☔ Weather
Bengaluru: 🌤️ 23°C | AQI 155
Mysore: 🌤️ 21°C | AQI 122
Mangalore: ☀️ 26°C | AQI 142
Bengaluru: 🌤️ 23°C | AQI 155
☔ Weather
Bengaluru: 🌤️ 23°C | AQI 155
Mysore: 🌤️ 21°C | AQI 122
Mangalore: ☀️ 26°C | AQI 142
Bengaluru: 🌤️ 23°C | AQI 155

SATISH JARAKIHOLI : ಲೋಕೋಪಯೋಗಿಇಲಾಖೆ 1000 ಕೋಟಿ ಟೆಂಡರ್ ಅಕ್ರಮ – ಜಾರಕಿಹೊಳಿಗೆ ಇ.ಡಿ ಇಕ್ಕಳ

ಸಿದ್ದರಾಮಯ್ಯ ಅವರ ನೇತೃತ್ವದ ಮೊದಲ ಸರ್ಕಾರದಲ್ಲಿ ಲೋಕೋಪಯೋಗಿ ಇಲಾಖೆ ಸಚಿವರಾಗಿದ್ದ ಅವಧಿಯಲ್ಲಿ ನಡೆದಿದೆ ಎನ್ನಲಾದ ಬರೋಬ್ಬರಿ 1000 ಕೋಟಿ ರೂಪಾಯಿಗೂ ಅಧಿಕ ಮೊತ್ತದ ರಸ್ತೆ ಕಾಮಗಾರಿಗಳ ಟೆಂಡರ್ ಹಂಚಿಕೆಯಲ್ಲಿ ಕೆಟಿಪಿಪಿ ಕಾಯ್ದೆಯ ನಿಯಮಗಳನ್ನು ಉಲ್ಲಂಘಿಸಲಾಗಿದೆ ಎಂಬ ಗಂಭೀರ ಆರೋಪಗಳು ಕೇಳಿಬಂದಿವೆ. ಜಾರಿ ನಿರ್ದೇಶನಾಲಯ ಇತ್ತೀಚೆಗೆ ಸಚಿವ ಸತೀಶ್ ಜಾರಕಿಹೊಳಿ ಹಾಗೂ ಅವರ ಆಪ್ತರ ನಿವಾಸಗಳು ಮತ್ತು ಕಚೇರಿಗಳ ಮೇಲೆ ನಡೆಸಿದ ಪರಿಶೀಲನೆ ಹಾಗೂ ಶೋಧ ಕಾರ್ಯದ ವೇಳೆಯಲ್ಲಿ ಈ ಕಾಯ್ದೆ ಉಲ್ಲಂಘನೆಗೆ ಸಂಬಂಧಿಸಿದ ಮಹತ್ವದ ದಾಖಲೆಗಳು ಲಭ್ಯವಾಗಿವೆ. ಮೂಲಗಳ ಪ್ರಕಾರ, ಕಾಮಗಾರಿಗೆ ಸಂಬಂಧಿಸಿದಂತೆ ಅತ್ಯಂತ ಕಡಿಮೆ ಮೊತ್ತ ನಮೂದಿಸಿದ್ದ ಪ್ರಥಮ ಬಿಡ್‌ದಾರರನ್ನು ಅನರ್ಹಗೊಳಿಸಿದ ಸಂದರ್ಭದಲ್ಲಿ ನಿಯಮಾನುಸಾರ ಮರು ಟೆಂಡರ್ ಕರೆಯುವ ಬದಲು, ದ್ವಿತೀಯ ಬಿಡ್‌ದಾರರಿಗೆ ಆದ್ಯತೆ ನೀಡಿ ಒಪ್ಪಂದ ಮಾಡಿಕೊಳ್ಳಲಾಗಿದೆ.

