Photo Credits: @pancharangifilms (Instagram)
ಸ್ಯಾಂಡಲ್ವುಡ್ನ ಪ್ರತಿಭಾವಂತ ನಟ ಶ್ರೀನಗರ ಕಿಟ್ಟಿ ಹಾಗೂ ನಟಿ ಮೇಘನಾ ರಾಜ್ ಕಾಂಬಿನೇಷನ್ನಲ್ಲಿ ಮೂಡಿಬರುತ್ತಿರುವ ಬಹುನಿರೀಕ್ಷಿತ ‘ಅಮರ್ಥ’ ಸಿನಿಮಾದ ಬಿಡುಗಡೆ ದಿನಾಂಕ ಅಧಿಕೃತವಾಗಿ ಘೋಷಣೆಯಾಗಿದೆ.
ಪಂಚರಂಗಿ ಫಿಲ್ಮ್ಸ್ ಬ್ಯಾನರ್ ಅಡಿಯಲ್ಲಿ ಡಾ. ಕನ್ಯಾನ ಸದಾಶಿವ ಶೆಟ್ಟಿ ಹಾಗೂ ಗುರು ಹೆಗಡೆ ಈ ಚಿತ್ರವನ್ನು ನಿರ್ಮಿಸಿದ್ದಾರೆ. ಗುರು ಹೆಗಡೆ ಮತ್ತು ವಿನಯ್ ಪ್ರೀತಮ್ ಜಂಟಿಯಾಗಿ ಈ ಚಿತ್ರಕ್ಕೆ ನಿರ್ದೇಶನ ಮಾಡಿದ್ದಾರೆ.
ಪ್ರೇಕ್ಷಕರಲ್ಲಿ ಸಖತ್ ಕುತೂಹಲ ಮೂಡಿಸಿರುವ ಈ ಚಿತ್ರಕ್ಕೆ ಸೆನ್ಸಾರ್ ಮಂಡಳಿಯಿಂದ ‘ಯು/ಎ’ (U/A) ಪ್ರಮಾಣಪತ್ರ ಸಿಕ್ಕಿದೆ. ಮುಂಬರುವ ಸೆಪ್ಟೆಂಬರ್ 18 ರಂದು ಈ ಸಿನಿಮಾ ರಾಜ್ಯಾದ್ಯಂತ ಅದ್ಧೂರಿಯಾಗಿ ತೆರೆಕಾಣಲಿದೆ.
‘ಅಮರ್ಥ’ ಎಂದರೆ ಏನು? ಶೀರ್ಷಿಕೆಯ ರಹಸ್ಯ ಬಿಚ್ಚಿಟ್ಟ ನಿರ್ದೇಶಕರು…
ಚಿತ್ರದ ಶೀರ್ಷಿಕೆ ‘ಅಮರ್ಥ’ ಕುರಿತು ಕಥೆಗಾರ ಹಾಗೂ ನಿರ್ಮಾಪಕ ಗುರು ಹೆಗಡೆ ಆಸಕ್ತಿಕರ ವಿಷಯ ಹಂಚಿಕೊಂಡಿದ್ದಾರೆ. ‘ಅಮರ್ಥ’ ಎಂದರೆ ಮಾನವನ ಸಾಮಾನ್ಯ ತಿಳುವಳಿಕೆಗೆ ನಿಲುಕದ ಒಂದು ಅದೃಶ್ಯ ಪವರ್ಫುಲ್ ಶಕ್ತಿಯಾಗಿದೆ. ನಾವು ಪ್ರತಿಯೊಂದಕ್ಕೂ ಹಣೆಬರಹ ಅಥವಾ ದೈವಬಲ ಎಂದು ಕಾರಣ ಕೊಡುತ್ತೇವೆ. ಆದರೆ ಅದಕ್ಕೂ ಮೀರಿದ ಒಂದು ಅದ್ಭುತ ಶಕ್ತಿಯನ್ನು ಈ ಚಿತ್ರ ಪ್ರತಿನಿಧಿಸುತ್ತದೆ ಎಂದು ವಿವರಣೆ ನೀಡಿದ್ದಾರೆ. ಸಹ ನಿರ್ದೇಶಕ ವಿನಯ್ ಪ್ರೀತಂ ಪ್ರಕಾರ ಇದು ಅತ್ಯಂತ ಅಸಾಮಾನ್ಯವಾದ ಕಥಾಹಂದರ ಹೊಂದಿರುವ ಚಿತ್ರವಾಗಿದೆ. ದಕ್ಷಿಣ ಕನ್ನಡ, ಚಿಕ್ಕಮಗಳೂರು, ಮಂಗಳೂರು ಹಾಗೂ ಬೆಂಗಳೂರಿನ ಸುಂದರ ತಾಣಗಳಲ್ಲಿ 48 ದಿನಗಳ ಕಾಲ ಚಿತ್ರೀಕರಣ ನಡೆಸಲಾಗಿದೆ.
