ನವದೆಹಲಿ : ಪ್ರಧಾನಮಂತ್ರಿ ಮೋದಿ (PM Modi) ಕೆಂಪುಕೋಟೆಯಿಂದ ನೀಡಿದ್ದ ಸ್ವಾತಂತ್ರ್ಯ ದಿನಾಚರಣೆಯ ಭಾಷಣದಲ್ಲಿ ಪ್ರಸ್ತಾಪಿಸಿದ್ದ ದಿಮಾಗಿ ನಕ್ಸಲರು ಎಂಬ ಪದದ ಬಗ್ಗೆ ಕೇಂದ್ರ ಗೃಹ ಸಚಿವಾಲಯದ ಬಳಿ ಯಾವುದೇ ಅಧಿಕೃತ ಅರ್ಥವಾಗಲಿ, ದಾಖಲೆಯಾಗಲಿ ಇಲ್ಲ ಎಂಬುದು ಮಾಹಿತಿ ಹಕ್ಕು ಕಾಯ್ದೆಯಡಿ ಬಯಲಾಗಿದೆ. ಶಸ್ತ್ರಸಜ್ಜಿತ ನಕ್ಸಲಿಸಂ ಕೊನೆಯ ಹಂತ ತಲುಪಿದೆ, ಆದರೆ ವೈಚಾರಿಕ ನೆಲೆಯಲ್ಲಿ ಕೆಲಸ ಮಾಡುವ ದಿಮಾಗಿ ನಕ್ಸಲರ ಅಪಾಯ ಇನ್ನೂ ಮುಂದುವರಿದಿದೆ, ಅಂಥವರನ್ನು ಪತ್ತೆಹಚ್ಚಿ ದೂರವಿಡಬೇಕು ಎಂದು ಪ್ರಧಾನಿ ಆಗ ಹೇಳಿದ್ದರು. ಈ ಮಾತುಗಳು ರಾಜಕೀಯ ಮತ್ತು ಸಾಮಾಜಿಕ ವಲಯದಲ್ಲಿ ವ್ಯಾಪಕ ಚರ್ಚೆ ಹುಟ್ಟುಹಾಕಿದ್ದವು. ಅದರ ಬೆನ್ನಲ್ಲೇ ಒಬ್ಬ ವ್ಯಕ್ತಿ ಗೃಹ ಸಚಿವಾಲಯಕ್ಕೆ ಆರ್ಟಿಐ ಅರ್ಜಿ ಹಾಕಿ ದಿಮಾಗಿ ನಕ್ಸಲ್ ಎಂಬುದು ಸರ್ಕಾರ ಮಾನ್ಯ ಮಾಡಿದ ವರ್ಗವೇ, ಹಾಗಿದ್ದರೆ ಆ ವರ್ಗಕ್ಕೆ ಸೇರಿದವರ ವಿವರ ನೀಡಬೇಕು ಎಂದು ಕೇಳಿದ್ದರು.
ದಿಮಾಗಿ ನಕ್ಸಲ್ ಎಂದರೆ ಯಾರು ..?
ಈ ಅರ್ಜಿಯಲ್ಲಿ ಒಟ್ಟು ಮೂರು ವಿಷಯಗಳನ್ನು ಕೇಳಲಾಗಿತ್ತು. ಸರ್ಕಾರದ ದಾಖಲೆ ಅಥವಾ ಕಾನೂನುಗಳಲ್ಲಿ ದಿಮಾಗಿ ನಕ್ಸಲ್ ಎಂದರೆ ಯಾರು ಎಂಬುದರ ಸ್ಪಷ್ಟ ವ್ಯಾಖ್ಯಾನವೇನು, ಇಂಥವರ ಪಟ್ಟಿ ಅಥವಾ ಮಾಹಿತಿ ಸಂಗ್ರಹ ಸರ್ಕಾರದ ಬಳಿ ಇದೆಯೇ, ಮತ್ತು ದೇಶದಲ್ಲಿ ಇಂಥವರ ವಿರುದ್ಧ ತೆಗೆದುಕೊಂಡ ಕಾನೂನು ಕ್ರಮಗಳ ವಿವರವೇನು ಎಂಬುದು ಪ್ರಶ್ನೆಗಳಾಗಿದ್ದವು. ಎಷ್ಟು ಜನರು ಅಥವಾ ಸಂಸ್ಥೆಗಳನ್ನು ಬೌದ್ಧಿಕ ನಕ್ಸಲರು ಎಂದು ಗುರುತಿಸಲಾಗಿದೆ ಎಂಬುದನ್ನೂ ಕೇಳಲಾಗಿತ್ತು. ಅಕ್ಟೋಬರ್ 8 ರಂದು ಸ್ವೀಕರಿಸಿದ ಅರ್ಜಿಗೆ ಅಕ್ಟೋಬರ್ 28 ರಂದು ಉತ್ತರಿಸಿದ ಎಡಪಂಥೀಯ ಉಗ್ರವಾದ ವಿಭಾಗದ ಮಾಹಿತಿ ಅಧಿಕಾರಿ, ಕೇಳಿದ ಮಾಹಿತಿ ತಮ್ಮ ವಿಭಾಗದಲ್ಲಿ ಇರಿಸಲಾಗುವ ದಾಖಲೆಗಳಲ್ಲಿ ಸಿಗುತ್ತಿಲ್ಲ, ಹೀಗಾಗಿ ತಮ್ಮ ವಿಭಾಗದ ದೃಷ್ಟಿಯಿಂದ ಉತ್ತರ ಶೂನ್ಯ ಎಂದು ಹೇಳಿದ್ದಾರೆ. ಅಲ್ಲದೆ ಅರ್ಜಿಯನ್ನು ಮಾಹಿತಿ ಹಕ್ಕು ಕಾಯ್ದೆಯ ಸೆಕ್ಷನ್ 6(3) ಅಡಿ ಸಚಿವಾಲಯದ ಇತರ ಅಧಿಕಾರಿಗಳಿಗೆ ವರ್ಗಾಯಿಸಿ, ಮಾಹಿತಿ ಇದ್ದರೆ ನೇರವಾಗಿ ಅರ್ಜಿದಾರರಿಗೆ ನೀಡುವಂತೆ ಸೂಚಿಸಲಾಗಿದೆ.
ಇದನ್ನೂ ಓದಿ : ಇಸ್ರೇಲ್ನಲ್ಲಿ ನೆತನ್ಯಾಹು ಬಣಕ್ಕೆ ಬಹುಮತ ಮಿಸ್, ಸರ್ಕಾರ ರಚನೆಗೆ ಕಗ್ಗಂಟು
ಪ್ರಧಾನಿ ಮೋದಿ ಭಾಷಣದಂತಹ ಅತ್ಯಂತ ಗಂಭೀರ ವೇದಿಕೆಯಿಂದ ಬಳಕೆಯಾದ ಪದಕ್ಕೆ ಸರ್ಕಾರದ ವ್ಯವಸ್ಥೆಯೊಳಗೇ ಯಾವುದೇ ಕಾನೂನಾತ್ಮಕ ನೆಲೆ ಇಲ್ಲದಿರುವುದು ಹಲವು ಪ್ರಶ್ನೆಗಳನ್ನು ಎಬ್ಬಿಸುತ್ತದೆ. ವ್ಯಾಖ್ಯಾನವೇ ಇಲ್ಲದ ಪದವನ್ನು ಸಾರ್ವಜನಿಕ ಚರ್ಚೆಯಲ್ಲಿ ಬಳಸಿದಾಗ, ಅದು ಯಾರನ್ನು ಗುರಿಯಾಗಿಸುತ್ತದೆ ಎಂಬುದು ಸ್ಪಷ್ಟವಾಗುವುದಿಲ್ಲ. ಇದರಿಂದ ಭಿನ್ನಮತ, ಬರಹ, ಚರ್ಚೆ ಮತ್ತು ಟೀಕೆಗಳಲ್ಲಿ ತೊಡಗಿರುವವರನ್ನು ಸುಲಭವಾಗಿ ಅನುಮಾನದ ಕಣ್ಣಿನಿಂದ ನೋಡುವ ಅಪಾಯವಿದೆ. ಒಂದು ಪದಕ್ಕೆ ಅಧಿಕೃತ ಅರ್ಥ ಇಲ್ಲದೆ ಹೋದರೆ, ಅದರ ಆಧಾರದಲ್ಲಿ ಕ್ರಮ ಕೈಗೊಳ್ಳುವುದು ಕಷ್ಟ ಮತ್ತು ಅದು ಕಾನೂನಿನ ಆಡಳಿತದ ತತ್ವಕ್ಕೂ ವಿರುದ್ಧವಾಗುತ್ತದೆ. ಆದ್ದರಿಂದ ಈ ವಿಚಾರ ಕೇವಲ ರಾಜಕೀಯ ವಾಗ್ವಾದಕ್ಕೆ ಸೀಮಿತವಾಗದೆ, ಸರ್ಕಾರಿ ಭಾಷಣಗಳಲ್ಲಿ ಬಳಸುವ ಪದಗಳಿಗೆ ಹೊಣೆಗಾರಿಕೆ ಮತ್ತು ಸ್ಪಷ್ಟತೆ ಇರಬೇಕೆಂಬ ಚರ್ಚೆಯನ್ನು ಮುಂದೆ ತಂದಿದೆ.




