ನವದೆಹಲಿ : ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್ ಕುಮಾರ್ ಮತ್ತು ಮತದಾರರ ಪಟ್ಟಿಯ ವಿಶೇಷ ತೀವ್ರ ಪರಿಷ್ಕರಣೆ (SIR) ಪ್ರಕ್ರಿಯೆಯ ವಿರುದ್ಧ ವಿಪಕ್ಷಗಳು ನಡೆಸುತ್ತಿರುವ ಪ್ರತಿಭಟನೆಯ ನಡುವೆ ದೇಶದ 42 ನಿವೃತ್ತ ನ್ಯಾಯಮೂರ್ತಿಗಳು ಜಂಟಿ ಮುಕ್ತ ಪತ್ರ ಬರೆದಿದ್ದಾರೆ. ಚುನಾವಣಾ ಆಯೋಗ ಹಾಗೂ ನ್ಯಾಯಾಂಗದಂತಹ ಸಾಂವಿಧಾನಿಕ ಸಂಸ್ಥೆಗಳ ವಿಶ್ವಾಸಾರ್ಹತೆಯನ್ನು ಕುಂದಿಸುವ ಪ್ರಯತ್ನ ನಡೆಯುತ್ತಿದೆ ಎಂದು ಕಳವಳ ವ್ಯಕ್ತಪಡಿಸಿರುವ ಅವರು, ಮತದಾನದ ಮೇಲಿನ ನಂಬಿಕೆ ಕಡಿಮೆಯಾದರೆ ಬ್ಯಾಲೆಟ್ ತನ್ನ ಅರ್ಥ ಕಳೆದುಕೊಂಡು ಬೀದಿ ಹೋರಾಟಗಳು ದೇಶವನ್ನು ಆವರಿಸುತ್ತವೆ ಎಂದು ಎಚ್ಚರಿಕೆ ನೀಡಿದ್ದಾರೆ. ಸುಪ್ರೀಂ ಕೋರ್ಟ್ ಮಾಜಿ ನ್ಯಾಯಮೂರ್ತಿಗಳಾದ ಹೇಮಂತ್ ಗುಪ್ತಾ, ಪಂಕಜ್ ಮಿತ್ತಲ್ ಸೇರಿದಂತೆ ವಿವಿಧ ಹೈಕೋರ್ಟ್‌ಗಳ ಮಾಜಿ ಮುಖ್ಯ ನ್ಯಾಯಮೂರ್ತಿಗಳು ಈ ಪತ್ರಕ್ಕೆ ಸಹಿ ಹಾಕಿದ್ದಾರೆ.
ಕೇವಲ ನಿರಾಧಾರ ಆರೋಪಗಳು !
ಪತ್ರದಲ್ಲಿ ನಿವೃತ್ತ ನ್ಯಾಯಮೂರ್ತಿಗಳು ಮತ ಕಳವು ಆರೋಪವನ್ನು ಸಾಕ್ಷ್ಯವಿಲ್ಲದೆ ಮಾಡುವುದು ಪ್ರಜಾಪ್ರಭುತ್ವಕ್ಕೆ ಅಪಾಯಕಾರಿ ಎಂದು ಹೇಳಿದ್ದಾರೆ. ಸಾಂವಿಧಾನಿಕ ಸಂಸ್ಥೆಗಳನ್ನು ಚೋರ್ ಅಥವಾ ರಾಜಿ ಮಾಡಿಕೊಂಡ ಸಂಸ್ಥೆಗಳು ಎಂದು ಕರೆಯುವುದನ್ನು ಖಂಡಿಸಿದ್ದಾರೆ. ಎಸ್ಐಆರ್ ಪ್ರಕ್ರಿಯೆಯು ಕಾನೂನುಬದ್ಧ ಮತ್ತು ಪಾರದರ್ಶಕ ಮತದಾರರ ಪಟ್ಟಿ ತಯಾರಿಸುವ ಉದ್ದೇಶ ಹೊಂದಿದೆ ಎಂದು ಸಮರ್ಥಿಸಿದ್ದಾರೆ. ಪರೋಕ್ಷವಾಗಿ ಕಾಂಗ್ರೆಸ್ ಸೇರಿದಂತೆ ವಿಪಕ್ಷಗಳನ್ನು ಟೀಕಿಸಿರುವ ಅವರು, ಮಾಧ್ಯಮಗಳಲ್ಲಿ ಆರೋಪ ಮಾಡುವ ನಾಯಕರು ನ್ಯಾಯಾಲಯಕ್ಕೆ ಹೋದಾಗ ದಾಖಲೆ ನೀಡುವುದಿಲ್ಲ, ಸೋತಾಗ ಮಾತ್ರ ಇವಿಎಂ ಬಗ್ಗೆ ಅನುಮಾನ ವ್ಯಕ್ತಪಡಿಸುತ್ತಾರೆ, ಗೆದ್ದಾಗ ಮೌನವಾಗಿರುತ್ತಾರೆ ಎಂದು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಐದು ದಶಕ ಆಡಳಿತ ನಡೆಸಿದ ಪಕ್ಷವೇ ವ್ಯವಸ್ಥೆ ಫಿಕ್ಸ್ ಆಗಿದೆ ಎಂದು ಹೇಳುವುದು ದುರಂತ ಎಂದಿದ್ದಾರೆ. ಕೆಲವು ವಕೀಲರು ಮತ್ತು ಗುಂಪುಗಳು ನ್ಯಾಯಾಲಯವನ್ನು ರಾಜಕೀಯ ವೇದಿಕೆ ಮಾಡಿಕೊಂಡು ಪ್ರತಿಕೂಲ ತೀರ್ಪು ಬಂದಾಗ ನ್ಯಾಯಾಂಗವನ್ನೇ ನಿಂದಿಸುತ್ತಾರೆ ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ. ಪ್ರಜಾಪ್ರಭುತ್ವದಲ್ಲಿ ಟೀಕೆಗೆ ಅವಕಾಶವಿದೆ ಆದರೆ ಸಂಸ್ಥೆಗಳ ತೇಜೋವಧೆ ಸಲ್ಲದು ಎಂಬುದು ಅವರ ಒಮ್ಮತದ ನಿಲುವು.
