☔ Weather
Bengaluru: ☀️ 24°C | AQI 113
Mysore: ☀️ 22°C | AQI 110
Mangalore: ☀️ 27°C | AQI 172
Bengaluru: ☀️ 24°C | AQI 113
☔ Weather
Bengaluru: ☀️ 24°C | AQI 113
Mysore: ☀️ 22°C | AQI 110
Mangalore: ☀️ 27°C | AQI 172
Bengaluru: ☀️ 24°C | AQI 113

HD KUMARASWAMY: ಸಿಂಹ-ನಾಯಿ ಪೋಸ್ಟ್ ಮೂಲಕ ಲತಾಕುಮಾರಿ ತಿರುಗೇಟು : ಡಿಸಿ ವರ್ಸಸ್ ಹೆಚ್ .ಡಿ.ಕೆ ವಾಕ್ಸಮರ

Image of HD Kumaraswamy
ಎಚ್‌ಡಿ ಕುಮಾರಸ್ವಾಮಿ (HD Kumaraswamy) ಆರೋಪಕ್ಕೆ ಹಾಸನ ಜಿಲ್ಲಾಧಿಕಾರಿ ಕೆ.ಎಸ್. ಲತಾಕುಮಾರಿ ತಿರುಗೇಟು ನೀಡಿರುವ ಪ್ರಸಂಗ ಹೊಸ ಚರ್ಚೆ

ಮುಖ್ಯಾಂಶಗಳು

  • DC & ಸೆಂಟ್ರಲ್ ಮಿನಿಸ್ಟರ್ ಸಮರ
  • ಹೆಚ್.ಡಿ.ಕೆ ಗೆ ಲತಾ ಕುಮಾರಿ ತಿರುಗೇಟು

ಹಾಸನ : ಎಚ್‌ಡಿ ಕುಮಾರಸ್ವಾಮಿ (HD Kumaraswamy) ಅವರ ಲಂಚದ ಆರೋಪಕ್ಕೆ ಹಾಸನ ಜಿಲ್ಲಾಧಿಕಾರಿ ಕೆ.ಎಸ್. ಲತಾಕುಮಾರಿ ತಿರುಗೇಟು ನೀಡಿರುವ ಪ್ರಸಂಗ ಈಗ ಹೊಸ ಚರ್ಚೆಗೆ ಕಾರಣವಾಗಿದೆ. ಹಾಸನದಲ್ಲಿ ಶಾಸಕ ಹೆಚ್.ಪಿ. ಸ್ವರೂಪ್ ಪ್ರಕಾಶ್ ಅವರ ಮನೆಯಲ್ಲಿ ನಡೆಸಿದ ಸುದ್ದಿಗೋಷ್ಠಿಯಲ್ಲಿ ಕುಮಾರಸ್ವಾಮಿ ಅವರು ಡಿಸಿ ಲತಾಕುಮಾರಿ ಮತ್ತು ಜಿಲ್ಲಾ ಉಸ್ತುವಾರಿ ಸಚಿವ ಶಿವಲಿಂಗೇಗೌಡ ಅವರ ವಿರುದ್ಧ ಗಂಭೀರ ಲಂಚದ ಆರೋಪ ಮಾಡಿದ್ದರು. ಆ ವೇಳೆ ಡಿಸಿ ಅವರ ಪಿಎ ಶಶಿಕಿರಣ್ ಅವರದ್ದು ಎನ್ನಲಾದ ವಾಟ್ಸಾಪ್ ಚಾಟ್‌ಗಳ ಪಿಡಿಎಫ್ ಪ್ರತಿಯನ್ನು ಮಾಧ್ಯಮಗಳ ಎದುರು ಬಿಡುಗಡೆ ಮಾಡಿದ್ದರು. ಇದಕ್ಕೆ ಖಡಕ್ ಆಗಿ ಪ್ರತಿಕ್ರಿಯಿಸಿದ್ದ ಲತಾಕುಮಾರಿ ಅವರು ಅಧಿಕಾರ ಸ್ವೀಕರಿಸಿದ ಮೊದಲ ದಿನದಿಂದಲೂ ತಮ್ಮನ್ನೇ ಗುರಿಯಾಗಿಸಲಾಗುತ್ತಿದೆ ಎಂದು ಹೇಳಿದ್ದರು. ಬೆದರಿಕೆ ಮತ್ತು ಸುಳ್ಳು ಆರೋಪಗಳಿಗೆ ತಾವು ಹೆದರುವುದಿಲ್ಲ, ಇಂತಹ ಸಂದರ್ಭಗಳನ್ನು ಎದುರಿಸಲೆಂದೇ ತರಬೇತಿ ಪಡೆದು ಕರ್ತವ್ಯಕ್ಕೆ ಬಂದಿದ್ದೇವೆ ಎಂದು ಸ್ಪಷ್ಟಪಡಿಸಿದ್ದರು. ಕುಮಾರಸ್ವಾಮಿ ಅವರ ಆರೋಪ ಸಂಪೂರ್ಣ ಸುಳ್ಳು, ಮಹಿಳೆಯರ ತೇಜೋವಧೆ ಮಾಡುವ ಯತ್ನ ನಡೆಯುತ್ತಿದೆ, ಜನರು ಇದನ್ನು ನಂಬಬಾರದು ಎಂದು ಮನವಿ ಮಾಡಿದ್ದರು.

