ನವದೆಹಲಿ : ಪ್ರಧಾನಿ ನರೇಂದ್ರ ಮೋದಿ (PM Modi) ಅವರು ತಮ್ಮ ಇನ್ಸ್ಟಾಗ್ರಾಮ್ ಪುಟದಲ್ಲಿ ಕರ್ನಾಟಕದ ಇಂಧನ ಕ್ಷೇತ್ರಕ್ಕೆ ಸಂಬಂಧಿಸಿದ ಎರಡು ಮಹತ್ವದ ಯೋಜನೆಗಳ ಬಗ್ಗೆ ಮಾಹಿತಿ ಹಂಚಿಕೊಂಡಿದ್ದು, ಆ ಪೋಸ್ಟ್ ಈಗ ಸಾಮಾಜಿಕ ಜಾಲತಾಣದಲ್ಲಿ ದೊಡ್ಡ ಮಟ್ಟದಲ್ಲಿ ಗಮನ ಸೆಳೆದಿದೆ. ಮಂಗಳೂರಿನಲ್ಲಿ ಹೊಸ ಭೂಗತ ಎಲ್ಪಿಜಿ ಶೇಖರಣಾ ಘಟಕ ನಿರ್ಮಾಣವಾಗುತ್ತಿದ್ದು, ಬೆಂಗಳೂರಿನ ದೇವನಗೊಂತಿಯಲ್ಲಿ ಹೊಸ ಮಾರುಕಟ್ಟೆ ಟರ್ಮಿನಲ್ ನಿರ್ಮಾಣವಾಗುತ್ತಿದೆ ಎಂದು ಪ್ರಧಾನಿ ತಿಳಿಸಿದ್ದಾರೆ. ಈ ಎರಡೂ ಯೋಜನೆಗಳು ರಾಜ್ಯದ ಅಭಿವೃದ್ಧಿಗೆ ಹೊಸ ಮೈಲಿಗಲ್ಲು ಆಗಲಿವೆ ಎಂದು ಅವರು ಬಣ್ಣಿಸಿದ್ದಾರೆ.
ಟಗರು ಚಿತ್ರದ ಹಾಡಿಗೆ ಕನ್ನಡಿಗರ ಮೆಚ್ಚುಗೆ !
ಈ ಪೋಸ್ಟ್ಗೆ ಪ್ರಧಾನಿ ಬಳಸಿರುವ ಹಿನ್ನೆಲೆ ಸಂಗೀತವೇ ಈಗ ಹೆಚ್ಚು ಚರ್ಚೆಗೆ ಕಾರಣವಾಗಿದೆ. ಶಿವರಾಜ್ ಕುಮಾರ್ ಅಭಿನಯದ ಟಗರು ಚಿತ್ರದ ಹಾಡನ್ನು ಅವರು ಈ ವಿಡಿಯೋಗೆ ಆಯ್ಕೆ ಮಾಡಿಕೊಂಡಿದ್ದಾರೆ. ಇದರಿಂದ ಕನ್ನಡಿಗರು ಅಚ್ಚರಿ ಹಾಗೂ ಸಂತಸ ವ್ಯಕ್ತಪಡಿಸಿದ್ದು, ಕೆಲವೇ ಗಂಟೆಗಳಲ್ಲಿ ಪೋಸ್ಟ್ಗೆ ಲಕ್ಷಾಂತರ ಲೈಕ್ಗಳು ಮತ್ತು ಕಾಮೆಂಟ್ಗಳು ಹರಿದುಬಂದಿವೆ. ಅನೇಕರು ಪ್ರಧಾನಿ ಅವರ ಹಾಡಿನ ಆಯ್ಕೆಯನ್ನು ಮೆಚ್ಚಿಕೊಂಡಿದ್ದು, ಯೋಜನೆಗಳ ಬಗ್ಗೆಯೂ ಕನ್ನಡಿಗರು ಸೇರಿದಂತೆ ದೇಶದ ಜನತೆ ಹರ್ಷ ವ್ಯಕ್ತಪಡಿಸಿದ್ದಾರೆ. ಕಮೆಂಟ್ ವಿಭಾಗದಲ್ಲಿ ಕನ್ನಡಿಗರೇ ಹೆಚ್ಚು ಸಕ್ರಿಯರಾಗಿದ್ದು, ತಮ್ಮ ಭಾಷೆ ಮತ್ತು ಸಿನಿಮಾ ಬಗ್ಗೆ ಹೆಮ್ಮೆ ವ್ಯಕ್ತಪಡಿಸಿದ್ದಾರೆ.
