BBK 13: ‘ಬಿಗ್ ಬಾಸ್ ಕನ್ನಡ ಸೀಸನ್ 13’ ಮನೆಯಲ್ಲಿ ದಿನದಿಂದ ದಿನಕ್ಕೆ ಸ್ಪರ್ಧಿಗಳ ನಡುವಿನ ಕಾವು ಮತ್ತು ಜಗಳಗಳು ತೀವ್ರ ಸ್ವರೂಪ ಪಡೆದುಕೊಳ್ಳುತ್ತಿವೆ. ಇತ್ತೀಚಿನ ಸಂಚಿಕೆಯಲ್ಲಿ ನಡೆದ ಕಳಪೆ ಆಯ್ಕೆ ಪ್ರಕ್ರಿಯೆಯು ಮನೆಯೊಳಗೆ ಭಾರೀ ಗದ್ದಲ ಹಾಗೂ ದೊಡ್ಡ ಮಟ್ಟದ ಹೈಡ್ರಾಮಾಗೆ ಸಾಕ್ಷಿಯಾಗಿದೆ. ಇದರಲ್ಲಿ ವೈಲ್ಡ್ ಕಾರ್ಡ್ ಸ್ಪರ್ಧಿಯಾಗಿ ಎಂಟ್ರಿ ಕೊಟ್ಟಿರುವ ಕುಮಾರಿ, ಕಾವ್ಯ ಅವರ ಆಟದ ವೈಖರಿಯನ್ನು ನೇರವಾಗಿ ಪ್ರಶ್ನಿಸಿ ಕಿಡಿಕಾರಿದ್ದಾರೆ.
ಕಾವ್ಯ ಆಟದ ವೈಖರಿ ಮತ್ತು ಸಾಮಾನ್ಯ ಜ್ಞಾನ ಪ್ರಶ್ನಿಸಿದ ಕುಮಾರಿ
ಕಳಪೆ ಆಯ್ಕೆ ಪ್ರಕ್ರಿಯೆಯ ಸಂದರ್ಭದಲ್ಲಿ ಕಾವ್ಯ ಅವರನ್ನೇ ಗುರಿಯಾಗಿಸಿಕೊಂಡ ಕುಮಾರಿ ತೀವ್ರವಾಗಿ ಟೀಕಿಸಿದ್ದಾರೆ. ಮೊದಲ ವಾರದಿಂದಲೂ ಮನೆಯಲ್ಲಿದ್ದರೂ ಆಟದ ನಿಯಮಗಳನ್ನು ಸರಿಯಾಗಿ ಪಾಲಿಸುತ್ತಿಲ್ಲ ಎಂದು ಆರೋಪಿಸಿದ್ದಾರೆ. “ನಿಮಗೆ ಮನಬಂದಂತೆ ನಿಯಮಗಳನ್ನು ಬದಲಾಯಿಸದೆ ಆಟವಾಡಬೇಕು ಎಂಬ ಕನಿಷ್ಠ ಸಾಮಾನ್ಯ ಜ್ಞಾನವೂ ಇಲ್ಲ. ನಿಮ್ಮಲ್ಲಿ ಮಾತು ಮಾತ್ರ ಹೆಚ್ಚಾಗಿದೆ. ಆದರೆ, ಆಟದಲ್ಲಿ ಯಾವುದೇ ಶ್ರಮ ಅಥವಾ ಉತ್ತಮ ಪ್ರದರ್ಶನ ಕಾಣಿಸುತ್ತಿಲ್ಲ” ಎಂದು ಕುಮಾರಿ ನೇರವಾಗಿಯೇ ಚಾಟಿ ಬೀಸಿದ್ದಾರೆ.
ಇದನ್ನು ಓದಿ: BBK 13: ಪವರ್ ಕಾಯಿನ್ ಹಂಚಿಕೆಯಲ್ಲಿ ಗಾನವಿ ಸ್ವಾರ್ಥದ ಆಟ; ಸ್ವಂತ ತಂಡಕ್ಕೇ ಮೋಸ ಮಾಡಿದ್ರಾ ಸ್ಪರ್ಧಿ?