ಸಿಂಹ ಮತ್ತು ನಾಯಿಯ ಕಥೆ ..!

ಆ ಬಳಿಕ ಲತಾಕುಮಾರಿ ಅವರು ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ಸಿಂಹ ಶಾಂತವಾಗಿ ಕುಳಿತಿದ್ದು, ಸುತ್ತಲೂ ನಾಯಿಗಳು ಬೊಗಳುತ್ತಿರುವ ಚಿತ್ರವೊಂದನ್ನು ಹಂಚಿಕೊಂಡಿದ್ದಾರೆ. ಅದರ ಮೇಲೆ ಪ್ರತಿಯೊಂದು ಧ್ವನಿಯೂ ಪ್ರತಿಕ್ರಿಯೆಗೆ ಅರ್ಹವಲ್ಲ ಎಂಬ ಸಂದೇಶ ಬರೆಯಲಾಗಿತ್ತು. ಈ ವಾಟ್ಸಾಪ್ ಸ್ಟೇಟಸ್ ಮತ್ತು ಪೋಸ್ಟ್ ಸದ್ಯ ಸಾಮಾಜಿಕ ಜಾಲತಾಣದಲ್ಲಿ ಭಾರಿ ವೈರಲ್ ಆಗಿದ್ದು, ಪರ ಮತ್ತು ವಿರೋಧದ ಚರ್ಚೆಗಳು ಶುರುವಾಗಿವೆ. ಈ ಪೋಸ್ಟ್ ಕುರಿತು ಕುಮಾರಸ್ವಾಮಿ ಅವರಿಂದ ಇದುವರೆಗೆ ಯಾವುದೇ ಪ್ರತಿಕ್ರಿಯೆ ಬಂದಿಲ್ಲ. ಇನ್ನೊಂದೆಡೆ ತಮ್ಮ ವಿರುದ್ಧದ ಸುಳ್ಳು ಆರೋಪಗಳ ಬಗ್ಗೆ ಸೈಬರ್ ಕ್ರೈಂ ವಿಭಾಗಕ್ಕೆ ದೂರು ನೀಡಿ ಎಫ್‌ಐಆರ್ ದಾಖಲಿಸಿರುವುದಾಗಿ ಡಿಸಿ ತಿಳಿಸಿದ್ದಾರೆ. ಹಿರಿಯ ನಾಯಕರು ಆಧಾರರಹಿತ ಆರೋಪ ಮಾಡುತ್ತಿರುವುದರ ವಿರುದ್ಧ ಕ್ರಮಕ್ಕೆ ಮುಖ್ಯ ಕಾರ್ಯದರ್ಶಿಗಳಿಗೆ ಪತ್ರ ಬರೆಯುವುದಾಗಿ ಹೇಳಿದ್ದು, ವಾಟ್ಸಾಪ್ ಚಾಟ್ ಪಿಡಿಎಫ್ ಬಿಡುಗಡೆ ಮಾಡಿದವರ ವಿರುದ್ಧವೂ ಕಾನೂನು ಕ್ರಮದ ಎಚ್ಚರಿಕೆ ನೀಡಿದ್ದಾರೆ.