ಇದನ್ನೂ ಓದಿ : ಜೆಡಿಎಸ್ ಮುಗಿಸಲು ಹೊರಟಿದ್ದು ಯಾರು? ಡಿಕೆಶಿಗೆ ಕುಮಾರಸ್ವಾಮಿ ಪ್ರಶ್ನೆ !
ದೇಶದ ಪ್ರಧಾನಿ ತಮ್ಮ ಸರ್ಕಾರಿ ಯೋಜನೆಯ ಪೋಸ್ಟ್ಗೆ ಸ್ಥಳೀಯ ಭಾಷೆಯ ಜನಪ್ರಿಯ ಸಿನಿಮಾ ಹಾಡನ್ನು ಬಳಸುವುದು ಕೇವಲ ಸಂಗೀತದ ಆಯ್ಕೆಯಾಗಿ ಉಳಿಯುವುದಿಲ್ಲ. ಅದು ಆ ರಾಜ್ಯದ ಜನರ ಭಾವನೆಗೆ ಹತ್ತಿರವಾಗುವ ಪ್ರಯತ್ನವಾಗಿಯೂ ಕಾಣಿಸುತ್ತದೆ. ಕರ್ನಾಟಕದಲ್ಲಿ ಕನ್ನಡ ಭಾಷೆ, ಸಿನಿಮಾ ಮತ್ತು ಸಾಂಸ್ಕೃತಿಕ ಗುರುತಿನ ಬಗ್ಗೆ ಜನರಲ್ಲಿ ವಿಶೇಷ ಅಭಿಮಾನವಿದೆ. ಅಂತಹ ಸಂದರ್ಭದಲ್ಲಿ ಟಗರು ರೀತಿಯ ಮಾಸ್ ಹಾಡನ್ನು ಬಳಸಿದಾಗ ಜನರು ಅದನ್ನು ತಮ್ಮದೇ ಸಂಭ್ರಮದಂತೆ ಸ್ವೀಕರಿಸುತ್ತಾರೆ. ಇದರಿಂದ ಯೋಜನೆಯ ಸಂದೇಶ ಹೆಚ್ಚು ಜನರನ್ನು ತಲುಪುತ್ತದೆ. ಅದೇ ವೇಳೆ, ಇದನ್ನು ರಾಜಕೀಯ ಲೆಕ್ಕಾಚಾರದಿಂದ ನೋಡುವವರೂ ಇದ್ದಾರೆ. ಚುನಾವಣೆ ಹತ್ತಿರ ಬರುತ್ತಿರುವಾಗ ಇಂತಹ ಪ್ರಯೋಗಗಳು ಜನರ ಮನಸ್ಸು ಗೆಲ್ಲುವ ತಂತ್ರವಾಗಿಯೂ ಕಾಣಬಹುದು. ಆದರೆ ಯಾವ ಉದ್ದೇಶವೇ ಇರಲಿ, ಕನ್ನಡದ ಹಾಡು ರಾಷ್ಟ್ರಮಟ್ಟದ ವೇದಿಕೆಯಲ್ಲಿ ಕೇಳಿಬಂದಿರುವುದು ಕನ್ನಡಿಗರಿಗೆ ಹೆಮ್ಮೆ ಜೊತೆಗೆ ಖುಷಿಯ ವಿಷಯವಾಗಿದೆ.




