ತುಮಕೂರು : ಜಿಲ್ಲೆಯ ತುರುವೇಕೆರೆ ತಾಲೂಕಿನ ಕೋಳಘಟ್ಟ ಗ್ರಾಮದಲ್ಲಿ ನಡೆದ ಸುವರ್ಣ ಮಹೋತ್ಸವ ಕಾರ್ಯಕ್ರಮದಲ್ಲಿ ಮಾತನಾಡಿದ ಮಾಜಿ ಸಚಿವ ಹಾಗೂ ಹಾಲಿ ಶಾಸಕ ಕೆ.ಎನ್. ರಾಜಣ್ಣ (KN Rajanna) ಅವರು ತಮ್ಮ ರಾಜಕೀಯ ನಡೆಯ ಬಗ್ಗೆ ಕುತೂಹಲ ಕೆರಳಿಸುವ ಹೇಳಿಕೆ ನೀಡಿದ್ದಾರೆ. ಸದ್ಯಕ್ಕೆ ತಾವು ಯಾವುದೇ ಪಕ್ಷಕ್ಕೂ ಹೋಗುವುದಿಲ್ಲ, ಕಾಂಗ್ರೆಸ್ನಲ್ಲೇ ಮುಂದುವರಿಯುತ್ತೇನೆ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ. ಮುಂಬರುವ ಕ್ಷೇತ್ರ ಪುನರ್ವಿಂಗಡಣೆ ಅಂದರೆ ಡಿಲಿಮಿಟೇಷನ್ ಪ್ರಕ್ರಿಯೆ ಪೂರ್ಣಗೊಂಡ ನಂತರವಷ್ಟೇ ತಮ್ಮ ಮುಂದಿನ ಹೆಜ್ಜೆ ಬಗ್ಗೆ ತೀರ್ಮಾನ ತೆಗೆದುಕೊಳ್ಳುವುದಾಗಿ ಅವರು ಪ್ರಕಟಿಸಿದ್ದಾರೆ. ಈ ಹೇಳಿಕೆ ಮೂಲಕ ಸದ್ಯದ ಎಲ್ಲ ಊಹಾಪೋಹಗಳಿಗೆ ತಾತ್ಕಾಲಿಕ ತೆರೆ ಎಳೆದಂತಾಗಿದೆ.
ಒಂದು ವರ್ಷ ಕಾಲಾವಕಾಶವಿದೆ ..!
ಈ ವೇದಿಕೆಯಲ್ಲಿ ಮಾತನಾಡಿದ ರಾಜಣ್ಣ ಅವರು ವಿಶ್ವನಾಥ್ ಅವರ ಮಾತನ್ನು ನೆನಪಿಸಿಕೊಂಡರು. ಪಕ್ಷ ಬಿಟ್ಟು ಹೋದರೆ ನಷ್ಟ, ಬಂದು ಸೇರಿದರೆ ಲಾಭ ಎಂಬ ಮಾತನ್ನು ಉಲ್ಲೇಖಿಸಿದ ಅವರು, ಪಕ್ಷ ಬಿಡುವುದಕ್ಕೂ ಅಥವಾ ಬೇರೆ ಪಕ್ಷ ಸೇರುವುದಕ್ಕೂ ಇನ್ನೂ ಕನಿಷ್ಠ ಒಂದು ವರ್ಷ ಕಾಲಾವಕಾಶವಿದೆ ಎಂದು ಲೆಕ್ಕಾಚಾರ ವಿವರಿಸಿದರು. ಡಿಲಿಮಿಟೇಷನ್ ಮುಗಿಯುವವರೆಗೆ ಯಾವುದೇ ರಾಜಕೀಯ ನಿರ್ಧಾರ ಕೈಗೊಳ್ಳುವುದಿಲ್ಲ ಎಂದು ಪುನರುಚ್ಚರಿಸಿದ ಅವರು, ತಮ್ಮ ರಾಜಕಾರಣದಲ್ಲಿ ಯಾವುದೇ ಮುಚ್ಚುಮರೆ ಇಲ್ಲ ಎಂದು ಹೇಳಿದರು. ಅಲ್ಲಿಯವರೆಗೆ ಪರಿಸ್ಥಿತಿ ಇದ್ದಂತೆಯೇ ಇರುತ್ತದೆ ಎಂದೂ ಅವರು ತಿಳಿಸಿದರು. ಜೊತೆಗೆ ಕಾರ್ಯಕರ್ತರು ಮತ್ತು ನಾಯಕರ ವಲಸೆ ಬಗ್ಗೆ ಮಾತನಾಡಿದ ಅವರು, ಯಾರಿಗೆ ಎಲ್ಲಿ ರಾಜಕೀಯವಾಗಿ ಅನುಕೂಲವಾಗುತ್ತದೆಯೋ ಅವರು ಅಲ್ಲಿಗೆ ಹೋಗಬಹುದು, ತಾವು ಯಾರನ್ನೂ ಬನ್ನಿ ಎಂದು ಕರೆಯುವುದೂ ಇಲ್ಲ, ಬರಬೇಡಿ ಎಂದು ತಡೆಯುವುದೂ ಇಲ್ಲ ಎಂದು ತಮ್ಮ ನಿಲುವು ತಿಳಿಸಿದರು.
