ ಕ್ರಾಂತಿ’ ಸಿನಿಮಾ ಮರು ಬಿಡುಗಡೆಯಾಗಬೇಕು ಎಂದು ಸ್ಯಾಂಡಲ್ವುಡ್ ಅಭಿಮಾನಿಗಳು ಸೋಶಿಯಲ್ ಮೀಡಿಯಾದಲ್ಲಿ ಭಾರಿ ಒತ್ತಾಯ ಮಾಡುತ್ತಿದ್ದಾರೆ.
ಕನ್ನಡ ಚಿತ್ರರಂಗದ ತಾಂತ್ರಿಕ ವಿಸ್ಮಯ ಎಂದೇ ಗುರುತಿಸಲ್ಪಡುವ ಈ ಬೃಹತ್ ಬಜೆಟ್ ಸಿನಿಮಾವನ್ನು ಮತ್ತೆ ದೊಡ್ಡ ತೆರೆಯ ಮೇಲೆ ಕಣ್ಣುಂಬಿಕೊಳ್ಳಲು ಸಿನಿರಸಿಕರು ಹಾಗೂ ರವಿಚಂದ್ರನ್ ಅವರ ಕಟ್ಟಾ ಅಭಿಮಾನಿಗಳು ಕಾತುರದಿಂದ ಕಾಯುತ್ತಿದ್ದಾರೆ.
ಆದರೆ ಈ ಸಾರ್ವಕಾಲಿಕ ಕ್ಲಾಸಿಕ್ ಚಿತ್ರವನ್ನು ಈಗಿನ ತಂತ್ರಜ್ಞಾನಕ್ಕೆ ತಕ್ಕಂತೆ ಥಿಯೇಟರ್ಗಳಿಗೆ ತರುವುದು ಅಷ್ಟು ಸುಲಭವಾಗಿಲ್ಲ. ಅಭಿಮಾನಿಗಳ ಈ ಅಭೂತಪೂರ್ವ ಬೇಡಿಕೆಗೆ ರವಿಚಂದ್ರನ್ ಅವರ ಸಹೋದರ ಬಾಲಾಜಿ ವೀಡಿಯೋ ಮೂಲಕ ಸ್ಪಷ್ಟನೆ ನೀಡಿದ್ದಾರೆ.
ಮೆಲ್ಟ್ ಆಗಿದೆ ‘ಶಾಂತಿ ಕ್ರಾಂತಿ’ ನೆಗೆಟಿವ್ ಹಾಗೂ ಹೊಸ ಸೋರ್ಸ್ಗಾಗಿ ಹುಡುಕಾಟ…
ಅಭಿಮಾನಿಗಳು ರವಿಚಂದ್ರನ್ ಹಾಗೂ ಅವರ ಕುಟುಂಬಕ್ಕೆ ತೋರಿಸುತ್ತಿರುವ ಪ್ರೀತಿಗೆ ಬಾಲಾಜಿ ಕೃತಜ್ಞತೆ ಸಲ್ಲಿಸಿದ್ದಾರೆ. ಅಭಿಮಾನಿಗಳ ಪ್ರೀತಿ ಕಂಡ ಎರಡೇ ದಿನಗಳಲ್ಲಿ ರವಿಚಂದ್ರನ್ ಮತ್ತು ಬಾಲಾಜಿ ಮರುಬಿಡುಗಡೆ ಬಗ್ಗೆ ಸುದೀರ್ಘ ಮಾತುಕತೆ ನಡೆಸಿದ್ದರು. ಆದರೆ ‘ಶಾಂತಿ ಕ್ರಾಂತಿ’ ಸಿನಿಮಾದ ಮೂಲ ನೆಗೆಟಿವ್ಸ್ ಸಂಪೂರ್ಣವಾಗಿ ಮೆಲ್ಟ್ (ಕರಗಿ) ಆಗಿ ಹಾಳಾಗಿದೆ ಎಂದು ತಿಳಿಸಿದ್ದಾರೆ. ಚಿತ್ರವನ್ನು ಇಂದಿನ ಡಿಜಿಟಲ್ ತಂತ್ರಜ್ಞಾನಕ್ಕೆ ತಂದು ಮರುಬಿಡುಗಡೆ ಮಾಡುವುದು ತಾಂತ್ರಿಕವಾಗಿ ಅತ್ಯಂತ ಕಷ್ಟಕರ ಸವಾಲಾಗಿದೆ. ಸದ್ಯಕ್ಕೆ ಬೇರೆ ಮೂಲಗಳಿಂದ ಚಿತ್ರದ ಪ್ರಿಂಟ್ ಪಡೆಯಲು ಪ್ರಯತ್ನಿಸುತ್ತಿದ್ದು, ಸೂಕ್ತ ಸೋರ್ಸ್ ಸಿಕ್ಕಿದರೆ ಮಾತ್ರ ರಿಲೀಸ್ ಸಾಧ್ಯ ಎಂದಿದ್ದಾರೆ.