ಕಾವ್ಯ ತಿರುಗೇಟು ಹಾಗೂ ದಂಗಾದ ದೊಡ್ಮನೆ ಸದಸ್ಯರು
ಕುಮಾರಿಯವರ ಈ ನೇರ ಹಾಗೂ ಕಠಿಣ ಆರೋಪದಿಂದ ತೀವ್ರ ಅಸಮಾಧಾನಗೊಂಡ ಕಾವ್ಯ ಕೂಡಲೇ ತಿರುಗೇಟು ನೀಡಿದ್ದಾರೆ. “ನಾನು ಈ ಮನೆಯಲ್ಲಿ ಹೇಗಿರಬೇಕು ಮತ್ತು ಹೇಗೆ ಆಡಬೇಕು ಎಂದು ನೀವು ಹೇಳಿಕೊಡುವ ಅಗತ್ಯವಿಲ್ಲ” ಎಂದು ಗರಂ ಆಗಿದ್ದಾರೆ. ಇದಕ್ಕೆ ಪ್ರತಿಕ್ರಿಯಿಸಿದ ಕುಮಾರಿ, ಕಾವ್ಯ ಅವರ ಆಟದಲ್ಲಿ ಯಾವುದೇ ಬುದ್ಧಿವಂತಿಕೆ ಅಥವಾ ಸ್ವಂತ ನಿರ್ಧಾರ ತೆಗೆದುಕೊಳ್ಳುವ ಸಾಮರ್ಥ್ಯ ಕಾಣಿಸುತ್ತಿಲ್ಲ ಎಂದು ಮತ್ತಷ್ಟು ವಾಗ್ದಾಳಿ ನಡೆಸಿದ್ದಾರೆ. ಹೊಸದಾಗಿ ಬಂದ ವೈಲ್ಡ್ ಕಾರ್ಡ್ ಸ್ಪರ್ಧಿಯೊಬ್ಬರು ಹಳೆಯ ಸ್ಪರ್ಧಿಗೆ ಈ ಮಟ್ಟಿಗೆ ನೇರವಾಗಿ ಮಾತಿನ ಬಾಣ ಬಿಟ್ಟಿರುವುದನ್ನು ನೋಡಿ ಇಡೀ ದೊಡ್ಮನೆಯ ಸದಸ್ಯರು ಒಂದು ಕ್ಷಣ ದಂಗಾಗಿ ಹೋಗಿದ್ದಾರೆ.
BBK 13: ರದ್ದಾದ ಪಜಲ್ ಟಾಸ್ಕ್ ಮತ್ತು ಇತರೆ ಆರೋಪ-ಪ್ರತ್ಯಾರೋಪಗಳು
ಈ ವಾಗ್ವಾದಕ್ಕೆ ‘ಪಜಲ್ ಪೈಪೋಟಿ’ ಟಾಸ್ಕ್‌ನ ವೈಫಲ್ಯವೇ ಪ್ರಮುಖ ಕಾರಣವಾಗಿದೆ. ಈ ಟಾಸ್ಕ್‌ನ ಉಸ್ತುವಾರಿಯನ್ನು ಕಾವ್ಯ ಮತ್ತು ಗಾನವಿ ವಹಿಸಿಕೊಂಡಿದ್ದರು. ಆದರೆ ಆಟ ಆರಂಭವಾದ ಬಳಿಕ ಸ್ಪರ್ಧಿಗಳು ತಮಗೆ ಅನುಕೂಲವಾಗುವಂತೆ ನಿಯಮಗಳನ್ನು ಬದಲಾಯಿಸಿಕೊಂಡಿದ್ದರು. ಇದರಿಂದ ಅಸಮಾಧಾನಗೊಂಡ ಬಿಗ್ ಬಾಸ್, ಇಡೀ ಟಾಸ್ಕ್ ಅನ್ನೇ ರದ್ದುಗೊಳಿಸಿದ್ದರು. ಇದರ ಪರಿಣಾಮವಾಗಿ ನಾಲ್ವರು ಸ್ಪರ್ಧಿಗಳು ಕ್ಯಾಪ್ಟನ್ಸಿ ರೇಸ್‌ನಿಂದ ಹೊರಗುಳಿಯುವಂತಾಯಿತು.
ಕಳಪೆ ಪಟ್ಟದ ವಿಚಾರ ಕೇವಲ ಕುಮಾರಿ ಮತ್ತು ಕಾವ್ಯಗೆ ಸೀಮಿತವಾಗಿರದೆ, ತಾಂಡವ್ ರಾಮ್ ಹಾಗೂ ಯಶಸ್ ಅವರು ಕಿರಣ್ ಅವರನ್ನು ಗುರಿಯಾಗಿಸಿಕೊಂಡು “ಮಾತುಮಾತಿಗೂ ಸುಳ್ಳು ಹೇಳುತ್ತಾರೆ” ಎಂದು ಗಂಭೀರ ಆರೋಪ ಮಾಡುವುದರ ಮೂಲಕ ಮನೆಯಲ್ಲಿ ವಿವಾದಗಳನ್ನು ಮತ್ತಷ್ಟು ಹೆಚ್ಚಿಸಿದ್ದಾರೆ.
