☔ Weather
Bengaluru: ☁️ 21°C | AQI 153
Mysore: 🌤️ 19°C | AQI 123
Mangalore: ☁️ 25°C | AQI 136
Bengaluru: ☁️ 21°C | AQI 153
☔ Weather
Bengaluru: ☁️ 21°C | AQI 153
Mysore: 🌤️ 19°C | AQI 123
Mangalore: ☁️ 25°C | AQI 136
Bengaluru: ☁️ 21°C | AQI 153

R ASHOK : ಮತ್ತೆ ಶುರು ಪೋಸ್ಟರ್ ವಾರ್ – ಅಶೋಕ್‌ ನಿವಾಸದ ಮುಂದೆ ‘ED-BJP ಭಾಯಿ ಭಾಯಿ’ ವಾಲ್ ಪೋಸ್ಟ್

ಬೆಂಗಳೂರಿನ ಜಾಲಹಳ್ಳಿ ಹಾಗೂ ಹೆಚ್‌ಎಂಟಿ ಪರಿಸರದಲ್ಲಿ ಜಾರಿ ನಿರ್ದೇಶನಾಲಯದ (ಇಡಿ) ಪ್ರಾದೇಶಿಕ ಕಚೇರಿ ಮತ್ತು ವಿಧಾನಸಭೆಯ ವಿರೋಧ ಪಕ್ಷದ ನಾಯಕ ಆರ್‌. ಅಶೋಕ್‌ ಅವರ ಮನೆಗೆ ಸಮೀಪವಿರುವ ಭಾಗಗಳಲ್ಲಿ ಎದ್ದುಕಾಣುವಂತಹ ಪೋಸ್ಟರ್‌ಗಳು ಪ್ರತ್ಯಕ್ಷಗೊಂಡಿದ್ದು, ಕರ್ನಾಟಕದ ರಾಜಕೀಯ ದಲ್ಲಿ ಹೊಸ ಬೆಳವಣಿಗೆಗೆ ದಾರಿಮಾಡಿಕೊಟ್ಟಿದೆ. “ED – BJP ಭಾಯಿ ಭಾಯಿ” ಎಂಬ ಸ್ಪಷ್ಟ ಬರವಣಿಗೆ ಹೊಂದಿರುವ ಈ ಭಿತ್ತಿಪತ್ರಗಳು ಭಾರಿ ಚರ್ಚೆಗೆ ಗ್ರಾಸವಾಗಿದೆ. ಆರ್.ಅಶೋಕ್ ನಿವಾಸ ಮತ್ತು ಕೇಂದ್ರ ತನಿಖಾ ಸಂಸ್ಥೆಯ ಪ್ರಾದೇಶಿಕ ಕಚೇರಿಯೇ ಇರುವ ಸೂಕ್ಷ್ಮ ಪ್ರದೇಶದಲ್ಲಿ ಇಂತಹ ಪೋಸ್ಟರ್‌ಗಳು ರಾರಾಜಿಸುತ್ತಿರುವುದು ರಾಜಕೀಯ ಕಾವೇರಿದೆ.

ಬೆಂಗಳೂರಿನ ಪ್ರಮುಖ ರಸ್ತೆಬದಿಯ ಗೋಡೆಗಳು ಹಾಗೂ ಸರ್ಕಲ್‌ಗಳಲ್ಲಿ ಕಂಡುಬಂದಿರುವ ಈ ಭಿತ್ತಿಪತ್ರಗಳ ಮೂಲಕ ಕೇಂದ್ರ ಆಡಳಿತಾರೂಢ ವ್ಯವಸ್ಥೆಯ ವಿರುದ್ಧ ನೇರ ದಾಳಿ ನಡೆಸಲಾಗಿದೆ. ರಾಜಕೀಯವಾಗಿ ಮುಖಾಮುಖಿ ಎದುರಿಸಲು ಸಾಧ್ಯವಾಗದ ವಿರೋಧ ಪಕ್ಷದ ನಾಯಕರ ಮೇಲೆ ಇಡಿ ತನಿಖೆಗಳನ್ನು ಕೇವಲ ರಾಜಕೀಯ ಅಸ್ತ್ರವನ್ನಾಗಿ ಪ್ರಯೋಗಿಸಲಾಗುತ್ತಿದೆಯೇ ಎಂಬ ಪ್ರಭಾವಿ ಪ್ರಶ್ನೆಯನ್ನು ಇದರಲ್ಲಿ ಉಲ್ಲೇಖಿಸಲಾಗಿದೆ. ಇದರೊಂದಿಗೆ, ರಾಜ್ಯದ ಅಹಿಂದ ವರ್ಗದ ನಾಯಕರ ಪ್ರಭಾವವನ್ನು ತಗ್ಗಿಸಲು ಅಥವಾ ಅವರನ್ನು ಹತ್ತಿಕ್ಕಲು ತನಿಖಾ ಸಂಸ್ಥೆಗಳನ್ನು ಬಳಸಿಕೊಳ್ಳಲಾಗುತ್ತಿದೆ ಎಂಬ ಆರೋಪಕ್ಕೆ ಉತ್ತರಿಸುವಂತೆ ಜನಸಾಮಾನ್ಯರನ್ನು ಕೋರಲಾಗಿದೆ. ಪ್ರಸ್ತುತ ದೇಶದಲ್ಲಿನ ತನಿಖಾ ಸಂಸ್ಥೆಗಳು ತಟಸ್ಥವಾಗಿ ಕಾನೂನಿನ ಚೌಕಟ್ಟಿನಲ್ಲಿ ಕೆಲಸ ಮಾಡುತ್ತಿವೆಯೇ ಅಥವಾ ಆಡಳಿತ ಪಕ್ಷದ ಕಾರ್ಯತಂತ್ರಕ್ಕೆ ತಕ್ಕಂತೆ ನಡೆಯುತ್ತಿವೆಯೇ ಎಂಬ ವಿಷಯ ಈಗ ಜಾಲತಾಣಗಳು ಹಾಗೂ ಮಾಧ್ಯಮಗಳಲ್ಲಿ ತೀವ್ರ ಸ್ವರೂಪದ ಚರ್ಚೆಯನ್ನು ಹುಟ್ಟುಹಾಕಿದೆ.