ಮರುಬಿಡುಗಡೆಗೆ ಬೇಕು ಕನಿಷ್ಠ 1 ವರ್ಷ ಹಾಗೂ ತಾಂತ್ರಿಕ ಅಡೆತಡೆಗಳು…
ಒಂದು ವೇಳೆ ಸಿನಿಮಾದ ಗುಣಮಟ್ಟದ ಪ್ರಿಂಟ್ ಅಥವಾ ಸೋರ್ಸ್ ಸಿಕ್ಕಿದರೂ ಸಹ ನಾಳೆಯಿಂದಲೇ ಕೆಲಸ ಆರಂಭಿಸಲು ಸಾಧ್ಯವಿಲ್ಲ. ಚಿತ್ರವನ್ನು ಥಿಯೇಟರ್ಗೆ ತರಲು ಕನಿಷ್ಠ 8 ತಿಂಗಳಿಂದ 1 ವರ್ಷ ಅಥವಾ ಅದಕ್ಕಿಂತ ಹೆಚ್ಚಿನ ಸಮಯ ಬೇಕಾಗುತ್ತದೆ. ಸಿನಿಮಾಗೆ ಮತ್ತೆ ಕಲರಿಂಗ್, ಡಿಐ, ಸೌಂಡ್ ಎಫೆಕ್ಟ್ಸ್ ಹಾಗೂ ರೀ-ರೆಕಾರ್ಡಿಂಗ್ಗಳನ್ನು ಹೊಸದಾಗಿ ಮಾಡಿಸಬೇಕಾದ ಅಗತ್ಯವಿದೆ. ಅಲ್ಲದೆ ಇಂದಿನ ಟ್ರೆಂಡ್ಗೆ ತಕ್ಕಂತೆ ಡಾಲ್ಬಿ ಅಟ್ಮಾಸ್ ಹಾಗೂ ಡಿಟಿಎಸ್ ಸೌಂಡ್ ಸಿಸ್ಟಮ್ಗೆ ಆಡಿಯೋ ಅಪ್ಗ್ರೇಡ್ ಮಾಡಬೇಕಾಗಿದೆ. ರವಿಚಂದ್ರನ್ ಅವರು ಅಂದಿನ ಕಾಲದಲ್ಲೇ ಅದ್ಭುತ ಗುಣಮಟ್ಟದಲ್ಲಿ ಸಿನಿಮಾ ನೀಡಿದ್ದರಿಂದ, ಇಂದಿಗೂ ಅದೇ ಕ್ವಾಲಿಟಿ ಕಾಯ್ದುಕೊಳ್ಳುವುದು ಮುಖ್ಯವಾಗಿದೆ.
ಸೆಪ್ಟೆಂಬರ್ ಅಥವಾ ಅಕ್ಟೋಬರ್ನಲ್ಲಿ ಸಿನಿಮಾ ರಿಲೀಸ್ ಸುದ್ದಿ ಸಂಪೂರ್ಣ ಸುಳ್ಳು…
ಮರುಬಿಡುಗಡೆ ವಿಚಾರ ಹೊರಬೀಳುತ್ತಿದ್ದಂತೆ ಸೆಪ್ಟೆಂಬರ್ ಅಥವಾ ಅಕ್ಟೋಬರ್ ತಿಂಗಳಲ್ಲಿ ಸಿನಿಮಾ ಬಿಡುಗಡೆಯಾಗಲಿದೆ ಎಂದು ಸುದ್ದಿ ಹಬ್ಬಿತ್ತು. ಆದರೆ ಈ ಎಲ್ಲಾ ವದಂತಿಗಳನ್ನು ಬಾಲಾಜಿ ಸಂಪೂರ್ಣವಾಗಿ ತಳ್ಳಿಹಾಕಿದ್ದು, ಪ್ರಸ್ತುತ ರಿಲೀಸ್ ಮಾಡುವುದು ಸಾಧ್ಯವೇ ಇಲ್ಲ ಎಂದಿದ್ದಾರೆ. ಮಾಧ್ಯಮಗಳು, ಅಭಿಮಾನಿಗಳು ಹಾಗೂ ಸ್ನೇಹಿತರು ಸತತವಾಗಿ ಕರೆ ಮಾಡಿ ವಿಚಾರಿಸುತ್ತಿದ್ದ ಕಾರಣ ಈ ವೀಡಿಯೋ ಸ್ಪಷ್ಟನೆ ನೀಡಿದ್ದಾರೆ. ಸಿನಿಮಾ ಪ್ರಿಂಟ್ ಸಿಕ್ಕ ತಕ್ಷಣವೇ ಅಧಿಕೃತವಾಗಿ ಮಾಧ್ಯಮಗಳ ಮುಂದೆ ಬಂದು ಮರುಬಿಡುಗಡೆಯ ಕೆಲಸಕ್ಕೆ ಓಂಕಾರ ಹಾಕುವುದಾಗಿ ಹೇಳಿದ್ದಾರೆ. ಅಲ್ಲಿಯವರೆಗೆ ಅಭಿಮಾನಿಗಳು ತಾಳ್ಮೆಯಿಂದ ಸಹಕರಿಸಬೇಕು ಎಂದು ರವಿಚಂದ್ರನ್ ಕುಟುಂಬ ಮನವಿ ಮಾಡಿಕೊಂಡಿದೆ.
