☔ Weather
Bengaluru: ☀️ 19°C | AQI 151
Mysore: ☀️ 18°C | AQI 112
Mangalore: 🌤️ 23°C | AQI 145
Bengaluru: ☀️ 19°C | AQI 151
☔ Weather
Bengaluru: ☀️ 19°C | AQI 151
Mysore: ☀️ 18°C | AQI 112
Mangalore: 🌤️ 23°C | AQI 145
Bengaluru: ☀️ 19°C | AQI 151

PUNJAB: ಪಂಜಾಬ್ ರಾಜಕಾರಣಕ್ಕೆ ಹೊಸ ತಿರುವು: ಪ್ರಧಾನಿ ಮೋದಿ-ಸುಖ್ಬೀರ್ ಬಾದಲ್ ಭೇಟಿ

ಪಂಜಾಬ್ ವಿಧಾನಸಭಾ ಕ್ಷೇತ್ರಗಳ ಚುನಾವಣೆ ಹತ್ತಿರವಾಗುತ್ತಿರುವಂತೆಯೇ ರಾಷ್ಟ್ರ ರಾಜಧಾನಿ ನವದೆಹಲಿಯಲ್ಲಿ ರಾಜಕೀಯ ಚಟುವಟಿಕೆಗಳು ಬಿರುಸುಗೊಂಡಿವೆ. ಶಿರೋಮಣಿ ಅಕಾಲಿ ದಳದ ನಾಯಕ ಸುಖ್ಬೀರ್ ಸಿಂಗ್ ಬಾದಲ್ ಅವರು ಸಂಸತ್ತಿನ ಪ್ರಧಾನಮಂತ್ರಿ ಕಾರ್ಯಾಲಯದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಮುಖಾಮುಖಿ ಭೇಟಿಯಾಗಿ ಹತ್ತು ನಿಮಿಷಗಳ ಕಾಲ ಮಾತುಕತೆ ನಡೆಸಿದ್ದಾರೆ. ಕೇವಲ ರಾಜ್ಯದ ಅಭಿವೃದ್ಧಿ ಹಾಗೂ ರೈತರ ವಿಚಾರಗಳನ್ನು ಚರ್ಚಿಸಿರುವುದಾಗಿ ಬಾದಲ್ ಹೇಳಿಕೊಂಡಿದ್ದರೂ, ರಾಜಕೀಯ ಮೈತ್ರಿಯ ಕುರಿತು ಸ್ಪಷ್ಟನೆ ನೀಡದೆ ಮೌನ ತಳೆದಿದ್ದಾರೆ. ಈ ಭೇಟಿಯ ಬಗ್ಗೆ ಉಭಯ ಪಕ್ಷಗಳು ಅಧಿಕೃತ ಹೇಳಿಕೆ ಬಿಡುಗಡೆ ಮಾಡಿಲ್ಲವಾದರೂ, ವಿರೋಧ ಪಕ್ಷಗಳಾದ ಆಪ್ ಮತ್ತು ಕಾಂಗ್ರೆಸ್ ಇದನ್ನು ಚುನಾವಣಾ ಲಾಭದ ಗಿಮಿಕ್ ಎಂದು ವ್ಯಾಖ್ಯಾನಿಸಿವೆ.

1997 ರಿಂದ ಸುಮಾರು ಎರಡೂವರೆ ದಶಕಗಳ ಕಾಲ ಬಿಜೆಪಿ ಮತ್ತು ಅಕಾಲಿ ದಳ ಪಂಜಾಬ್‌ನಲ್ಲಿ ಯಶಸ್ವಿ ಮೈತ್ರಿಕೂಟವಾಗಿ ಆಡಳಿತ ನಡೆಸಿದ್ದವು. ಆದರೆ 2020 ರಲ್ಲಿ ಕೇಂದ್ರ ಸರ್ಕಾರ ಜಾರಿಗೆ ತಂದ ಕೃಷಿ ತಿದ್ದುಪಡಿ ಕಾಯ್ದೆಗಳ ವಿರೋಧವಾಗಿ ಎನ್‌ಡಿಎಯಿಂದ ಅಕಾಲಿ ದಳ ಹೊರಬಂದಿತ್ತು. ತದನಂತರ ನಡೆದ 2024 ರ ಲೋಕಸಭಾ ಚುನಾವಣೆಯಲ್ಲಿ ಎರಡೂ ಪಕ್ಷಗಳು ಪ್ರತ್ಯೇಕವಾಗಿ ಸ್ಪರ್ಧಿಸಿ ಭಾರಿ ಮುಖಭಂಗ ಅನುಭವಿಸಬೇಕಾಯಿತು. ಪ್ರಸ್ತುತ ಪಂಜಾಬ್ ಬಿಜೆಪಿ ಎಲ್ಲಾ 117 ಕ್ಷೇತ್ರಗಳಲ್ಲಿ ಸ್ವತಂತ್ರವಾಗಿ ಸ್ಪರ್ಧಿಸಲು ನಿರ್ಧರಿಸಿದೆ ಎಂದು ಹೇಳುತ್ತಿದ್ದರೂ, ಬದಲಾದ ಸನ್ನಿವೇಶದಲ್ಲಿ ಈ ಹಳೆಯ ಪಾಲುದಾರರು ಮತ್ತೆ ಒಂದಾಗುವ ಸಾಧ್ಯತೆಗಳನ್ನು ತಳ್ಳಿಹಾಕುವಂತಿಲ್ಲ.