ಕೇಂದ್ರದ ತನಿಖಾ ಸಂಸ್ಥೆಗಳು ಕಾರ್ಯಾಚರಣೆ ನಡೆಸಿದಾಗಲೆಲ್ಲಾ ವಿಪಕ್ಷಗಳು ‘ಅಧಿಕಾರ ದುರ್ಬಳಕೆ’ ಎಂಬ ಅಸ್ತ್ರವನ್ನು ಪ್ರಯೋಗಿಸುವುದು ಹಾಗೂ ಆಡಳಿತ ಪಕ್ಷ ‘ಕಾನೂನು ತನ್ನ ಕೆಲಸ ಮಾಡುತ್ತದೆ’ ಎಂದು ಸಮರ್ಥಿಸಿಕೊಳ್ಳುವುದು ರಾಜಕಾರಣದಲ್ಲಿ ಸಾಮಾನ್ಯ ಪ್ರಕ್ರಿಯೆಯಾಗಿದೆ. ಆದರೆ, ಜಾರಿ ನಿರ್ದೇಶನಾಲಯದ ಪ್ರಾದೇಶಿಕ ಕಚೇರಿ ಹಾಗೂ ವಿಪಕ್ಷ ನಾಯಕ ಆರ್‌. ಅಶೋಕ್ ಅವರ ಮನೆಗೆ ಹತ್ತಿರದಲ್ಲೇ ಇಂತಹ ಸಾರ್ವಜನಿಕ ಪೋಸ್ಟರ್ ಸಮರ ನಡೆಸಿರುವುದು ಕೇವಲ ಪ್ರತಿಭಟನೆಯಷ್ಟೇ ಅಲ್ಲದೆ, ಪ್ರಚಾರ ತಂತ್ರದ ಭಾಗವೂ ಹೌದು. ಇತ್ತೀಚಿನ ದಿನಗಳಲ್ಲಿ ಇಡಿ ಅಥವಾ ಐಟಿ ದಾಳಿಗಳು ನಡೆದಾಗ ‘ಅಹಿಂದ’ ಅಥವಾ ನಿರ್ದಿಷ್ಟ ಸಮುದಾಯದ ನಾಯಕರನ್ನು ಗುರಿಮಾಡಲಾಗುತ್ತಿದೆ ಎಂಬ ರಾಜಕೀಯವನ್ನು ಮುನ್ನೆಲೆಗೆ ತರುವುದು, ಸಾರ್ವಜನಿಕರಲ್ಲಿ ಭಾವನಾತ್ಮಕ ಬೆಂಬಲ ಕ್ರೋಢೀಕರಿಸುವ ಉದ್ದೇಶ ಎನ್ನಬಹುದು.

ಈ ಎಲ್ಲಾ ಬೆಳವಣಿಗೆಗಳು, ತನಿಖಾ ಸಂಸ್ಥೆಗಳು ಕೇವಲ ರಾಜಕೀಯ ಪ್ರೇರಿತವಾಗಿ ಕೆಲಸ ಮಾಡುತ್ತಿವೆಯೇ ಅಥವಾ ನಿಜಕ್ಕೂ ಭ್ರಷ್ಟಾಚಾರದ ವಿರುದ್ಧ ತನಿಖೆ ನಡೆಸುತ್ತಿವೆಯೇ ಎಂಬ ಗೊಂದಲ ಸಾಮಾನ್ಯ ಜನರಲ್ಲಿ ಉಳಿಯುತ್ತದೆ. ಚುನಾವಣಾ ವಾತಾವರಣ ಅಥವಾ ರಾಜಕೀಯ ತಿಕ್ಕಾಟಗಳು ಹೆಚ್ಚಾದಂತೆ ಇಂತಹ ಪೋಸ್ಟರ್ ಚಳವಳಿಗಳು ಜಾಗೃತಿಗಿಂತ ಹೆಚ್ಚಾಗಿ ಪರ-ವಿರೋಧದ ರಾಜಕೀಯ ವಾಗ್ಯುಧಕ್ಕೆ ವೇದಿಕೆಯಾಗುತ್ತವೆ.