Nana Patekar: ಬಾಲಿವುಡ್‌ನ ಮೇರು ನಟ ನಾನಾ ಪಾಟೇಕರ್ ಅವರು ರಂಗಭೂಮಿ ಹಾಗೂ ಸಿನಿಮಾಗಳಲ್ಲಿ ಮಾತ್ರವಲ್ಲದೆ, ದೇಶ ಸೇವೆಯಲ್ಲೂ ಸದಾ ಮುಂಚೂಣಿಯಲ್ಲಿದ್ದರು. 1999ರ ಕಾರ್ಗಿಲ್ ಯುದ್ಧದ ಸಮಯದಲ್ಲಿ ಅವರು 60 ದಿನಗಳ ಕಾಲ ಭಾರತೀಯ ಯೋಧರೊಂದಿಗೆ ಗಡಿಯಲ್ಲಿ ಸೇವೆ ಸಲ್ಲಿಸಿದ್ದರು ಎಂಬುದು ಅನೇಕರಿಗೆ ತಿಳಿದಿಲ್ಲ.
ಅಂದಿನ ರಕ್ಷಣಾ ಸಚಿವ ಜಾರ್ಜ್ ಫರ್ನಾಂಡಿಸ್ ಅವರಿಂದ ವಿಶೇಷ ಅನುಮತಿ ಪಡೆದುಕೊಂಡು ಅವರು ಗಡಿಗೆ ತೆರಳಿದ್ದರು. ಅತ್ಯಂತ ಅಪಾಯಕಾರಿ ಪ್ರದೇಶಗಳಲ್ಲಿ ಮರಾಠಾ ಲೈಟ್ ಇನ್ಫಾಂಟ್ರಿ ಜೊತೆಗೂಡಿ ಹಾಗೂ ಕ್ವಿಕ್ ರಿಯಾಕ್ಷನ್ ಟೀಮ್ (QRT) ಭಾಗವಾಗಿ ಅವರು ಸೇವೆ ಸಲ್ಲಿಸಿದ್ದರು.
ಸಾಮಾನ್ಯ ನಾಗರಿಕರಾಗಿದ್ದರೂ ದೇಶಕ್ಕಾಗಿ ಗಡಿಯಲ್ಲಿ ನಿಂತು ಹೋರಾಡಿದ ಅವರ ಈ ದೇಶಪ್ರೇಮದ ಸಾಹಸಗಾಥೆ ಈಗ ಪ್ರತಿಯೊಬ್ಬರ ಮನ ಮುಟ್ಟುತ್ತಿದೆ.
3 ವರ್ಷಗಳ ಕಾಲ ಕಠಿಣ ಮಿಲಿಟರಿ ತರಬೇತಿ ಪಡೆದಿದ್ದ ನಟ
1991ರಲ್ಲಿ ತೆರೆಕಂಡ ‘ಪ್ರಹಾರ್: ದಿ ಫೈನಲ್ ಅಟ್ಯಾಕ್’ ಸಿನಿಮಾದಲ್ಲಿ ಸೈನಿಕನ ಪಾತ್ರಕ್ಕಾಗಿ ನಾನಾ ಪಾಟೇಕರ್ 1988ರಿಂದಲೇ ಸಿದ್ಧತೆ ನಡೆಸಿದ್ದರು. ಮರಾಠಾ ಲೈಟ್ ಇನ್ಫಾಂಟ್ರಿ ಪಡೆಯೊಂದಿಗೆ ಸುಮಾರು 3 ವರ್ಷಗಳ ಕಾಲ ಅತ್ಯಂತ ಕಠಿಣ ಮಿಲಿಟರಿ ತರಬೇತಿಯನ್ನು ಅವರು ಪಡೆದುಕೊಂಡಿದ್ದರು.
ಇದನ್ನು ಓದಿ: Nana Patekar: ಸಾವಿಗೂ ಮುನ್ನವೇ ಸಿಗ್ನಲ್?
