ನವದೆಹಲಿ: ಪ್ರಧಾನಮಂತ್ರಿ ನರೇಂದ್ರ ಮೋದಿ (PM Modi) ಅವರು ಸಾರ್ವಜನಿಕ ಸೇವೆಯಲ್ಲಿ ಸತತ 25 ವರ್ಷಗಳ ಆಡಳಿತಾವಧಿಯನ್ನು ಯಶಸ್ವಿಯಾಗಿ ಪೂರೈಸಿದ ಅಪೂರ್ವ ಮೈಲಿಗಲ್ಲನ್ನು ಸ್ಮರಿಸಿ, ಕೇಂದ್ರ ಸಚಿವ ಸಂಪುಟ ವಿಶೇಷ ಅಭಿನಂದನಾ ನಿರ್ಣಯವನ್ನು ಅಂಗೀಕರಿಸಿದೆ. ಈ ಐತಿಹಾಸಿಕ ಸಂದರ್ಭವನ್ನು ಕುರಿತು ಮಾಹಿತಿ ಮತ್ತು ಪ್ರಸಾರ ಸಚಿವ ಅಶ್ವಿನಿ ವೈಷ್ಣವ್‌ ವಿವರಣೆ ನೀಡಿದ್ದು, ದೇಶ ಮತ್ತು ನಾಗರಿಕರ ಹಿತಾಸಕ್ತಿಯೇ ಪ್ರಥಮ ಎಂಬ ಸಿದ್ಧಾಂತದೊಂದಿಗೆ ಸಾಗಿಬಂದ ಮೋದಿಯವರ ಈ ಪಯಣ ಕೇವಲ ಸಾಂಪ್ರದಾಯಿಕ ಗೌರವಕ್ಕೆ ಸೀಮಿತವಾಗಿರದೆ, ಅವರ ದಕ್ಷ ಆಡಳಿತಕ್ಕೆ ಹಿಡಿದ ಕನ್ನಡಿಯಾಗಿದೆ ಎಂದು ಬಣ್ಣಿಸಿದ್ದಾರೆ. ಗುಜರಾತ್ ಮುಖ್ಯಮಂತ್ರಿಯಾಗಿ ನೀಡಿದ ಯಶಸ್ವಿ ನಾಯಕತ್ವ ಹಾಗೂ ಆ ಬಳಿಕ ಪ್ರಧಾನಿಯಾಗಿ ದೇಶವನ್ನು ಮುನ್ನಡೆಸುತ್ತಿರುವ ಶೈಲಿಯಲ್ಲಿ ಕಂಡುಬಂದಿರುವ ನಿರಂತರತೆಯನ್ನು ಸಚಿವ ಸಂಪುಟ ಪ್ರಮುಖ ಹತ್ತು ಅಂಶಗಳ ಮೂಲಕ ಗುರುತಿಸಿದೆ. ಗುಜರಾತಿನಲ್ಲಿ ಜನಸಾಮಾನ್ಯರ ಕುಂದುಕೊರತೆ ಆಲಿಸಲು ಜಾರಿಗೆ ತಂದ ‘ಸ್ವಾಗತ್’ ವ್ಯವಸ್ಥೆ ಮುಂದೆ ರಾಷ್ಟ್ರಮಟ್ಟದ ‘ಪ್ರಗತಿ’ ಯೋಜನೆಗೆ ಪ್ರೇರಣೆಯಾದರೆ, ಗ್ರಾಮೀಣ ವಿದ್ಯುದೀಕರಣದ ‘ಜ್ಯೋತಿಗ್ರಾಮ’ ಪರಿಕಲ್ಪನೆಯು ದೇಶಾದ್ಯಂತ ವಿಸ್ತರಣೆಯಾಯಿತು. ಬಡತನದ ಕಷ್ಟಗಳನ್ನು ಹತ್ತಿರದಿಂದ ಕಂಡಿದ್ದ ಮೋದಿ, ಆ ಅನುಭವಗಳನ್ನೇ ಸಾರ್ವಜನಿಕ ನೀತಿಗಳನ್ನಾಗಿ ಪರಿವರ್ತಿಸಿ ಜನ್ ಧನ್, ಉಚಿತ ವಸತಿ ಹಾಗೂ ನೈರ್ಮಲ್ಯ ಯೋಜನೆಗಳ ಮೂಲಕ ಕೋಟ್ಯಂತರ ಜನರನ್ನು ಬಡತನದಿಂದ ಹೊರತಂದಿದ್ದಾರೆ.
ಇದನ್ನೂ ಓದಿ : ಸಿಇಸಿ ಜ್ಞಾನೇಶ್ ಕುಮಾರ್ ವಜಾಕ್ಕೆ ಆಗ್ರಹ – ರಸ್ತೆಗಿಳಿದ ಇಂಡಿಯಾ ಮೈತ್ರಿಕೂಟ, ಧರಣಿ ಕುಳಿತ ರಾಹುಲ್
ಮಹಿಳಾ ಸಬಲೀಕರಣಕ್ಕಾಗಿ ತಂದ ‘ಲಖ್‌ಪತಿ ದೀದಿ’ ಮತ್ತು ನಾರಿ ಶಕ್ತಿ ವಂದನ್ ಕಾಯ್ದೆಗಳು, ರೈತರಿಗಾಗಿ ಪಿಎಂ-ಕಿಸಾನ್ ಹಾಗೂ ಬುಡಕಟ್ಟು ಸಮುದಾಯಗಳ ಪ್ರಗತಿಗೆ ರೂಪಿಸಿದ ಪಿಎಂ-ಜನ್-ಮನ್ ಯೋಜನೆಗಳು ಸರ್ಕಾರದ ಒಳಗೊಳ್ಳುವಿಕೆಯ ಆಡಳಿತಕ್ಕೆ ಸಾಕ್ಷಿಯಾಗಿವೆ. ಜಿಎಸ್‌ಟಿ ಜಾರಿ, ಬ್ರಿಟಿಷ್ ಕಾಲದ ಕಾನೂನುಗಳ ರದ್ದು ಮತ್ತು ಡಿಜಿಟಲ್ ಪಾವತಿಯಂತಹ ಕಠಿಣ ನಿರ್ಧಾರಗಳು ರಾಜಕೀಯ ಸವಾಲುಗಳ ನಡುವೆಯೂ ಅವರ ಸುಧಾರಣಾವಾದಿ ಧೋರಣೆಯನ್ನು ಎತ್ತಿಹಿಡಿದಿವೆ. ದೇಶದ ಮೂಲಸೌಕರ್ಯ ವೆಚ್ಚವನ್ನು ಭಾರಿ ಪ್ರಮಾಣದಲ್ಲಿ ಹೆಚ್ಚಿಸಿರುವುದು, ಸೇನಾ ಉಪಕರಣಗಳು ಹಾಗೂ ಎಲೆಕ್ಟ್ರಾನಿಕ್ಸ್ ಉತ್ಪಾದನೆಯಲ್ಲಿ ಭಾರತವನ್ನು ಸ್ವಾವಲಂಬಿಯಾಗಿಸಿರುವುದು ಮತ್ತು ಯುಪಿಐ ಮೂಲಕ ತಂತ್ರಜ್ಞಾನವನ್ನು ಸಾಮಾನ್ಯರಿಗೂ ತಲುಪಿಸಿರುವುದು ಅವರ ದೂರದೃಷ್ಟಿಯನ್ನು ತೋರಿಸುತ್ತದೆ. ಕರೋನಾ ಸಾಂಕ್ರಾಮಿಕ ಹಾಗೂ ಜಾಗತಿಕ ಬಿಕ್ಕಟ್ಟುಗಳನ್ನು ಸಮರ್ಥವಾಗಿ ನಿಭಾಯಿಸಿದ್ದಲ್ಲದೆ, ಸರ್ಜಿಕಲ್ ಸ್ಟ್ರೈಕ್, ಆರ್ಟಿಕಲ್ 370 ರದ್ದು ಮತ್ತು ಗಡಿ ಭದ್ರತೆಯ ಮೂಲಕ ದೇಶದ ರಕ್ಷಣಾ ನೀತಿಯಲ್ಲಿ ದೃಢ ನಿಲುವು ತಳೆಯಲಾಗಿದೆ. G20 ಮತ್ತು ಬ್ರಿಕ್ಸ್ ವೇದಿಕೆಗಳಲ್ಲಿ ಜಾಗತಿಕ ದಕ್ಷಿಣದ ಧ್ವನಿಯಾಗಿ ಭಾರತದ ಗಂಭೀರತೆಯನ್ನು ಹೆಚ್ಚಿಸಿದ ಮೋದಿ ನಾಯಕತ್ವವು, ೨೦೪೭ರ ವೇಳೆಗೆ ವಿಕಸಿತ ಹಾಗೂ ಸ್ವಾವಲಂಬಿ ಭಾರತ ನಿರ್ಮಿಸುವ ಸಂಕಲ್ಪದೊಂದಿಗೆ ಸಾಗಿದೆ.
