☔ Weather
Bengaluru: ☀️ 24°C | AQI 113
Mysore: ☀️ 22°C | AQI 110
Mangalore: ☀️ 27°C | AQI 172
Bengaluru: ☀️ 24°C | AQI 113
☔ Weather
Bengaluru: ☀️ 24°C | AQI 113
Mysore: ☀️ 22°C | AQI 110
Mangalore: ☀️ 27°C | AQI 172
Bengaluru: ☀️ 24°C | AQI 113

BIDADI : ಹೆಚ್.ಡಿ.ಕೆ ಬಿಡದಿ ವಿಸಿಟ್ – ರಣಾಂಗಣ ಆಗಲಿದ್ಯಾ ಭೈರಮಂಗಲ..?

ಕೇಂದ್ರ ಸಚಿವ ಹೆಚ್.ಡಿ. ಕುಮಾರಸ್ವಾಮಿ ಅವರು ಬಿಡದಿ ಸ್ಮಾರ್ಟ್ ಸಿಟಿ ಅಥವಾ ಟೌನ್‌ಶಿಪ್ ಯೋಜನೆಗೆ ಸಂಬಂಧಿಸಿದಂತೆ ಮುಖಾಮುಖಿ ಚರ್ಚೆ ನಡೆಸಲು ಶನಿವಾರ ರಾಮನಗರ ಜಿಲ್ಲೆಯ ಭೈರಮಂಗಲಕ್ಕೆ ಆಗಮಿಸುತ್ತಿದ್ದಾರೆ. ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರಿಗೆ ಈ ಹಿಂದೆ ಬಹಿರಂಗ ಸವಾಲು ಹಾಕಿದ್ದ ಅವರು, ಈ ಭಾಗದ ಕೃಷಿಕರ ಸಮ್ಮುಖದಲ್ಲೇ ಮಾತುಕತೆಗೆ ಕೂರಲು ಸಿದ್ಧ ಎಂದಿದ್ದಾರೆ. ಈ ಭೇಟಿಯ ಹಿನ್ನೆಲೆಯಲ್ಲಿ ಗ್ರಾಮದಲ್ಲಿ ಪರ-ವಿರೋಧದ ಅಲೆ ಎದ್ದಿದ್ದು, ಪರಿಸ್ಥಿತಿ ತೀವ್ರ ಉದ್ವಿಗ್ನಗೊಂಡಿದೆ. ಮುನ್ನೆಚ್ಚರಿಕಾ ಕ್ರಮವಾಗಿ ಪೊಲೀಸ್ ವರಿಷ್ಠಾಧಿಕಾರಿ ಶ್ರೀನಿವಾಸ ಗೌಡ ಅವರ ನೇತೃತ್ವದಲ್ಲಿ ಇಡೀ ಪ್ರದೇಶವನ್ನು ಭದ್ರತಾ ಕವಚದೊಳಗೆ ತರಲಾಗಿದೆ.

e ಯೋಜನೆಯ ವಿರುದ್ಧ ಒಂದು ಗುಂಪು ನಿರಂತರವಾಗಿ ಪ್ರತಿಭಟನೆ ನಡೆಸುತ್ತಿದ್ದರೆ, ಮತ್ತೊಂದು ಕಡೆ ಭೂಮಿ ಕಳೆದುಕೊಳ್ಳಲು ಸಿದ್ಧವಿರುವ ಮತ್ತು ಅಭಿವೃದ್ಧಿ ಬಯಸುವ ಜಮೀನುದಾರರು ಯೋಜನೆಯ ಪರವಾಗಿ ಧರಣಿ ಹೂಡಿದ್ದಾರೆ. ಸ್ಥಳಕ್ಕೆ ಬಂದ ಪೊಲೀಸರು ಶಾಂತಿ ಕಾಪಾಡಲು ಎರಡೂ ಬಣಗಳ ಮನವೊಲಿಸಲು ಯತ್ನಿಸುತ್ತಿದ್ದಾರೆ. ಆದರೆ, ಸ್ಥಳೀಯವಾಗಿ ಕುಮಾರಸ್ವಾಮಿ ಅವರನ್ನು ಘೇರಾವ್ ಮಾಡಲು ಹಾಗೂ ಪ್ರಶ್ನೆಗಳ ಸುರಿಮಳೆಗೈಯಲು ಸಿದ್ಧತೆಗಳು ನಡೆದಿವೆ.