ಈ ಭೇಟಿ ಎರಡೂ ಪಕ್ಷಗಳ ಅಸ್ತಿತ್ವದ ಹೋರಾಟದ ಭಾಗವಾಗಿದೆ. ಪ್ರಸ್ತುತ ಪಂಜಾಬ್‌ನಲ್ಲಿ ಆಡಳಿತ ನಡೆಸುತ್ತಿರುವ ಆಮ್ ಆದ್ಮಿ ಪಾರ್ಟಿ ಮತ್ತು ಬಲವಾದ ನೆಲೆ ಹೊಂದಿರುವ ಕಾಂಗ್ರೆಸ್ ಅನ್ನು ಎದುರಿಸಲು ಬಿಜೆಪಿ ಅಥವಾ ಅಕಾಲಿ ದಳಕ್ಕೆ ಏಕಾಂಗಿಯಾಗಿ ಸಾಧ್ಯವಿಲ್ಲ. ಗ್ರಾಮೀಣ ಭಾಗದಲ್ಲಿ ಬಲವಾದ ತಳಪಟ ಹೊಂದಿರುವ ಅಕಾಲಿ ದಳಕ್ಕೆ ನಗರ ಪ್ರದೇಶಗಳ ಮತಗಳನ್ನು ಸೆಳೆಯಲು ಬಿಜೆಪಿ ಬೆಂಬಲ ಅಗತ್ಯವಿದೆ, ಹಾಗೂ ಬಿಜೆಪಿಗೆ ಪಂಜಾಬ್‌ನಲ್ಲಿ ತನ್ನ ಖಾತೆ ತೆರೆಯಲು ಪ್ರಾದೇಶಿಕ ನಾಯಕರ ಆಸರೆ ಅನಿವಾರ್ಯವಾಗಿದೆ.

ಆದ್ದರಿಂದ, 2020 ರ ಕೃಷಿ ಕಾಯ್ದೆಗಳ ಕಹಿ ನೆನಪುಗಳನ್ನು ಬದಿಗೊತ್ತಿ ರಾಜಕೀಯ ಶಕ್ತಿಯಾಗಿ ಹೊರಹೊಮ್ಮಲು ಈ ಮೈತ್ರಿ ಮರುಸ್ಥಾಪನೆ ಎರಡೂ ಪಕ್ಷಗಳಿಗೆ ರಾಜಕೀಯ ಅನಿವಾರ್ಯತೆಯಾಗಿದೆ. ಈ ನಾಯಕರ ಭೇಟಿ ಮುಂಬರುವ ಪಂಜಾಬ್ ಚುನಾವಣೆಯ ಸಮೀಕರಣಗಳನ್ನು ಸಂಪೂರ್ಣವಾಗಿ ಬದಲಾಯಿಸುವ ಸೂಚನೆ ನೀಡುತ್ತಿದೆ. ಕೃಷಿ ಸಮುದಾಯದ ಅಸಮಾಧಾನವನ್ನು ಶಮನಗೊಳಿಸಿ, ಮತಗಳನ್ನು ಕ್ರೋಢೀಕರಿಸಲು ಈ ಹಳೆಯ ಮಿತ್ರರು ಹೊಸ ತಂತ್ರಗಾರಿಕೆಯೊಂದಿಗೆ ಮುನ್ನಡೆಯುವ ಎಲ್ಲಾ ಲಕ್ಷಣಗಳು ಕಾಣಿಸುತ್ತಿವೆ.