Photo Credits: @duniyavijayofficial (Instagram)
‘ದುನಿಯಾ’ 2007 ರಲಿ ತೆರೆಕಂಡು ಸ್ಯಾಂಡಲ್ವುಡ್ನಲ್ಲಿ ನವ ಸಂಚಲನ ಸೃಷ್ಟಿಸಿದ ಪ್ರಸಿದ್ಧ ಆಕ್ಷನ್ ನಾಟಕ ಚಿತ್ರ. ಈ ಚಿತ್ರದ ಮೂಲಕ ಸೂರಿ ಅವರು ನಿರ್ದೇಶಕರಾಗಿ ಕನ್ನಡ ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡಿದರು. ವಿಜಯ್ ಮತ್ತು ರಶ್ಮಿ ಈ ಸಿನಿಮಾದಲ್ಲಿ ಮುಖ್ಯ ನಾಯಕ ಹಾಗೂ ನಾಯಕಿಯಾಗಿ ಅಭಿನಯಿಸಿದ್ದಾರೆ.
ಈ ಸಿನಿಮಾವು ಹಳ್ಳಿ ಹುಡುಗನೊಬ್ಬನ ಮುಗ್ಧತೆ ಹಾಗೂ ನಗರದ ಕರಾಳ ಭೂಗತ ಲೋಕದ ವಾಸ್ತವಿಕತೆಯನ್ನು ಕಾವ್ಯಾತ್ಮಕವಾಗಿ ಕಟ್ಟಿಕೊಡುತ್ತದೆ. ಬಿಡುಗಡೆಯಾದ ಕ್ಷಣದಿಂದಲೇ ಬಾಕ್ಸ್ ಆಫೀಸ್ನಲ್ಲಿ ಸೌಂಡ್ ಮಾಡಿ, ಪ್ರೇಕ್ಷಕರಿಂದ ಅಪಾರ ಮೆಚ್ಚುಗೆಯನ್ನು ಗಳಿಸಿತು. ಕನ್ನಡಿಗರ ನೆಚ್ಚಿನ ರಿಯಲಿಸ್ಟಿಕ್ ಸಿನಿಮಾಗಳ ಸಾಲಿನಲ್ಲಿ ಇದು ಪ್ರಮುಖ ಸ್ಥಾನ ಪಡೆದಿದೆ.
ಸ್ಯಾಮಿ ಅಸೋಸಿಯೇಟ್ಸ್ ಬ್ಯಾನರ್ ಅಡಿಯಲ್ಲಿ ಟಿ.ಪಿ. ಸಿದ್ದರಾಜು ಅವರು ಅತ್ಯಂತ ನೈಜವಾಗಿ ಈ ಚಿತ್ರವನ್ನು ನಿರ್ಮಿಸಿದ್ದಾರೆ. ವಿ. ಮನೋಹರ್ ಅವರ ಸಂಗೀತ ಮತ್ತು ಸಾಧು ಕೋಕಿಲ ಅವರ ಹಿನ್ನೆಲೆ ಸಂಗೀತ ಚಿತ್ರದ ಪ್ರತಿಯೊಂದು ದೃಶ್ಯಕ್ಕೂ ಜೀವ ತುಂಬಿದೆ. ಪ್ರೇಕ್ಷಕರಿಗೆ ಸಂಪೂರ್ಣ ವಿಭಿನ್ನ ಹಾಗೂ ನೈಜ ಅನುಭವ ನೀಡಿದ ಸಿನಿಮಾ ಇದಾಗಿದೆ.
ಮುಗ್ಧತೆ ಮತ್ತು ದುರಂತದ ರೋಚಕ ಕಥಾ ಹಂದರ…
ಕಥೆಯ ನಾಯಕ ಶಿವು (ವಿಜಯ್) ಕಲ್ಲು ಗಣಿಯಲ್ಲಿ ಕೆಲಸ ಮಾಡುವ ಒಬ್ಬ ಮುಗ್ಧ ಹಳ್ಳಿಯ ಯುವಕ. ತನ್ನ ತಾಯಿಯ ಚಿಕಿತ್ಸೆಗಾಗಿ ಅವನು ಬೆಂಗಳೂರಿಗೆ ಬರುತ್ತಾನೆ. ಆದರೆ ತಾಯಿ ಮರಣ ಹೊಂದುತ್ತಾಳೆ. ಅಂತ್ಯಕ್ರಿಯೆಗೆ ಹಣವಿಲ್ಲದೆ ಕಂಗಾಲಾದ ಶಿವು ನಗರದಲ್ಲಿ ಅನಾಥನಾಗಿ ಅಲೆಯುತ್ತಾನೆ.
ಅದೇ ಸಮಯದಲ್ಲಿ ರೌಡಿಗಳಿಂದ ತೊಂದರೆಯಲ್ಲಿದ್ದ ಪೂರ್ಣಿಮಾ (ರಶ್ಮಿ) ಎಂಬ ಹುಡುಗಿಯನ್ನು ಶಿವು ರಕ್ಷಿಸುತ್ತಾನೆ. ಅವಳ ಶಿಕ್ಷಣಕ್ಕೆ ನೆರವಾಗಲು ಬಯಸಿ, ಸಂದರ್ಭಕ್ಕೆ ಸಿಲುಕಿ ಭೂಗತ ಲೋಕಕ್ಕೆ ಕಾಲಿಡುತ್ತಾನೆ. ರೌಡಿ ಸತ್ಯಣ್ಣ (ರಂಗಾಯಣ ರಘು) ಹಾಗೂ ಇತರರ ಸಹವಾಸದಿಂದ ಶಿವು ಕ್ರೈಮ್ ಲೋಕದಲ್ಲಿ ಮುಳುಗುತ್ತಾನೆ.
ಆದರೆ ಭೂಗತ ಲೋಕದ ಕಿರುಕುಳ ಹಾಗೂ ಪೋಲಿಸರ ಕಾಟದಿಂದ ