ಹುಬ್ಬಳ್ಳಿ : ಕೇಂದ್ರ ಸಚಿವ ಪ್ರಹ್ಲಾದ್ ಜೋಷಿ (Prahlad joshi) ಪೆಟ್ರೋಲ್ನಲ್ಲಿ ಎಥೆನಾಲ್ ಮಿಶ್ರಣದ ಬಗ್ಗೆ ಕರ್ನಾಟಕ ಸರ್ಕಾರ ಮಾಡಿರುವ ಆರೋಪಗಳನ್ನು ಸ್ಪಷ್ಟವಾಗಿ ತಳ್ಳಿಹಾಕಿದರು. ದೇಶದಲ್ಲಿ ಉತ್ಪಾದನೆಯೇ ಆಗದಷ್ಟು ಪ್ರಮಾಣದ ಎಥೆನಾಲ್ ಅನ್ನು ಪೆಟ್ರೋಲ್ಗೆ ಬೆರೆಸಲಾಗಿದೆ ಎಂದು ಹೇಳುವುದು ಹಾಸ್ಯಾಸ್ಪದವಾಗಿದೆ ಎಂದು ಅವರು ಹೇಳಿದರು. ಕಾಂಗ್ರೆಸ್ ನಾಯಕರು ಯಾವುದೇ ಆಧಾರವಿಲ್ಲದೆ ಈ ರೀತಿ ಆರೋಪ ಮಾಡುತ್ತಿದ್ದಾರೆ. ರಾಜ್ಯ ಕಾಂಗ್ರೆಸ್ ಸರ್ಕಾರ ಈ ವಿಚಾರದಲ್ಲಿ ರಾಜಕೀಯ ಮಾಡುತ್ತಿದ್ದು, ಕೇಂದ್ರದ ಆತ್ಮನಿರ್ಭರ ಭಾರತ ಯೋಜನೆಗೆ ಹಿನ್ನಡೆ ತರುವ ಉದ್ದೇಶದಿಂದ ಅಪಪ್ರಚಾರ ನಡೆಸುತ್ತಿದೆ ಎಂದು ಅವರು ದೂರಿದರು. ಹೇಳಿಕೆ ನೀಡುವ ಮೊದಲು ಕಾಂಗ್ರೆಸ್ ನಾಯಕರು ವಾಸ್ತವಾಂಶಗಳನ್ನು ಪರಿಶೀಲಿಸಬೇಕು ಎಂದು ಅವರು ಆಗ್ರಹಿಸಿದರು.
ಕಾಂಗ್ರೆಸ್ ಸುಳ್ಳು ಹೇಳುತ್ತಿದೆ..!
ರಾಜ್ಯ ಸರ್ಕಾರ ಸಂಗ್ರಹಿಸಿದ್ದ 63 ಇಂಧನ ಮಾದರಿಗಳಲ್ಲಿ ಕೇವಲ 14 ಮಾದರಿಗಳ ವರದಿಯನ್ನು ಮಾತ್ರ ಬಹಿರಂಗಪಡಿಸಿದೆ ಎಂದು ಜೋಷಿ ಪ್ರಶ್ನಿಸಿದರು. ಆರು ಪ್ರಯೋಗಾಲಯಗಳ ವರದಿಗಳ ಪ್ರಕಾರ 11 ಮಾದರಿಗಳಲ್ಲಿ ಎಥೆನಾಲ್ ಪ್ರಮಾಣ ಶೇ 21 ರಿಂದ ಶೇ 39 ರಷ್ಟಿದೆ ಎಂದು ಹೇಳಲಾಗಿದೆ. ಆದರೆ ದೇಶದಲ್ಲಿ ಅಷ್ಟು ಎಥೆನಾಲ್ ಉತ್ಪಾದನೆಯೇ ಇಲ್ಲದಿರುವಾಗ ಇಂತಹ ವರದಿಗಳನ್ನು ಮುಂದಿಟ್ಟು ಜನರಲ್ಲಿ ಗೊಂದಲ ಮೂಡಿಸಲಾಗುತ್ತಿದೆ ಎಂದು ಅವರು ಆರೋಪಿಸಿದರು. ಪರೀಕ್ಷೆಯಲ್ಲೂ ನಿಯಮ ಪಾಲಿಸಿಲ್ಲ. ಪೆಟ್ರೋಲ್ ಕಂಪನಿಗಳ ಪ್ರತಿನಿಧಿಗಳು, ಕೇಂದ್ರದ ಅಧಿಕಾರಿಗಳು ಮತ್ತು ಸಂಬಂಧಪಟ್ಟ ಬಂಕ್ ಮಾಲೀಕರಿಗೆ ಮಾಹಿತಿ ನೀಡದೆ ಪರೀಕ್ಷೆ ನಡೆಸಲಾಗಿದೆ. ಪರೀಕ್ಷೆ ಕಾನೂನುಬದ್ಧವಾಗಿಲ್ಲ ಮತ್ತು ವರದಿಯನ್ನು ಅಧಿಕೃತವಾಗಿ ಪ್ರಕಟಿಸಿಲ್ಲ ಎಂದು ಅವರು ಹೇಳಿದರು. ಶ್ರೀರಾಮ ರಿಸರ್ಚ್ ಇನ್ಸ್ಟಿಟ್ಯೂಟ್ನಲ್ಲಿ ಪರೀಕ್ಷೆ ನಡೆಸಲಾಗಿದೆ ಎಂದು ಸರ್ಕಾರ ಹೇಳಿದ್ದರೂ ಆ ಸಂಸ್ಥೆಗೆ ಅಗತ್ಯ ಮಾನ್ಯತೆ ಇಲ್ಲ. ಪೆಟ್ರೋಲ್ ಮಾದರಿ ಪರೀಕ್ಷೆಗೆ ಅರ್ಹ ಪ್ರಯೋಗಾಲಯಗಳ ಪಟ್ಟಿಯಲ್ಲಿ ಅದರ ಹೆಸರೇ ಇಲ್ಲ ಎಂದು ಅವರು ತಿಳಿಸಿದರು. ಕರ್ನಾಟಕದ 56 ಮಾದರಿಗಳು ಸೇರಿ ದೇಶದಾದ್ಯಂತ ಒಟ್ಟು 896 ಮಾದರಿಗಳನ್ನು ಪರೀಕ್ಷಿಸಿ ವರದಿ ಸಿದ್ಧಪಡಿಸಲಾಗಿದೆ ಎಂದು ಅವರು ಹೇಳಿದರು. ಎಥೆನಾಲ್ ಮಿಶ್ರಣದಿಂದ ಕಂಪನಿಗಳಿಗೆ ನಷ್ಟವಾಗುತ್ತದೆ. ಪೆಟ್ರೋಲ್ ಲೀಟರ್ಗೆ 53 ರೂಪಾಯಿ ಇದ್ದರೆ ಎಥೆನಾಲ್ ಬೆಲೆ 56 ರೂಪಾಯಿ 70 ಪೈಸೆ ಇದೆ. ಆದರೂ ರೈತರ ಆದಾಯ ಹೆಚ್ಚಿಸಲು ಮತ್ತು ವಿದೇಶಿ ಇಂಧನ ಅವಲಂಬನೆ ಕಡಿಮೆ ಮಾಡಲು ಕೇಂದ್ರ ಈ ಯೋಜನೆಗೆ ಪ್ರೋತ್ಸಾಹ ನೀಡುತ್ತಿದೆ. ಈ ಯೋಜನೆಯಿಂದ ಸುಮಾರು 1 ಕೋಟಿ 66 ಲಕ್ಷ ರೈತರಿಗೆ ಹಣ ಸಂದಿದೆ. ದೇಶಕ್ಕೆ 1 ಲಕ್ಷ 94 ಸಾವಿರ ಕೋಟಿ ರೂಪಾಯಿ ಉಳಿತಾಯವಾಗಿದೆ. ರೈತರಿಗೆ ಅನುಕೂಲವಾಗುವ ಯೋಜನೆಯನ್ನು ವಿರೋಧಿಸುವ ಮೂಲಕ ರಾಹುಲ್ ಗಾಂಧಿ ಮತ್ತು ರಾಜ್ಯ ಕಾಂಗ್ರೆಸ್ ಸರ್ಕಾರ ರೈತ ವಿರೋಧಿ ನಿಲುವು ತಾಳಿವೆ ಎಂದು ಅವರು ಟೀಕಿಸಿದರು. ರಾಜ್ಯ ಸರ್ಕಾರ ಪೆಟ್ರೋಲ್ ಮತ್ತು ಡೀಸೆಲ್ ಮೇಲೆ ಸುಮಾರು 30 ರೂಪಾಯಿ ತೆರಿಗೆ ವಿಧಿಸುತ್ತಿದೆ ಎಂದು ಅವರು ಆರೋಪಿಸಿದರು.
