Photo Credits: @vikramravichandranofficial (Instagram)
@classicxx_hits (Instagram)
ಸ್ಯಾಂಡಲ್ವುಡ್ ‘ಕನಸುಗಾರ’ ರವಿಚಂದ್ರನ್ ಅವರ ಬಹುಕೋಟಿ ವೆಚ್ಚದ ‘ಶಾಂತಿ ಕ್ರಾಂತಿ’ ಸಿನಿಮಾವನ್ನು ಮರು ಬಿಡುಗಡೆ ಮಾಡಬೇಕೆಂಬ ಅಭಿಮಾನಿಗಳ ಸುದೀರ್ಘ ಬೇಡಿಕೆಗೆ ಕೊನೆಗೂ ಬಹುದೊಡ್ಡ ಸ್ಪಂದನೆ ಸಿಕ್ಕಿದೆ.
ಈ ವಿಚಾರವಾಗಿ ಕ್ರೇಜಿಸ್ಟಾರ್ ರವಿಚಂದ್ರನ್ ಅವರ ಕಿರಿಯ ಮಗ, ನಟ ವಿಕ್ರಮ್ ರವಿಚಂದ್ರನ್ ಪ್ರಮುಖ ಮಾಹಿತಿಯೊಂದನ್ನು ಹಂಚಿಕೊಂಡಿದ್ದಾರೆ. ಚಿತ್ರದ ಮರು ಬಿಡುಗಡೆಗೆ ತಂದೆಯಿಂದ ಅಧಿಕೃತ ಗ್ರೀನ್ ಸಿಗ್ನಲ್ ಸಿಕ್ಕಿದ್ದು, ಕೆಲಸಗಳು ಆರಂಭವಾಗಿವೆ ಎಂದು ತಿಳಿಸಿದ್ದಾರೆ.
ಈ ಸಿಹಿ ಸುದ್ದಿಯಿಂದ ಸ್ಯಾಂಡಲ್ವುಡ್ ಹಾಗೂ ರವಿಚಂದ್ರನ್ ಅಭಿಮಾನಿಗಳ ವಲಯದಲ್ಲಿ ಹೊಸ ಆಸೆ ಮತ್ತು ಕುತೂಹಲ ಮೂಡಿದೆ. ಆ ಕುರಿತಾದ ಕಂಪ್ಲೀಟ್ ಡಿಟೇಲ್ಸ್ ಇಲ್ಲಿದೆ.
10 ಕೋಟಿಗೂ ಅಧಿಕ ಬಜೆಟ್: ಅಂದಿನ ಕಾಲದ ಪ್ಯಾನ್ ಇಂಡಿಯಾ ಮಾಸ್ಟರ್ಪೀಸ್…
1991ರ ಸೆಪ್ಟೆಂಬರ್ 19ರಂದು ಬಿಡುಗಡೆಯಾಗಿದ್ದ ‘ಶಾಂತಿ ಕ್ರಾಂತಿ’ ಸಿನಿಮಾ ಅಂದಿನ ಕಾಲದಲ್ಲೇ ಹೊಸ ಇತಿಹಾಸ ಬರೆದಿತ್ತು. ರವಿಚಂದ್ರನ್ ಅವರು ಸ್ವತಃ ನಟಿಸಿ, ನಿರ್ದೇಶಿಸಿ ಹಾಗೂ ನಿರ್ಮಿಸಿದ್ದ ಈ ಸಿನಿಮಾ 10 ಕೋಟಿಗೂ ಹೆಚ್ಚು ವೆಚ್ಚದಲ್ಲಿ ಸಿದ್ಧವಾಗಿತ್ತು. ಯಾವುದೇ ತಾಂತ್ರಿಕ ಸೌಲಭ್ಯಗಳಿಲ್ಲದ ಆ ಕಾಲದಲ್ಲೇ ಭಾರತೀಯ ಚಿತ್ರರಂಗ ಬೆರಗಾಗುವಂತೆ ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ಚಿತ್ರ ನಿರ್ಮಿಸಲಾಗಿತ್ತು.
ಆದರೆ ಕಾರಣಾಂತರಗಳಿಂದ ಈ ಸಿನಿಮಾ ಬಾಕ್ಸ್ ಆಫೀಸ್ನಲ್ಲಿ ಅಂದುಕೊಂಡ ಮಟ್ಟದ ಗಳಿಕೆ ಮಾಡಲು ಸಾಧ್ಯವಾಗಲಿಲ್ಲ. ಆದರೂ ಈ ಚಿತ್ರದ ಮೇಕಿಂಗ್ ಮತ್ತು ದೃಶ್ಯ ವೈಭವ ಇಂದಿಗೂ ಪ್ರತಿಯೊಬ್ಬ ಸಿನಿಪ್ರೇಮಿಯ ಮನಸ್ಸಿನಲ್ಲಿ ಹಸನಾಗಿ ಉಳಿದಿದೆ. “ಅಂದು ಸೋತ ಈ ಮಹಾನ್ ಸಿನಿಮಾವನ್ನು ಇಂದು ನಾವು ಥಿಯೇಟರ್ನಲ್ಲಿ ಗೆಲ್ಲಿಸುತ್ತೇವೆ” ಎಂದು ನೆಟ್ಟಿಗರು ಸೋಶಿಯಲ್ ಮೀಡಿಯಾದಲ್ಲಿ ಪಟ್ಟು ಹಿಡಿದಿದ್ದರು.
“ಡ್ಯಾಡಿಯಿಂದ ಸಿಕ್ಕಿದೆ ಗ್ರೀನ್ ಸಿಗ್ನಲ್”: ವಿಕ್ರಮ್ ರವಿಚಂದ್ರನ್ ಹೇಳಿದ್ದೇನು?
ಅಭಿಮಾನಿಗಳ ಈ ತೀವ್ರ ಬೇಡಿಕೆ ಕುರಿತು ನಟ ವಿಕ್ರಮ್ ರವಿಚಂದ್ರನ್ ಇತ್ತೀಚೆಗೆ ಮುಕ್ತವಾಗಿ ಮಾತನಾಡಿದ್ದಾರೆ. “ಶಾಂತಿ ಕ್ರಾಂತಿ ಸಿನಿಮಾವನ್ನು ರೀ-ರಿಲೀಸ್ ಮಾಡುವಂತೆ ಸಾಕಷ್ಟು ಜನ ಡ್ಯಾಡಿ ಬಳಿ ವಿನಂತಿಸಿಕೊಂಡಿದ್ದರು” ಎಂದು ತಿಳಿಸಿದ್ದಾರೆ. ನಮ್ಮ ಅಣ್ಣ ಮನು ಕೂಡ ಈ ಸಿನಿಮಾವನ್ನು ಮತ್ತೆ ಚಿತ್ರಮಂದಿರಗಳಲ್ಲಿ ಬಿಡುಗಡೆ ಮಾಡಬೇಕು ಎಂಬ ಆಸೆ ಹೊಂದಿದ್ದರು ಎಂದು ಹೇಳಿದ್ದಾರೆ.
ಇವತ್ತು ನಾನು ಮತ್ತು ಡ್ಯಾಡಿ ಈ ವಿಚಾರದ ಬಗ್ಗೆ ಸವಿಸ್ತಾರವಾಗಿ ಚರ್ಚೆ ನಡೆಸಿದ್ದೇವೆ ಎಂದು ವಿಕ್ರಮ್ ಸ್ಪಷ್ಟಪಡಿಸಿದ್ದಾರೆ. “ಜನ ಇಷ್ಟೊಂದು ಪ್ರೀತಿಯಿಂದ ಆಸೆ ಪಡುತ್ತಿದ್ದಾರೆ, ನೋಡು ಏನು ಮಾಡುತ್ತೀಯಾ” ಎಂದು ತಂದೆ ಗ್ರೀನ್ ಸಿಗ್ನಲ್ ನೀಡಿದ್ದಾರೆ ಎಂದಿದ್ದಾರೆ. ಅವರಿಂದ ಗ್ರೀನ್ ಸಿಗ್ನಲ್ ಸಿಕ್ಕ ತಕ್ಷಣವೇ ಈ ಕುರಿತಾದ ಆರಂಭಿಕ ಕೆಲಸಗಳನ್ನು ಇಂದಿನಿಂದಲೇ ಶುರು ಮಾಡಿದ್ದೇನೆ ಎಂದು ವಿಕ್ರಮ್ ಹಂಚಿಕೊಂಡಿದ್ದಾರೆ.
ಹೊಸ ರೂಪದಲ್ಲಿ ಥಿಯೇಟರ್ಗೆ ಬರಲಿದೆಯೇ ರವಿಮಾಮನ ಕನಸಿನ ಕಾವ್ಯ?
ಚಿತ್ರದ ತಾಂತ್ರಿಕ ಮರುಕೆಲಸಗಳು ಹಾಗೂ ಪ್ಲಸ್ ಪಾಯಿಂಟ್ಗಳ ಬಗ್ಗೆ ವಿಕ್ರಮ್ ಪರಿಶೀಲನೆ ನಡೆಸುತ್ತಿದ್ದಾರೆ. ಯಾವ ರೀತಿ ಮತ್ತು ಯಾವ ಸಮಯದಲ್ಲಿ ಸಿನಿಮಾವನ್ನು ಪ್ರೇಕ್ಷಕರ ಮುಂದೆ ತರಬೇಕು ಎಂಬುದರ ಯೋಜನೆ ಸಾಗುತ್ತಿದೆ. ಮೂರು ದಶಕಗಳ ಬಳಿಕ ಈ ಮಾಸ್ಟರ್ಪೀಸ್ ಚಿತ್ರಕ್ಕೆ ಆಧುನಿಕ ಸ್ಪರ್ಶ ಸಿಗುವ ಮುನ್ಸೂಚನೆ ಸಿಕ್ಕಿದೆ.
ಈ ಸುದ್ದಿ ಪ್ರತಿಯೊಬ್ಬ ರವಿಚಂದ್ರನ್ ಅಭಿಮಾನಿಗೆ ನಿಜಕ್ಕೂ ಹೊಸ ಹುಮ್ಮಸ್ಸು ತಂದಿದೆ. ದೊಡ್ಡ ಪರದೆಯ ಮೇಲೆ ‘ಶಾಂತಿ ಕ್ರಾಂತಿ’ ದೃಶ್ಯ ವೈಭವವನ್ನು ಮತ್ತೆ ಕಣ್ತುಂಬಿಕೊಳ್ಳಲು ಫ್ಯಾನ್ಸ್ ಕಾತುರದಿಂದ ಕಾಯುತ್ತಿದ್ದಾರೆ. ಖಂಡಿತವಾಗಿಯೂ ಈ ಮರು ಬಿಡುಗಡೆ ಕನ್ನಡ ಚಿತ್ರರಂಗದಲ್ಲಿ ಮತ್ತೊಂದು ಹೊಸ ಮೈಲಿಗಲ್ಲಾಗುವ ಸಾಧ್ಯತೆ ಇದೆ.