ಈ ವಿವಾದ ಕೇವಲ ಭೂಸ್ವಾಧೀನದ ಪ್ರಶ್ನೆಯಾಗಿ ಉಳಿದಿಲ್ಲ. ಇದು ಹಳೆ ಮೈಸೂರು ಭಾಗದಲ್ಲಿ ಜೆಡಿಎಸ್ ಮತ್ತು ಕಾಂಗ್ರೆಸ್ ನಡುವಿನ ವರ್ಚಸ್ಸಿನ ಹೋರಾಟವಾಗಿ ಮಾರ್ಪಟ್ಟಿದೆ. ಹೆಚ್.ಡಿ. ಕುಮಾರಸ್ವಾಮಿ ಅವರು ತಮ್ಮ ಭದ್ರಕೋಟೆಯಾಗಿದ್ದ ರಾಮನಗರ ವಲಯದಲ್ಲಿ ರೈತರ ಹಿತರಕ್ಷಕ ಎಂಬ ಚಹರೆಯನ್ನು ಮರುಸ್ಥಾಪಿಸಲು ಈ ವೇದಿಕೆಯನ್ನು ಬಳಸಿಕೊಳ್ಳುತ್ತಿದ್ದಾರೆ. ಮುಖ್ಯಮಂತ್ರಿಗಳಿಗೆ ನೇರ ಸವಾಲು ಹಾಕುವ ಮೂಲಕ ಕಾಂಗ್ರೆಸ್ ಸರ್ಕಾರದ ಭೂನೀತಿಗಳನ್ನು ಕಟುವಾಗಿ ಟೀಕಿಸುವುದು ಹಾಗೂ ಗ್ರಾಮೀಣ ಮತದಾರರನ್ನು ತಾವೇ ರಕ್ಷಿಸುತ್ತಿದ್ದೇವೆ ಎಂಬ ಸಂದೇಶ ರವಾನಿಸುವುದು ಅವರ ತಂತ್ರಗಾರಿಕೆಯಾಗಿದೆ.

ಮತ್ತೊಂದೆಡೆ, ಆಡಳಿತಾರೂಢ ಕಾಂಗ್ರೆಸ್ ಪಕ್ಷ ಈ ಯೋಜನೆಯ ಮೂಲಕ ಕೈಗಾರಿಕಾ ಮತ್ತು ನಗರಾಭಿವೃದ್ಧಿಯ ವೇಗವನ್ನು ಹೆಚ್ಚಿಸಲು ಮುಂದಾಗಿದ್ದು, ಜೆಡಿಎಸ್ ಮುಖಂಡರ ವಿರೋಧವನ್ನು ಅಭಿವೃದ್ಧಿ ವಿರೋಧಿ ಧೋರಣೆ ಎಂದು ಬಿಂಬಿಸಲು ಯತ್ನಿಸುತ್ತಿದೆ. ಸ್ಥಳೀಯವಾಗಿ ರೈತರು ಪರ-ವಿರೋಧ ಬಣಗಳಾಗಿ ಸೀಳಿಕೊಂಡಿರುವುದು ರಾಜಕೀಯ ಲಾಭ-ನಷ್ಟದ ಲೆಕ್ಕಾಚಾರವನ್ನು ಮತ್ತಷ್ಟು ಜಟಿಲಗೊಳಿಸಿದೆ. ಈ ವಿದ್ಯಮಾನ ಮುಂದಿನ ದಿನಗಳಲ್ಲಿ ಈ ಭಾಗದ ಪ್ರಾದೇಶಿಕ ರಾಜಕಾರಣದಲ್ಲಿ ಭಾರಿ ಧ್ರುವೀಕರಣಕ್ಕೆ ಕಾರಣವಾಗಲಿದ್ದು, ಉಭಯ ಪಕ್ಷಗಳ ನಾಯಕರಿಗೆ ಇದೊಂದು ಪ್ರತಿಷ್ಠೆಯ ಕಣವಾಗಿ ಪರಿಣಮಿಸಿದೆ.