ಇದನ್ನೂ ಓದಿ : ಬಸ್ ಪ್ರಯಾಣ ದರ ಹೆಚ್ಚಳ ಖಂಡಿಸಿ ರಾಜ್ಯಾದ್ಯಂತ ಪ್ರತಿಭಟನೆಗೆ ಬಿಜೆಪಿ ಕರೆ
ರಾಜಣ್ಣ ಅವರ ಈ ಹೇಳಿಕೆ ಕೇವಲ ಸ್ಪಷ್ಟೀಕರಣವಾಗಿ ಕಾಣುತ್ತಿಲ್ಲ, ಬದಲಿಗೆ ಮುಂದಿನ ರಾಜಕೀಯ ದಾಳಕ್ಕೆ ಸಮಯ ಕಾಯ್ದುಕೊಳ್ಳುವ ತಂತ್ರದಂತೆ ಕಾಣುತ್ತಿದೆ. ಡಿಲಿಮಿಟೇಷನ್ ಬಳಿಕ ಕ್ಷೇತ್ರಗಳ ಸ್ವರೂಪವೇ ಬದಲಾಗಬಹುದು, ಮೀಸಲಾತಿ, ಮತದಾರರ ಸಂಯೋಜನೆ ಮತ್ತು ಗೆಲುವಿನ ಸಾಧ್ಯತೆಗಳು ಬದಲಾಗಬಹುದು. ಹೀಗಾಗಿ ಈಗಲೇ ಯಾವುದೇ ಪಕ್ಷಕ್ಕೆ ಬದ್ಧರಾಗುವುದು ತಮಗೆ ಹಿನ್ನಡೆಯಾಗಬಹುದು ಎಂಬ ಲೆಕ್ಕಾಚಾರ ಅವರಿಗಿದೆ. ಒಂದು ವರ್ಷ ಸಮಯವಿದೆ ಎಂಬ ಮಾತು, ಎಲ್ಲ ಪಕ್ಷಗಳಿಗೂ ತೆರೆದ ಬಾಗಿಲು ಇಟ್ಟುಕೊಳ್ಳುವ ಸಂದೇಶವೂ ಹೌದು. ಕಾಂಗ್ರೆಸ್ನಲ್ಲಿ ಇದ್ದೂ ಪಕ್ಷ ಬದಲಾವಣೆಯ ಸಾಧ್ಯತೆಯನ್ನು ತಳ್ಳಿಹಾಕದಿರುವುದು ಹೈಕಮಾಂಡ್ ಮೇಲೂ ಒತ್ತಡ ಹೇರುವ ಪ್ರಯತ್ನವಾಗಿರಬಹುದು. ಒಟ್ಟಾರೆ, ರಾಜಣ್ಣ ಅವರು ತಮ್ಮ ಮುಂದಿನ ನಡೆಯನ್ನು ಡಿಲಿಮಿಟೇಷನ್ ಫಲಿತಾಂಶಕ್ಕೆ ಜೋಡಿಸಿ, ತಮ್ಮ ರಾಜಕೀಯ ಮೌಲ್ಯವನ್ನು ಕಾಯ್ದುಕೊಳ್ಳುವ ದಾರಿಯನ್ನು ಆಯ್ಕೆ ಮಾಡಿಕೊಂಡಿದ್ದಾರೆ ಎನ್ನಬಹುದು.




