ಬೆಂಗಳೂರು: ರೈತರಿಗೆ (Farmers) 25 ಸಾವಿರ ಪರಿಹಾರ ನೀಡಿದರೆ ಮಾತ್ರ ಸರ್ವಪಕ್ಷ ನಿಯೋಗಕ್ಕೆ ಬರ್ತೀವಿ ಎಂದು ವಿಧಾನ ಪರಿಷತ್ ವಿರೋಧ ಪಕ್ಷದ ನಾಯಕ ಛಲವಾದಿ ನಾರಾಯಣಸ್ವಾಮಿ ಷರತ್ತು ವಿಧಿಸಿದ್ದಾರೆ. ವಿಧಾನಸೌಧದಲ್ಲಿ ಮಾತನಾಡಿದ ಅವರು, ರಾಜ್ಯ ಸರ್ಕಾರ ಕೇಂದ್ರಕ್ಕೆ ಕೊಂಡೊಯ್ಯಲು ಉದ್ದೇಶಿಸಿರುವ ಸರ್ವಪಕ್ಷ ನಿಯೋಗದಲ್ಲಿ ಬಿಜೆಪಿ ಪಾಲ್ಗೊಳ್ಳಬೇಕಾದರೆ ರಾಜ್ಯದ ಬರಪೀಡಿತ ರೈತರಿಗೆ ಪ್ರತಿ ಎಕರೆಗೆ ಕನಿಷ್ಠ 25 ಸಾವಿರ ರೂಪಾಯಿ ತಕ್ಷಣದ ಪರಿಹಾರವನ್ನು ರಾಜ್ಯದ ಬೊಕ್ಕಸದಿಂದಲೇ ಘೋಷಣೆ ಮಾಡಬೇಕು ಎಂದು ಆಗ್ರಹಿಸಿದ್ದಾರೆ.
ರಾಜ್ಯದಲ್ಲಿ ತೀವ್ರ ಬರ ಪರಿಸ್ಥಿತಿ ಇದ್ದರೂ ಕಾಂಗ್ರೆಸ್ ಸರ್ಕಾರ ಕಾಲಹರಣ ಮಾಡುತ್ತಿದೆ ಎಂದು ಆರೋಪಿಸಿದ ನಾರಾಯಣಸ್ವಾಮಿ, ಸರ್ಕಾರಕ್ಕೆ ರೈತರ ಹಿತ ಕಾಯುವ ಬದ್ಧತೆ ಇದ್ದರೆ ಬರದ ನಿಜಸ್ಥಿತಿ ಮತ್ತು ಕೈಗೊಂಡ ಪರಿಹಾರ ಕಾರ್ಯಗಳ ಕುರಿತು ಶ್ವೇತಪತ್ರವನ್ನು ತಕ್ಷಣ ಬಿಡುಗಡೆ ಮಾಡಬೇಕು ಎಂದು ಒತ್ತಾಯಿಸಿದ್ದಾರೆ. ಕೇಂದ್ರದ ಬಳಿ ನಿಯೋಗ ಕೊಂಡೊಯ್ಯುವ ನೆಪದಲ್ಲಿ ರಾಜ್ಯ ಸರ್ಕಾರ ತನ್ನ ಜವಾಬ್ದಾರಿಯಿಂದ ನುಣುಚಿಕೊಳ್ಳುತ್ತಿದೆ, ಮುಖ್ಯಮಂತ್ರಿಗಳು ಅಧಿಕೃತವಾಗಿ ಪರಿಹಾರ ಘೋಷಿಸಿದರೆ ಮಾತ್ರ ವಿರೋಧ ಪಕ್ಷಗಳು ದೆಹಲಿಗೆ ಬರಲು ಸಿದ್ಧವಿವೆ, ಇಲ್ಲದಿದ್ದರೆ ಸರ್ಕಾರ ತನ್ನದೇ ನಿರ್ಧಾರ ತೆಗೆದುಕೊಳ್ಳಲು ಸ್ವತಂತ್ರವಾಗಿದೆ ಎಂದು ಹೇಳಿದ್ದಾರೆ. ಜೊತೆಗೆ ಕಸ್ತೂರಿರಂಗನ್ ವರದಿ ಜಾರಿ ವಿರುದ್ಧ ಕೇಂದ್ರಕ್ಕೆ ಮನವಿ ಸಲ್ಲಿಸುವ ವಿಚಾರದಲ್ಲಿ ಈ ಹಿಂದೆ ಸರ್ವಾನುಮತದ ತೀರ್ಮಾನ ಆಗಿರುವುದರಿಂದ ಆ ನಿಯೋಗಕ್ಕೆ ತಮ್ಮ ಸಂಪೂರ್ಣ ಬೆಂಬಲ ಇರುತ್ತದೆ, ಆದರೆ ಬರ ಪರಿಹಾರದ ವಿಚಾರದಲ್ಲಿ ರಾಜ್ಯ ಮೊದಲು ತನ್ನ ನೆರವನ್ನು ಸಾಬೀತುಪಡಿಸಬೇಕು ಎಂದು ಸ್ಪಷ್ಟಪಡಿಸಿದ್ದಾರೆ.
ರಾಜ್ಯದಲ್ಲಿ ಬರ ಬಡಿತಾಟ !
ಪ್ರತಿ ವರ್ಷ ಮಳೆ ಕೊರತೆಯಿಂದ ಬೆಳೆ ಹಾನಿ ಸಂಭವಿಸಿದಾಗ ರಾಜ್ಯ ಸರ್ಕಾರಗಳು ಕೇಂದ್ರದತ್ತ ನೋಡುವುದು ರೂಢಿಯಾಗಿದೆ, ಆದರೆ ರಾಷ್ಟ್ರೀಯ ವಿಪತ್ತು ಪರಿಹಾರ ನಿಧಿ ಮಾರ್ಗಸೂಚಿಗಳ ಪ್ರಕಾರ ಬರುವ ಪರಿಹಾರ ಅಲ್ಪವಾಗಿದ್ದು, ರಾಜ್ಯ ತನ್ನ ಬೊಕ್ಕಸದಿಂದ ಹೆಚ್ಚುವರಿ ನೆರವು ನೀಡಬೇಕೆಂಬ ನಿರೀಕ್ಷೆ ರೈತರಲ್ಲಿದೆ. ಛಲವಾದಿ ನಾರಾಯಣಸ್ವಾಮಿ ಅವರು ಎಕರೆಗೆ 25 ಸಾವಿರ ರೂಪಾಯಿ ಷರತ್ತು ವಿಧಿಸಿರುವುದರ ಹಿಂದೆ ಎರಡು ಉದ್ದೇಶಗಳಿವೆ. ಒಂದು ರೈತರಿಗೆ ತಕ್ಷಣದ ಆರ್ಥಿಕ ನೆರವು ಸಿಗಬೇಕು ಎಂಬ ಒತ್ತಡ, ಇನ್ನೊಂದು ಸರ್ಕಾರವನ್ನು ನೈತಿಕವಾಗಿ ಕಟ್ಟಿಹಾಕುವುದು. ಲಕ್ಷಾಂತರ ಹೆಕ್ಟೇರ್ ಪ್ರದೇಶದಲ್ಲಿ ಬೆಳೆ ನಷ್ಟವಾಗಿದೆ ಎಂದು ಅಂದಾಜಿಸಿದರೆ ಈ ಮೊತ್ತ ಸಾವಿರಾರು ಕೋಟಿ ರೂಪಾಯಿಗೆ ತಲುಪುತ್ತದೆ, ಇದು ರಾಜ್ಯದ ಬಜೆಟ್ ಮೇಲೆ ದೊಡ್ಡ ಹೊರೆ. ಸರ್ಕಾರ ಈ ಘೋಷಣೆ ಮಾಡಿದರೆ ಖಜಾನೆಗೆ ಹೊರೆ, ಮಾಡದಿದ್ದರೆ ರೈತ ವಿರೋಧಿ ಎಂಬ ಟೀಕೆ ಎದುರಿಸಬೇಕಾಗುತ್ತದೆ.