ಅವರ ಈ ಅಪಾರ ಶ್ರಮ ಮತ್ತು ಕಟಿಬದ್ಧತೆಯನ್ನು ಗುರುತಿಸಿ, 1990ರಲ್ಲಿ ಅವರಿಗೆ ಟೆರಿಟೋರಿಯಲ್ ಆರ್ಮಿಯಲ್ಲಿ ಗೌರವಾನ್ವಿತ ‘ಕ್ಯಾಪ್ಟನ್’ ಹುದ್ದೆಯನ್ನು ನೀಡಿ ಗೌರವಿಸಲಾಗಿತ್ತು.
ಕಾರ್ಗಿಲ್ ಯುದ್ಧಕ್ಕೆ ತೆರಳಲು ಜಾರ್ಜ್ ಫರ್ನಾಂಡಿಸ್ ಅನುಮತಿ ಪಡೆದಿದ್ದೇಗೆ?
1999ರಲ್ಲಿ ಯುದ್ಧ ಪ್ರಾರಂಭವಾದಾಗ, ನಾನಾ ಪಾಟೇಕರ್ ಅವರು ಒಬ್ಬ ಸಾಮಾನ್ಯ ನಾಗರಿಕ ಎಂಬ ಕಾರಣಕ್ಕೆ ಸೇನಾಧಿಕಾರಿಗಳು ಆರಂಭದಲ್ಲಿ ಗಡಿಗೆ ತೆರಳಲು ನಿರಾಕರಿಸಿದ್ದರು. ಆದರೆ ಅವರು ಹತಾಶರಾಗದೆ ಅಂದಿನ ರಕ್ಷಣಾ ಸಚಿವ ಜಾರ್ಜ್ ಫರ್ನಾಂಡಿಸ್ ಅವರನ್ನು ಖುದ್ದಾಗಿ ಭೇಟಿಯಾದರು.
ತಮ್ಮಲ್ಲಿದ್ದ 3 ವರ್ಷಗಳ ಕಠಿಣ ಮಿಲಿಟರಿ ತರಬೇತಿ ಮತ್ತು ರಾಷ್ಟ್ರಮಟ್ಟದ ರೈಫಲ್ ಶೂಟಿಂಗ್ ಅನುಭವದ ಬಗ್ಗೆ ಮನವರಿಕೆ ಮಾಡಿಕೊಟ್ಟರು. ಅವರ ದೇಶಪ್ರೇಮ ಹಾಗೂ ಅನುಭವಕ್ಕೆ ಮೆಚ್ಚಿದ ಸಚಿವರು ಕಾರ್ಗಿಲ್ ಗಡಿಯಲ್ಲಿ ಸೇವೆ ಸಲ್ಲಿಸಲು ತಕ್ಷಣ ಅನುಮತಿ ನೀಡಿದರು.
Nana Patekar: ‘ನಾಮ್ ಫೌಂಡೇಶನ್’ ಮೂಲಕ ಸದಾ ಸಮಾಜಸೇವೆ
ಚಿತ್ರರಂಗದಲ್ಲಿ ಅದ್ಭುತ ನಟನೆಗಾಗಿ 2013ರಲ್ಲಿ ‘ಪದ್ಮಶ್ರೀ’ ಪ್ರಶಸ್ತಿ ಪಡೆದಿದ್ದ ನಾನಾ ಪಾಟೇಕರ್, ಮೂರು ಬಾರಿ ರಾಷ್ಟ್ರ ಪ್ರಶಸ್ತಿಗೂ ಭಾಜನರಾಗಿದ್ದರು.
ಕೇವಲ ಬೆಳ್ಳಿಪರದೆಗೆ ಸೀಮಿತವಾಗದೆ ‘ನಾಮ್ ಫೌಂಡೇಶನ್’ ಸ್ಥಾಪಿಸಿ, ಸಂಕಷ್ಟದಲ್ಲಿದ್ದ ರೈತರಿಗೆ ಹಾಗೂ ದೇಶಕ್ಕಾಗಿ ಪ್ರಾಣತ್ಯಾಗ ಮಾಡಿದ ಯೋಧರ ಕುಟುಂಬಗಳಿಗೆ ಆಸರೆಯಾಗಿದ್ದರು.
