ಬೆಂಗಳೂರು : ಕರ್ನಾಟಕ ರಾಜಕೀಯವನ್ನು ಬೆಚ್ಚಿಬೀಳಿಸಿರುವ ಸ್ಟಿಂಗ್ ಆಪರೇಷನ್ (Sting operation) ಪ್ರಕರಣ ದಿನಕ್ಕೊಂದು ಹೊಸ ತಿರುವು ಪಡೆಯುತ್ತಿದ್ದು, ಸರ್ಕಾರ ಮತ್ತು ವಿರೋಧ ಪಕ್ಷಗಳ ನಡುವೆ ವಾಕ್ಸಮರ ತೀವ್ರವಾಗಿದೆ. ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರು ತಮ್ಮನ್ನು ಮತ್ತು ಸಂಪುಟದ ಐದು ಮಂದಿ ಸಚಿವರನ್ನು ಸಿಲುಕಿಸಲು ಸ್ಟಿಂಗ್ ಯತ್ನ ನಡೆದಿದೆ ಎಂದು ಸಚಿವ ಸಂಪುಟ ಸಭೆಯಲ್ಲಿ ಎಚ್ಚರಿಕೆ ನೀಡಿದ್ದರು. ಈ ಹೇಳಿಕೆ ಬೆನ್ನಲ್ಲೇ ಕೇಂದ್ರ ಸಚಿವ ಹೆಚ್.ಡಿ. ಕುಮಾರಸ್ವಾಮಿ ಅವರು ಮುಖ್ಯಮಂತ್ರಿಯವರು ವಸಂತನಗರದ ಫೈವ್ ಸ್ಟಾರ್ ಹೋಟೆಲ್ ಒಂದರಲ್ಲಿ ಸ್ಟಿಂಗ್ ಆಪರೇಷನ್ ಗೆ ಸಂಬಂಧಿಸಿದ ವ್ಯಕ್ತಿಯೊಂದಿಗೆ ಗಂಟೆಗಟ್ಟಲೆ ರಹಸ್ಯ ಸಭೆ ನಡೆಸಿದ್ದಾರೆ ಎಂದು ಆರೋಪಿಸಿ, ಆ ವ್ಯಕ್ತಿ ಯಾರು, ಚರ್ಚೆಯಾದ ವಿಷಯವೇನು ಮತ್ತು ಗುರಿಯಾಗಿರುವ ಐದು ಸಚಿವರು ಯಾರು ಎಂದು ಬಹಿರಂಗಪಡಿಸಬೇಕೆಂದು ಆಗ್ರಹಿಸಿದ್ದಾರೆ.
ಸ್ಟಿಂಗ್ ಕೇಸ್ ನಲ್ಲಿ ಯಾವುದೇ ವಿಶೇಷ ತನಿಖೆಯಿಲ್ಲ..!
ಈ ಗಂಭೀರ ಬೆಳವಣಿಗೆಯ ಹಿನ್ನೆಲೆಯಲ್ಲಿ ನಡೆದ ಮಹತ್ವದ ಸಚಿವ ಸಂಪುಟ ಸಭೆಯಲ್ಲಿ ಚರ್ಚೆ ನಡೆಸಿದ ಸರ್ಕಾರ, ಸದ್ಯಕ್ಕೆ ಯಾವುದೇ ವಿಶೇಷ ಅಥವಾ ಉನ್ನತ ಮಟ್ಟದ ತನಿಖೆಗೆ ಆದೇಶಿಸದಿರಲು ನಿರ್ಧರಿಸಿದೆ. ಬದಲಿಗೆ ಈಗಾಗಲೇ ನಡೆಯುತ್ತಿರುವ ತನಿಖೆಯನ್ನೇ ಮುಂದುವರಿಸಲು ಮತ್ತು ಲಭ್ಯವಿರುವ ದಾಖಲೆ, ಸಾಕ್ಷ್ಯಗಳ ಆಧಾರದಲ್ಲಿ ಕಾನೂನು ಕ್ರಮ ಕೈಗೊಳ್ಳಲು ತೀರ್ಮಾನಿಸಿದೆ.