ಈ ಪ್ರಕ್ರಿಯೆಯನ್ನು ಹಣಕಾಸು ಇಲಾಖೆ ಸ್ಪಷ್ಟವಾಗಿ ನಿರಾಕರಿಸಿತ್ತು ಮತ್ತು ಮರು ಟೆಂಡರ್ ಪ್ರಕ್ರಿಯೆ ನಡೆಸುವುದೊಂದೇ ಕಾನೂನಾತ್ಮಕ ಮಾರ್ಗ ಎಂದು 2016ರಲ್ಲೇ ಸ್ಪಷ್ಟ ಟಿಪ್ಪಣಿ ನೀಡಿ ಎಚ್ಚರಿಸಿತ್ತು. ಆದರೆ ಈ ಆಕ್ಷೇಪಣೆಯನ್ನು ಬದಿಗೊತ್ತಿ, ಪ್ರಕರಣವನ್ನು ಸಂಪುಟದ ಮುಂದೆ ತರುವ ಸಲುವಾಗಿ ಕಾನೂನು ಇಲಾಖೆಯ ಅಭಿಪ್ರಾಯ ಕೇಳಲು ಮುಂದಾದಾಗಲೂ ಹಣಕಾಸು ಇಲಾಖೆ ತೀವ್ರ ಆಕ್ಷೇಪ ವ್ಯಕ್ತಪಡಿಸಿತ್ತು. ಹಣಕಾಸು ನಿಯಮಗಳನ್ನು ಮೀರಿ L-2 ಬಿಡ್ಡರ್‌ಗೆ ಕಾಮಗಾರಿ ವಹಿಸಲು ಇಲಾಖೆಯ ಹಂತದಲ್ಲಿ ಕಡತಗಳನ್ನು ಮುನ್ನೆಡೆಸಲಾಗಿತ್ತು ಎಂಬುದು ಈಗ ಹೊರಬಿದ್ದಿದೆ. ಮತ್ತೊಂದೆಡೆ, ಲೋಕೋಪಯೋಗಿ ಇಲಾಖೆಯ ಅಧಿಕಾರಿಗಳು ಎಲ್ಲಾ ಪ್ರಕ್ರಿಯೆಗಳನ್ನು ಹಣಕಾಸು ಹಾಗೂ ಕಾನೂನು ಇಲಾಖೆಗಳ ಸಲಹೆ ಪಡೆದೇ ಪೂರ್ಣಗೊಳಿಸಲಾಗಿದೆ ಎಂದು ಸಮರ್ಥನೆ ನೀಡುತ್ತಿದ್ದಾರೆ.

ಈ ಬೆಳವಣಿಗೆ ಕೇವಲ ಒಂದು ಇಲಾಖೆಯ ಆಡಳಿತಾತ್ಮಕ ಲೋಪಕ್ಕೆ ಸೀಮಿತವಾಗಿರದೆ, ರಾಜ್ಯ ರಾಜಕೀಯ ವಲಯದಲ್ಲಿ ದೊಡ್ಡ ಮಟ್ಟದ ಚರ್ಚೆಗೆ ಗ್ರಾಸವಾಗಿದೆ. ನಿಯಮಾವಳಿಗಳ ಪ್ರಕಾರ ಪ್ರಥಮ ಬಿಡ್‌ದಾರನ ಅನರ್ಹತೆಯ ನಂತರ ಹೊಸ ಟೆಂಡರ್ ಕರೆಯದೆ ದ್ವಿತೀಯ ಬಿಡ್‌ದಾರರಿಗೆ ಗುತ್ತಿಗೆ ನೀಡಿರುವುದು ಹಣಕಾಸು ಪಾರದರ್ಶಕತೆಯ ತತ್ತ್ವಕ್ಕೆ ಮಾರಕವಾಗಿದೆ. ಆರ್ಥಿಕ ಇಲಾಖೆಯ ಸ್ಪಷ್ಟ ನಿರಾಕರಣೆಯ ಹೊರತಾಗಿಯೂ ನಿರ್ಧಾರ ತಳೆದಿರುವುದು ಆಡಳಿತ ಯಂತ್ರದಲ್ಲಿನ ರಾಜಕೀಯ ಒತ್ತಡ ಹಾಗೂ ಹಿತಾಸಕ್ತಿಗಳ ಸಂಘರ್ಷವನ್ನು ಎತ್ತಿ ತೋರಿಸುತ್ತದೆ. ಇದು ಇ.ಡಿ ತನಿಖೆಗೆ ಹೊಸ ಆಯಾಮವನ್ನು ತಂದುಕೊಟ್ಟಿದ್ದು, ಮುಂಬರುವ ದಿನಗಳಲ್ಲಿ ಕಾನೂನು ಪ್ರಕ್ರಿಯೆಗಳು ಮತ್ತಷ್ಟು ಬಿಗಿಯಾಗುವ ಮುನ್ಸೂಚನೆ ನೀಡಿದೆ.