ಇದನ್ನೂ ಓದಿ : ಮತದಾರರ ಪಟ್ಟಿ ಪರಿಷ್ಕರಣೆ ಗೊಂದಲ: ಫಾರ್ಮ್-7 ದುರ್ಬಳಕೆ ವಿರುದ್ಧ ಸಮರಕ್ಕೆ ಸಿಎಂ ಡಿ.ಕೆ ಕರೆ
ಅದೇ ರೀತಿ ಶ್ವೇತಪತ್ರದ ಬೇಡಿಕೆ ಪಾರದರ್ಶಕತೆಯ ದೃಷ್ಟಿಯಿಂದ ಸಮಂಜಸವಾಗಿದೆ. ಎಷ್ಟು ತಾಲೂಕುಗಳಲ್ಲಿ ಬರ ಘೋಷಣೆಯಾಗಿದೆ, ಬೆಳೆ ಸಮೀಕ್ಷೆ ಎಷ್ಟು ಪೂರ್ಣಗೊಂಡಿದೆ, ಬೆಳೆ ವಿಮೆ ಪರಿಹಾರ ಯಾವ ಹಂತದಲ್ಲಿದೆ, ಕುಡಿಯುವ ನೀರು, ಮೇವು, ಉದ್ಯೋಗ ಖಾತ್ರಿ ಕಾಮಗಾರಿಗಳ ಸ್ಥಿತಿ ಏನು ಎಂಬುದನ್ನು ಅಧಿಕೃತವಾಗಿ ಜನರ ಮುಂದೆ ಇಡಬೇಕಿದೆ. ಕೇಂದ್ರದ ಬಳಿ ನೆರವು ಕೇಳುವ ಮೊದಲು ರಾಜ್ಯ ತನ್ನ ಕರ್ತವ್ಯ ನಿರ್ವಹಿಸಿದೆ ಎಂಬ ನೈತಿಕ ಬಲವಿರಬೇಕು, ಇಲ್ಲದಿದ್ದರೆ ದೆಹಲಿಯಲ್ಲಿ ರಾಜ್ಯದ ಮನವಿಗೆ ತೂಕ ಸಿಗುವುದಿಲ್ಲ. ಕಸ್ತೂರಿರಂಗನ್ ವರದಿ ವಿಚಾರದಲ್ಲಿ ಸರ್ವಾನುಮತದ ನಿಲುವಿಗೆ ಬೆಂಬಲ ನೀಡಿ, ಬರ ಪರಿಹಾರದಲ್ಲಿ ಮಾತ್ರ ಷರತ್ತು ಹಾಕಿರುವುದು ಬಿಜೆಪಿಯ ಕಾರ್ಯತಂತ್ರದ ಭಾಗ. ಪರಿಸರ ಸೂಕ್ಷ್ಮ ವಿಷಯದಲ್ಲಿ ರಾಜ್ಯದ ಹಿತಕ್ಕಾಗಿ ಒಗ್ಗಟ್ಟು ಪ್ರದರ್ಶಿಸಿ, ಆರ್ಥಿಕ ನೆರವಿನ ವಿಷಯದಲ್ಲಿ ಸರ್ಕಾರದ ವೈಫಲ್ಯವನ್ನು ಎತ್ತಿ ತೋರಿಸುವ ಪ್ರಯತ್ನ ಇದಾಗಿದೆ. ಆದರೆ ಈ ರಾಜಕೀಯ ಜಟಾಪಟಿಯಲ್ಲಿ ಅಂತಿಮವಾಗಿ ಸಂಕಷ್ಟಕ್ಕೆ ಸಿಲುಕುವುದು ಬರದಿಂದ ಕಂಗೆಟ್ಟ ರೈತ ಸಮುದಾಯವಾಗಿದೆ.