ಇದನ್ನೂ ಓದಿ : ಸ್ಟಿಂಗ್ ಆರೋಪಿ ಬಂಧನಕ್ಕೆ ಕುಮಾರಸ್ವಾಮಿ 48 ಗಂಟೆಗಳ ಗಡುವು
ಈ ಪ್ರಕರಣ ರಾಜಕೀಯ ಅಸ್ತ್ರವಾಗಿ ಬದಲಾಗಿದ್ದು, ಕಾಂಗ್ರೆಸ್ ಸರ್ಕಾರದ ಮೌನದ ಬಗ್ಗೆ ವಿರೋಧ ಪಕ್ಷಗಳು ಪ್ರಶ್ನೆ ಎತ್ತಿವೆ. ಪೊಲೀಸ್ ಕಮಿಷನರ್ ಕಚೇರಿಯಲ್ಲಿ ಕುಮಾರಸ್ವಾಮಿ ನಡೆಸಿದ ದಿಢೀರ್ ಧರಣಿಗೆ ಬೆಂಬಲ ಸೂಚಿಸಲು ಆಗಮಿಸಿದ ಶಾಸಕ ಬಸನಗೌಡ ಪಾಟೀಲ್ ಯತ್ನಾಳ್ ಅವರು ಸರ್ಕಾರದ ವಿರುದ್ಧ ವಾಗ್ದಾಳಿ ನಡೆಸಿದರು. ಕುಮಾರಸ್ವಾಮಿ ಅವರು ಸರ್ಕಾರದ ಹಗರಣಗಳನ್ನು ಒಂದೊಂದಾಗಿ ಹೊರಗೆಳೆಯುತ್ತಿದ್ದಾರೆ, ಅವರ ಹೋರಾಟಕ್ಕೆ ನೈತಿಕ ಬೆಂಬಲ ನೀಡಲು ಬಂದಿದ್ದೇನೆ. ನಾವು ಯಾವುದೇ ಹಲ್ಕಾ ಕೆಲಸ ಮಾಡಿಲ್ಲ, ಯಾರ ಬೆದರಿಕೆಗೂ ಹೆದರುವುದಿಲ್ಲ, ಬೀದಿ ರೌಡಿಗಳಿಗೆ ಧಮ್ಕಿ ಹಾಕಿದಂತೆ ನಮ್ಮ ಮೇಲೆ ಪ್ರತಾಪ ತೋರಿಸಬೇಡಿ ಎಂದು ಯತ್ನಾಳ್ ಗುಡುಗಿದ್ದಾರೆ. ಮತ್ತೊಂದೆಡೆ ಮುಖ್ಯಮಂತ್ರಿ ಶಿವಕುಮಾರ್ ಅವರು ಸುದ್ದಿಗಾರರ ಪ್ರಶ್ನೆಗೆ ಪ್ರತಿಕ್ರಿಯಿಸದೆ, ಕೈಮುಗಿದು ಒಳ್ಳೆಯದಾಗಲಿ ಎಂದಷ್ಟೇ ಹೇಳಿ ಹೊರನಡೆದಿದ್ದು, ಸರ್ಕಾರದ ನಡೆ ಮತ್ತಷ್ಟು ಕುತೂಹಲ ಕೆರಳಿಸಿದೆ.
ಈ ಬೆಳವಣಿಗೆಯನ್ನು ಸೂಕ್ಷ್ಮವಾಗಿ ಗಮನಿಸಿದರೆ ಇದು ಕೇವಲ ಸ್ಟಿಂಗ್ ಆಪರೇಷನ್ ವಿವಾದವಾಗಿ ಉಳಿದಿಲ್ಲ, ಬದಲಿಗೆ ಅಧಿಕಾರದೊಳಗಿನ ವಿಶ್ವಾಸದ ಬಿಕ್ಕಟ್ಟು ಮತ್ತು ಪ್ರತಿಪಕ್ಷಗಳ ರಾಜಕೀಯ ಕಾರ್ಯತಂತ್ರದ ಭಾಗವಾಗಿ ಮಾರ್ಪಟ್ಟಿದೆ. ಸರ್ಕಾರ ಉನ್ನತ ಮಟ್ಟದ ತನಿಖೆಗೆ ಹಿಂದೇಟು ಹಾಕಿರುವುದರ ಹಿಂದೆ ಎರಡು ರೀತಿಯ ಲೆಕ್ಕಾಚಾರಗಳಿವೆ ಎಂದು ವಿಶ್ಲೇಷಿಸಬಹುದು. ಒಂದು ವೇಳೆ ವಿಶೇಷ ತನಿಖಾ ತಂಡ ಅಥವಾ ನ್ಯಾಯಾಂಗ ತನಿಖೆಗೆ ವಹಿಸಿದರೆ, ಸರ್ಕಾರದ ಆಂತರಿಕ ಮಾಹಿತಿಗಳು, ಸಚಿವರ ನಡುವಿನ ಭಿನ್ನಾಭಿಪ್ರಾಯಗಳು ಮತ್ತು ಆಡಳಿತದ ದೌರ್ಬಲ್ಯಗಳು ಸಾರ್ವಜನಿಕವಾಗಿ ಚರ್ಚೆಗೆ ಬರಬಹುದು ಎಂಬ ಆತಂಕವಿದೆ.
