ಇಸ್ಲಾಮಾಬಾದ್ : ಸದ್ಯ ಪಾಕಿಸ್ತಾನದ (Pakistan) ರಾಜಕೀಯ ನಕ್ಷೆಯನ್ನೇ ಬದಲಾಯಿಸಬಲ್ಲ ದೊಡ್ಡ ಯೋಜನೆಯೊಂದು ಚರ್ಚೆಯಲ್ಲಿದೆ. ಪಾಕಿಸ್ತಾನ ಸೇನೆಯ ಮುಖ್ಯಸ್ಥ ಫೀಲ್ಡ್ ಮಾರ್ಷಲ್ ಆಸಿಮ್ ಮುನೀರ್ ಅವರು ದೇಶದಲ್ಲಿರುವ ನಾಲ್ಕು ದೊಡ್ಡ ಪ್ರಾಂತ್ಯಗಳನ್ನು ಒಡೆದು ಚಿಕ್ಕ ಚಿಕ್ಕ ರಾಜ್ಯಗಳಾಗಿ ಮಾಡಲು ಆಲೋಚಿಸಿದ್ದಾರೆ ಎಂಬ ವರದಿಗಳು ಹೊರಬಿದ್ದಿವೆ. ಸದ್ಯ ಪಂಜಾಬ್, ಸಿಂಧ್, ಖೈಬರ್ ಪಖ್ತುಂಖ್ವಾ ಮತ್ತು ಬಲೂಚಿಸ್ತಾನ್ ಎಂಬ ನಾಲ್ಕು ಪ್ರಾಂತ್ಯಗಳು ಪಾಕಿಸ್ತಾನದಲ್ಲಿವೆ. ಇವುಗಳ ಸ್ಥಾನದಲ್ಲಿ 12 ರಿಂದ 15 ಹೊಸ ಪ್ರಾಂತ್ಯಗಳನ್ನು ಅಥವಾ ಸುಮಾರು 160 ಸಣ್ಣ ಆಡಳಿತ ಘಟಕಗಳನ್ನು ಸೃಷ್ಟಿಸುವುದು ಅವರ ಗುರಿಯಾಗಿದೆ ಎಂದು ದಿ ಎಕನಾಮಿಸ್ಟ್ ವರದಿ ಮಾಡಿದೆ.
ಆಡಳಿತ ಸುಧಾರಣೆಯ ನೆಪ !
ಈಗಿರುವ ಪ್ರಾಂತ್ಯಗಳು ಅತಿಯಾಗಿ ದೊಡ್ಡದಾಗಿರುವ ಕಾರಣ ಆಡಳಿತ ನಡೆಸುವುದು ಕಷ್ಟಕರವಾಗಿದೆ ಮತ್ತು ಇದೇ ಕಾರಣದಿಂದ ದೇಶದ ಅಭಿವೃದ್ಧಿ ಕುಂಠಿತವಾಗಿದೆ ಎಂಬುದು ಮುನೀರ್ ಅವರ ವಾದವಾಗಿದೆ. ಇದು ಕೇವಲ ಆಡಳಿತ ಸುಧಾರಣೆ ಮಾತ್ರವಲ್ಲ, ಇಡೀ ಆಡಳಿತ ವ್ಯವಸ್ಥೆಯ ಸ್ವರೂಪವನ್ನೇ ಬದಲಾಯಿಸುವ ಪ್ರಸ್ತಾಪವಾಗಿದೆ. ದೊಡ್ಡ ಪ್ರಾಂತ್ಯಗಳನ್ನು ವಿಭಜಿಸುವುದರಿಂದ ಅಲ್ಲಿನ ಪ್ರಬಲ ಪ್ರಾದೇಶಿಕ ಪಕ್ಷಗಳು ಮತ್ತು ಪರ್ಯಾಯ ಅಧಿಕಾರ ಕೇಂದ್ರಗಳು ದುರ್ಬಲಗೊಳ್ಳುತ್ತವೆ. ಇದರಿಂದ ಕೇಂದ್ರದ ಹಿಡಿತ, ಅದರಲ್ಲೂ ಸೇನಾ ಸಂಸ್ಥೆಯ ನಿಯಂತ್ರಣ ಇಡೀ ದೇಶದ ಮೇಲೆ ಮತ್ತಷ್ಟು ಬಿಗಿಯಾಗಲಿದೆ ಎಂಬ ವಿಶ್ಲೇಷಣೆಯೂ ಕೇಳಿಬರುತ್ತಿದೆ. ಈ ಯೋಜನೆ ಕೇವಲ ಗಡಿಗಳನ್ನು ಬದಲಾಯಿಸುವುದಲ್ಲ, ಅಧಿಕಾರ ಹಂಚಿಕೆಯ ಮೂಲ ರಚನೆಯನ್ನೇ ಅಲುಗಾಡಿಸಲಿದೆ.