ಅಭಿನಂದನಾ ನಿರ್ಣಯ ಅಂಗೀಕಾರ !
ಈ ನಿರ್ಣಯ ಪ್ರಧಾನಿ ಮೋದಿಯವರ ಆಡಳಿತ ವೈಖರಿಯನ್ನು ಕೇವಲ ಶ್ಲಾಘಿಸುವುದಲ್ಲದೆ, ಭಾರತೀಯ ರಾಜಕೀಯ ಇತಿಹಾಸದಲ್ಲಿ ನಾಯಕನೊಬ್ಬನ ದೀರ್ಘಕಾಲದ ಪ್ರಭಾವವನ್ನು ವಿಶ್ಲೇಷಿಸಲು ಸೂಕ್ತ ಅವಕಾಶ ಒದಗಿಸುತ್ತದೆ. ರಾಜ್ಯಮಟ್ಟದ ಯಶಸ್ವಿ ಮಾದರಿಗಳನ್ನು ರಾಷ್ಟ್ರೀಯ ಯೋಜನೆಗಳಾಗಿ ಪರಿವರ್ತಿಸಿದ ಸಫಲತೆ ಮತ್ತು ಪ್ರಜಾಪ್ರಭುತ್ವ ವ್ಯವಸ್ಥೆಯಲ್ಲಿ ಸತತವಾಗಿ ಜನಾದೇಶ ಪಡೆಯುವ ಕೌಶಲವೇ ಅವರ ರಾಜಕೀಯ ಯಶಸ್ಸಿನ ಮೂಲತತ್ವವಾಗಿದೆ. ಡಿಜಿಟಲ್ ತಂತ್ರಜ್ಞಾನವನ್ನು ಆಡಳಿತದಲ್ಲಿ ಅಳವಡಿಸಿ ಕೊನೆಯ ಮೈಲಿಗೂ ತಲುಪಿಸಿದ್ದು ಮತ್ತು ರಕ್ಷಣಾ ಕ್ಷೇತ್ರದಲ್ಲಿ ಕಠಿಣ ನಿರ್ಧಾರಗಳನ್ನು ತೆಗೆದುಕೊಂಡಿರುವುದು ಭಾರತದ ಜಾಗತಿಕ ವರ್ಚಸ್ಸನ್ನು ಬದಲಾಯಿಸಿದೆ. ಆದರೆ, ಈ 25 ವರ್ಷಗಳ ಸಾಧನೆಗಳ ಜತೆಗೆ ಉದ್ಯೋಗ ಸೃಷ್ಟಿ, ಗ್ರಾಮೀಣ ಆರ್ಥಿಕತೆಯ ಸುಧಾರಣೆ ಮತ್ತು ಬಂಡವಾಳ ಹೂಡಿಕೆಯಂತಹ ಪ್ರಸ್ತುತ ಆರ್ಥಿಕ ಸವಾಲುಗಳನ್ನು ನಿಭಾಯಿಸುವುದು ಇಂದಿನ ತುರ್ತು ಅಗತ್ಯವಾಗಿದೆ. ಕೇಂದ್ರ ಸರ್ಕಾರವು ಇಟ್ಟುಕೊಂಡಿರುವ ೨೦೪೭ರ ‘ವಿಕಸಿತ ಭಾರತ’ದ ಗುರಿಯನ್ನು ತಲುಪಲು ಆಡಳಿತಾತ್ಮಕ ಸುಧಾರಣೆಗಳನ್ನು ಕೇವಲ ಯೋಜನಾ ಹಂತದಲ್ಲಷ್ಟೇ ಇಡದೆ, ಎಲ್ಲ ವರ್ಗದ ಜನರಿಗೂ ಆರ್ಥಿಕ ಸಮಾನತೆ ಸಿಗುವಂತೆ ಅನುಷ್ಠಾನಗೊಳಿಸುವುದು ಮುಂದಿನ ಹಾದಿಯ ಪ್ರಮುಖ ಪರೀಕ್ಷೆಯಾಗಲಿದೆ.