ಇನ್ನು ಎರಡನೆಯದಾಗಿ ಸ್ಟಿಂಗ್ ಮಾಡಲು ಯತ್ನಿಸಿದವರ ಹಿಂದೆ ಯಾರಿದ್ದಾರೆ ಎಂದು ತನಗೆ ಗೊತ್ತಿದೆ ಎಂದು ಮುಖ್ಯಮಂತ್ರಿಗಳೇ ಹೇಳಿಕೊಂಡಿರುವುದರಿಂದ, ಈಗ ಉನ್ನತ ತನಿಖೆಗೆ ಆದೇಶಿಸಿದರೆ ಆ ಹೇಳಿಕೆಯನ್ನು ಸಾಬೀತುಪಡಿಸುವ ಒತ್ತಡ ಸರ್ಕಾರದ ಮೇಲೆ ಬೀಳುತ್ತದೆ. ಅದನ್ನು ತಪ್ಪಿಸಿಕೊಳ್ಳಲು ಪ್ರಚಲಿತ ತನಿಖೆಯಲ್ಲೇ ಸಾಕ್ಷ್ಯ ಸಂಗ್ರಹವಾಗಿದೆ ಎಂಬ ಸಮರ್ಥನೆ ನೀಡಲಾಗುತ್ತಿದೆ. ಆದರೆ ವಿರೋಧ ಪಕ್ಷಗಳಿಗೆ ಇದು ದೊಡ್ಡ ಅಸ್ತ್ರವಾಗಿದೆ. ಬಿಜೆಪಿ ಮತ್ತು ಜೆಡಿಎಸ್ ಈ ವಿಷಯವನ್ನು ಕಾಂಗ್ರೆಸ್ ನ ಆಂತರಿಕ ಕಚ್ಚಾಟದ ಪರಿಣಾಮ ಎಂದು ಬಿಂಬಿಸಿ, ಭ್ರಷ್ಟಾಚಾರ ಮತ್ತು ಬೆಲೆ ಏರಿಕೆಯನ್ನು ಮುಚ್ಚಿಡಲು ಸರ್ಕಾರವೇ ಸೃಷ್ಟಿಸಿದ ಕತೆ ಎಂದು ಆರೋಪಿಸುತ್ತಿದೆ. ಕುಮಾರಸ್ವಾಮಿ ಅವರ ಆಕ್ರಮಣಕಾರಿ ನಿಲುವು ಮತ್ತು ಯತ್ನಾಳ್ ಅವರ ಬೆಂಬಲ ಒಂದೇ ವೇದಿಕೆಗೆ ಬಂದಿರುವುದು ಅನಿರೀಕ್ಷಿತ ರಾಜಕೀಯ ಸಮೀಕರಣವನ್ನು ಸೂಚಿಸುತ್ತದೆ. ಸರ್ಕಾರ ಮೌನಕ್ಕೆ ಶರಣಾದಷ್ಟೂ ಅನುಮಾನಗಳು ದಟ್ಟವಾಗುತ್ತವೆ ಮತ್ತು ಮುಂಬರುವ ಅಧಿವೇಶನದಲ್ಲಿ ಈ ವಿಷಯವೇ ಪ್ರಮುಖ ಅಸ್ತ್ರವಾಗುವ ಸಾಧ್ಯತೆ ಇದೆ.