‘ಬಹುಪರಾಕ್’ ಬಳಿಕ ಮತ್ತೆ ಒಂದಾದ ಸೂಪರ್ ಹಿಟ್ ಜೋಡಿ…
‘ಬಹುಪರಾಕ್’ ಹಾಗೂ ‘ಬುದ್ಧಿವಂತ 2’ ಚಿತ್ರಗಳ ಯಶಸ್ಸಿನ ನಂತರ ಶ್ರೀನಗರ ಕಿಟ್ಟಿ ಮತ್ತು ಮೇಘನಾ ರಾಜ್ ಮತ್ತೆ ಒಂದಾಗಿದ್ದಾರೆ. ಇದು ಈ ಜೋಡಿಯ ಅಭಿನಯದ ಮೂರನೇ ಸಿನಿಮಾ ಆಗಿದ್ದು, ತೆರೆಮೇಲೆ ಹೊಸ ಮ್ಯಾಜಿಕ್ ಮಾಡಲು ಸಿದ್ಧವಾಗಿದೆ. ಚಿತ್ರದಲ್ಲಿ ಒಬ್ಬ ಹುಡುಗನ ಬಾಲ್ಯದ ದಿನಗಳಿಂದ ಆರಂಭವಾಗಿ ಸ್ನೇಹವು ಹೇಗೆ ಬೆಳೆಯುತ್ತದೆ ಎಂದು ತೋರಿಸಲಾಗಿದೆ. ಚಿತ್ರದಲ್ಲಿ ಶ್ರೀನಗರ ಕಿಟ್ಟಿ, ಮೇಘನಾ ರಾಜ್ ಜೊತೆಗೆ ಕೃತಿ ಶೆಟ್ಟಿ, ಉಷಾ ಭಂಡಾರಿ ಹಾಗೂ ಮಂಜು ಭಾಷಿಣಿ ಮುಖ್ಯ ಪಾತ್ರಗಳಲ್ಲಿದ್ದಾರೆ. ಗುರುಪ್ರಶಾಂತ್ ರೈ ಅವರ ಕ್ಯಾಮೆರಾ ಕೈಚಳಕ ಹಾಗೂ ಶಿನೋಯ್ ವಿ ಜೋಸೆಫ್-ಪಂಚಮ್ ಜೀವ ಅವರ ಸಂಗೀತ ಚಿತ್ರಕ್ಕಿದೆ. ಹಿನ್ನೆಲೆ ಸಂಗೀತವನ್ನು ಶ್ರೀಧರ್ ವಿ ಸಂಭ್ರಮ್, ಬಲರಾಮ್ ಮತ್ತು ರಾಕೇಶ್ ಆಚಾರ್ ಅದ್ಭುತವಾಗಿ ಸಂಯೋಜಿಸಿದ್ದಾರೆ.
ಶಾಲಾ ಗೆಳೆಯರ ಕಥೆ: ‘ಲಕ್ಷ್ಮಿ’ ಪಾತ್ರದಲ್ಲಿ ಕಮಾಲ್ ಮಾಡಲಿರುವ ಮೇಘನಾ…
ಚಿತ್ರದಲ್ಲಿ ‘ಲಕ್ಷ್ಮಿ’ ಎಂಬ ವಿಶಿಷ್ಟ ಪಾತ್ರದಲ್ಲಿ ಮೇಘನಾ ರಾಜ್ ಬಣ್ಣ ಹಚ್ಚಿದ್ದಾರೆ. ಶಾಲಾ ದಿನಗಳ ಆತ್ಮೀಯ ಸ್ನೇಹಿತರ ಬಳಗ ಬೇರ್ಪಟ್ಟ ಬಳಿಕ ಅವರ ಜೀವನದಲ್ಲಿ ಏನೆಲ್ಲಾ ಬದಲಾವಣೆಗಳಾಗುತ್ತವೆ ಎಂಬುದು ಈ ಚಿತ್ರದ ಕಥೆ. ಲಕ್ಷ್ಮಿ ಜೀವನದಲ್ಲಿ ಬರುವ ಸಾಲು ಸಾಲು ಏಳುಬೀಳುಗಳ ನಡುವೆ ಕಿಟ್ಟಿ ಪಾತ್ರವು ಹೇಗೆ ಬೆನ್ನೆಲುಬಾಗಿ ನಿಲ್ಲುತ್ತದೆ ಎಂಬುದು ಕಥೆಯ ಮುಖ್ಯ ಸಾರಾಂಶ. ಒಂದು ಸುಂದರ ಭಾವನಾತ್ಮಕ ಹಾಗೂ ಸ್ನೇಹದ ಕಥೆಯನ್ನು ಪ್ರೇಕ್ಷಕರಿಗೆ ತಲುಪಿಸಲು ಚಿತ್ರತಂಡ ಸಿದ್ಧವಾಗಿದೆ. ಶ್ರೀನಗರ ಕಿಟ್ಟಿ ಅವರ ಅಭಿನಯ ಹಾಗೂ ಮೇಘನಾ ರಾಜ್ ಅವರ ಎಮೋಷನಲ್ ಆಕ್ಟಿಂಗ್ ಸಿನಿಮಾದ ಪ್ಲಸ್ ಪಾಯಿಂಟ್. ಸೆಪ್ಟೆಂಬರ್ 18ಕ್ಕೆ ಚಿತ್ರಮಂದಿರಗಳಲ್ಲಿ ಈ ದೃಶ್ಯಕಾವ್ಯವನ್ನು ಕಣ್ತುಂಬಿಕೊಳ್ಳಲು ಸಿನಿರಸಿಕರು ಕಾಯುತ್ತಿದ್ದಾರೆ.