ಇದನ್ನೂ ಓದಿ : ದೀಪಾವಳಿ ಖುಷಿಯೋಂ ಕಾ ಈದ್ ಎಂದ ಖರ್ಗೆ, ಸನಾತನ ವಿರೋಧಿ ಎಂದ ಬಿಜೆಪಿ

ಈ ಬೆಳವಣಿಗೆ ಕೇವಲ ಇಬ್ಬರು ಪ್ರಮುಖ ವ್ಯಕ್ತಿಗಳ ನಡುವಿನ ಮಾತಿನ ಚಕಮಕಿಯಾಗಿ ಉಳಿದಿಲ್ಲ, ಆಡಳಿತ ಮತ್ತು ರಾಜಕೀಯದ ನಡುವಿನ ಸಂಘರ್ಷದ ಪ್ರತಿಬಿಂಬದಂತಾಗಿದೆ. ಒಬ್ಬ ಜಿಲ್ಲಾಧಿಕಾರಿ ಬಹಿರಂಗವಾಗಿ ಆರೋಪವನ್ನು ನಿರಾಕರಿಸಿ, ಸೈಬರ್ ದೂರು ಮತ್ತು ಮುಖ್ಯ ಕಾರ್ಯದರ್ಶಿಗಳಿಗೆ ಪತ್ರದ ಮೊರೆ ಹೋಗಿರುವುದು ಈ ವಿವಾದ ಎಷ್ಟು ಗಂಭೀರ ಹಂತ ತಲುಪಿದೆ ಎಂಬುದನ್ನು ತೋರಿಸುತ್ತದೆ. ಮತ್ತೊಂದೆಡೆ ಕೇಂದ್ರ ಸಚಿವರಂತಹ ಹಿರಿಯ ನಾಯಕರು ದಾಖಲೆ ಎನ್ನುವ ಚಾಟ್ ಬಿಡುಗಡೆ ಮಾಡಿ ಆರೋಪ ಮಾಡಿರುವುದರಿಂದ ಜನರಲ್ಲಿ ಗೊಂದಲ ಹೆಚ್ಚಾಗಿದೆ. ಡಿಸಿ ಅವರ ಸಿಂಹ-ನಾಯಿ ಪೋಸ್ಟ್ ನೇರವಾಗಿ ಹೆಸರು ಹೇಳದೆ ನೀಡಿದ ಪರೋಕ್ಷ ಉತ್ತರವಾಗಿದ್ದರೂ, ಅದರ ಅರ್ಥವನ್ನು ಎಲ್ಲರೂ ರಾಜಕೀಯವಾಗಿಯೇ ಓದಿಕೊಳ್ಳುತ್ತಿದ್ದಾರೆ. ಇದು ಅಧಿಕಾರಿಗಳ ಮನೋಸ್ಥೈರ್ಯ, ಮಹಿಳಾ ಅಧಿಕಾರಿಗಳ ಮೇಲಿನ ಟೀಕೆಗಳ ಸ್ವರೂಪ ಮತ್ತು ಸಾಮಾಜಿಕ ಜಾಲತಾಣವನ್ನು ಪ್ರತಿಕ್ರಿಯೆಯ ವೇದಿಕೆಯಾಗಿ ಬಳಸುವ ಹೊಸ ಪ್ರವೃತ್ತಿಯ ಬಗ್ಗೆ ದೊಡ್ಡ ಚರ್ಚೆಯನ್ನು ಹುಟ್ಟುಹಾಕಿದೆ. ಆರೋಪ ಸತ್ಯವೋ ಸುಳ್ಳೋ ಎಂಬುದು ತನಿಖೆಯಿಂದಲೇ ಸ್ಪಷ್ಟವಾಗಬೇಕಿದ್ದು, ಅಲ್ಲಿಯವರೆಗೆ ಈ ವಾಕ್ಸಮರ ಹಾಸನದ ರಾಜಕೀಯ ವಾತಾವರಣವನ್ನು ಬಿಸಿಯಾಗಿರಿಸಲಿದೆ.