ಇದನ್ನೂ ಓದಿ : ಜ್ಞಾನೇಶ್ ಕುಮಾರ್ ರಾಜೀನಾಮೆಗೆ ಪಟ್ಟು – ಇಂದು ರಾಷ್ಟ್ರಪತಿ ಭವನಕ್ಕೆ ಇಂಡಿಯಾ ಬ್ಲಾಕ್ ಮೆರವಣಿಗೆ
ಪಾಕಿಸ್ತಾನದಲ್ಲಿ ಇಂತಹ ಪ್ರಾಂತ್ಯ ವಿಭಜನೆಯ ಕಲ್ಪನೆ ಹೊಸದೇನಲ್ಲ, ಆದರೆ ಸೇನಾ ಮುಖ್ಯಸ್ಥರೊಬ್ಬರು ನೇರವಾಗಿ ಈ ವಿಚಾರವನ್ನು ಮುಂದಿಡುತ್ತಿರುವುದು ಹಲವು ಅನುಮಾನಗಳಿಗೆ ಕಾರಣವಾಗಿದೆ. ಪಾಕಿಸ್ತಾನದ ಇತಿಹಾಸದಲ್ಲಿ ಸೇನೆ ಯಾವಾಗಲೂ ರಾಜಕೀಯದ ಕೇಂದ್ರದಲ್ಲಿದೆ. ದೊಡ್ಡ ಪ್ರಾಂತ್ಯಗಳಲ್ಲಿ ಪಂಜಾಬ್ ನಂತಹ ಕಡೆ ಜನಸಂಖ್ಯೆ ಮತ್ತು ರಾಜಕೀಯ ಪ್ರಭಾವ ಹೆಚ್ಚಿದ್ದು, ಅಲ್ಲಿ ಪ್ರಾದೇಶಿಕ ನಾಯಕರು ಕೇಂದ್ರವನ್ನು ಪ್ರಶ್ನಿಸುವಷ್ಟು ಶಕ್ತಿಶಾಲಿಗಳಾಗಿದ್ದಾರೆ. ಸಿಂಧ್ ಮತ್ತು ಬಲೂಚಿಸ್ತಾನ್ ನಲ್ಲಿ ಈಗಾಗಲೇ ಪ್ರತ್ಯೇಕತಾವಾದಿ ಭಾವನೆಗಳು ಮತ್ತು ಕೇಂದ್ರದ ವಿರುದ್ಧ ಅಸಮಾಧಾನ ಇದೆ. ಇಂತಹ ಸಂದರ್ಭದಲ್ಲಿ ಸಣ್ಣ ರಾಜ್ಯಗಳ ರಚನೆಯು ಆಡಳಿತ ದಕ್ಷತೆ ಹೆಚ್ಚಿಸುತ್ತದೆ ಎಂಬ ಕಾರಣ ನೀಡಿದರೂ, ಅದರ ಹಿಂದಿನ ನಿಜವಾದ ಉದ್ದೇಶ ಅಧಿಕಾರವನ್ನು ವಿಕೇಂದ್ರೀಕರಣದ ಹೆಸರಿನಲ್ಲಿ ಮತ್ತಷ್ಟು ಕೇಂದ್ರೀಕರಿಸುವುದಾಗಿದೆ.
ಇದರಿಂದ ಸೇನೆಗೆ ಪ್ರಾದೇಶಿಕ ನಾಯಕರನ್ನು ನಿಯಂತ್ರಿಸುವುದು ಸುಲಭವಾಗುತ್ತದೆ. ಜೊತೆಗೆ ಬಲೂಚಿಸ್ತಾನ್ ನಂತಹ ಸೂಕ್ಷ್ಮ ಪ್ರದೇಶವನ್ನು ಸಣ್ಣ ಭಾಗಗಳಾಗಿ ಒಡೆದರೆ ಅಲ್ಲಿನ ಚಳವಳಿಯನ್ನು ಹತ್ತಿಕ್ಕಲು ಅನುಕೂಲವಾಗುತ್ತದೆ ಎಂಬ ಲೆಕ್ಕಾಚಾರವೂ ಇದರಲ್ಲಿದೆ. ಆದರೆ ಈ ಯೋಜನೆ ಜಾರಿಯಾದರೆ ಪಾಕಿಸ್ತಾನದ ಒಕ್ಕೂಟ ವ್ಯವಸ್ಥೆಗೆ ದೊಡ್ಡ ಹೊಡೆತ ಬೀಳಲಿದೆ. ಹೊಸ ಪ್ರಾಂತ್ಯಗಳ ಬೇಡಿಕೆ ಈಗಾಗಲೇ ಇರುವ ಜನಾಂಗೀಯ ಸಂಘರ್ಷಗಳನ್ನು ಮತ್ತಷ್ಟು ಹೆಚ್ಚಿಸಬಹುದು. ಸಂವಿಧಾನ ತಿದ್ದುಪಡಿ, ಸಂಪನ್ಮೂಲ ಹಂಚಿಕೆ ಮತ್ತು ಹೊಸ ರಾಜಧಾನಿಗಳ ನಿರ್ಮಾಣದಂತಹ ಸವಾಲುಗಳು ಎದುರಾಗುತ್ತವೆ. ಮುನೀರ್ ಈ ನಡೆಯು ಆಡಳಿತ ಸುಧಾರಣೆಯೋ ಅಥವಾ ಸೇನಾ ಪ್ರಭುತ್ವವನ್ನು ಶಾಶ್ವತಗೊಳಿಸುವ ತಂತ್ರವೋ ಎಂಬುದು ಮುಂದಿನ ದಿನಗಳಲ್ಲಿ ಸ್ಪಷ್ಟವಾಗಲಿದೆ.