ಇದನ್ನೂ ಓದಿ : ಸುರಂಗಕ್ಕೂ ವಿರೋಧ, ಮೇಲ್ಸೇತುವೆಗೂ ವಿರೋಧ ವಾಹನಗಳು ಎಲ್ಲಿ ಹೋಗಬೇಕು..?
ಈ ವಿವಾದ ಈಗ ಕೇವಲ ಇಂಧನದ ಗುಣಮಟ್ಟದ
ಪ್ರಶ್ನೆಯಾಗಿ ಉಳಿದಿಲ್ಲ. ಇದು ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳ ನಡುವಿನ ರಾಜಕೀಯ ಮುಖಾಮುಖಿಯಾಗಿ ಬದಲಾಗಿದೆ. ರಾಜ್ಯ ಸರ್ಕಾರದ ವರದಿ ಸರಿಯಾಗಿದ್ದರೆ ಅದನ್ನು ಪೂರ್ಣ ಪಾರದರ್ಶಕವಾಗಿ, ಮಾನ್ಯತೆ ಪಡೆದ ಪ್ರಯೋಗಾಲಯಗಳ ಮೂಲಕ, ಎಲ್ಲ ಪಾಲುದಾರರ ಸಮ್ಮುಖದಲ್ಲಿ ಮರುಪರೀಕ್ಷೆ ಮಾಡಿ ಸಾಬೀತುಪಡಿಸಬೇಕಿತ್ತು. ಕೇವಲ ಕೆಲವು ಮಾದರಿಗಳನ್ನು ಆಯ್ದು ಬಿಡುಗಡೆ ಮಾಡುವುದು ಅನುಮಾನಕ್ಕೆ ಎಡೆಮಾಡಿಕೊಡುತ್ತದೆ. ಅದೇ ರೀತಿ ಕೇಂದ್ರ ಸರ್ಕಾರವೂ ಕೇವಲ ರಾಜಕೀಯ ಆರೋಪ ಎಂದು ತಳ್ಳಿಹಾಕುವ ಬದಲು ಎಲ್ಲ 896 ಮಾದರಿಗಳ ವರದಿಯನ್ನು ಸಾರ್ವಜನಿಕವಾಗಿ ಇಟ್ಟು ಜನರ ಅನುಮಾನ ನಿವಾರಿಸಬೇಕು. ಎಥೆನಾಲ್ ಮಿಶ್ರಣದಿಂದ ವಾಹನಗಳ ಮೈಲೇಜ್ ಮತ್ತು ಎಂಜಿನ್ ಮೇಲೆ ಪರಿಣಾಮವಾಗುತ್ತಿದೆಯೇ ಎಂಬುದು ಜನರ ನಿಜವಾದ ಕಾಳಜಿ. ಅದಕ್ಕೆ ವೈಜ್ಞಾನಿಕ ಉತ್ತರ ಬೇಕೇ ಹೊರತು ರಾಜಕೀಯ ವಾಗ್ದಾಳಿಯಲ್ಲ. ರೈತರಿಗೆ ಲಾಭ ಮತ್ತು ಇಂಧನ ಉಳಿತಾಯ ಎರಡೂ ಮುಖ್ಯವೇ. ಆದರೆ ಗ್ರಾಹಕರ ಹಿತವನ್ನೂ ಕಡೆಗಣಿಸುವಂತಿಲ್ಲ. ಆದ್ದರಿಂದ ಎರಡೂ ಸರ್ಕಾರಗಳು ಆರೋಪ-ಪ್ರತ್ಯಾರೋಪ ಬಿಟ್ಟು ಸ್ವತಂತ್ರ ತಜ್ಞರ ಮೂಲಕ ಸಮಗ್ರ ತನಿಖೆ ನಡೆಸಿ ಸತ್ಯವನ್ನು ಜನರ ಮುಂದಿಡುವುದು ಈಗ ಅಗತ್ಯವಾಗಿದೆ.