ಇದನ್ನೂ ಓದಿ: SIR ರದ್ದತಿಗೆ ಆಗ್ರಹಿಸಿ ಬೆಂಗಳೂರಲ್ಲಿ ಸಿಜೆಪಿ ಹೋರಾಟ, ಧ್ರುವ್ ರಾಠಿ-ಪ್ರಕಾಶ್ ರಾಜ್ ಸಾಥ್
ಈ ಮುಕ್ತ ಪತ್ರ ಪ್ರಸ್ತುತ ರಾಜಕೀಯ ವಾತಾವರಣದಲ್ಲಿ ಸಾಂವಿಧಾನಿಕ ಸಂಸ್ಥೆಗಳ ಪಾತ್ರದ ಬಗ್ಗೆ ಮತ್ತೆ ಚರ್ಚೆ ಹುಟ್ಟುಹಾಕಿದೆ. ಚುನಾವಣಾ ಆಯೋಗದ ನಿರ್ಧಾರಗಳನ್ನು ಪ್ರಶ್ನಿಸುವುದು ವಿಪಕ್ಷಗಳ ಹಕ್ಕು, ಆದರೆ ಸಾಕ್ಷ್ಯವಿಲ್ಲದ ಆರೋಪಗಳು ಜನರಲ್ಲಿ ಸಂಶಯ ಮೂಡಿಸುತ್ತವೆ ಎಂಬುದು ನಿವೃತ್ತ ನ್ಯಾಯಮೂರ್ತಿಗಳ ವಾದದ ಮುಖ್ಯ ಅಂಶ. ಎಸ್ಐಆರ್ ನಂತಹ ಪ್ರಕ್ರಿಯೆಗಳು ಮತದಾರರ ಪಟ್ಟಿಯನ್ನು ಶುದ್ಧೀಕರಿಸಲು ಅಗತ್ಯ ಎಂದು ಆಯೋಗ ಹೇಳುತ್ತಿದ್ದರೆ, ಅದರ ಹಿಂದೆ ಮತದಾರರನ್ನು ತೆಗೆದುಹಾಕುವ ಉದ್ದೇಶವಿದೆ ಎಂದು ವಿಪಕ್ಷಗಳು ಆರೋಪಿಸುತ್ತಿವೆ. ಇಂತಹ ಸಂದರ್ಭದಲ್ಲಿ ನ್ಯಾಯಾಂಗದ ಮಾಜಿ ಸದಸ್ಯರು ಆಯೋಗದ ಪರ ನಿಲ್ಲುವುದು ಸಂಸ್ಥೆಯ ಮೇಲಿನ ವಿಶ್ವಾಸವನ್ನು ಗಟ್ಟಿಗೊಳಿಸುವ ಪ್ರಯತ್ನ ಎನ್ನಬಹುದು. ಆದರೆ ಇದರಿಂದಲೇ ವಿಪಕ್ಷಗಳ ಆರೋಪಗಳಿಗೆ ತೆರೆ ಬೀಳುವುದಿಲ್ಲ.
ಹೌದು, ಸಾರ್ವಜನಿಕರಲ್ಲಿ ನಂಬಿಕೆ ಉಳಿಯಬೇಕಾದರೆ ಆಯೋಗ ಹೆಚ್ಚು ಪಾರದರ್ಶಕವಾಗಿ ದತ್ತಾಂಶವನ್ನು ಹಂಚಿಕೊಳ್ಳಬೇಕು ಮತ್ತು ಅನುಮಾನಗಳಿಗೆ ಸ್ಪಷ್ಟ ಉತ್ತರ ನೀಡಬೇಕು. ಮತಪತ್ರದ ಮೇಲಿನ ನಂಬಿಕೆ ಕಡಿಮೆಯಾದರೆ ಬೀದಿ ಹೋರಾಟಗಳು ಹೆಚ್ಚಾಗುತ್ತವೆ ಎಂಬ ನ್ಯಾಯಮೂರ್ತಿಗಳ ಎಚ್ಚರಿಕೆ ಪ್ರಜಾಪ್ರಭುತ್ವದ ಮೂಲ ಆತಂಕವನ್ನು ತೋರಿಸುತ್ತದೆ. ರಚನಾತ್ಮಕ ವಿಮರ್ಶೆ ಪ್ರಜಾಪ್ರಭುತ್ವವನ್ನು ಬಲಪಡಿಸಿದರೆ, ನಿರಾಧಾರ ಆರೋಪಗಳು ಅದರ ಬುನಾದಿಯನ್ನೇ ಅಲುಗಾಡಿಸುತ್ತವೆ.
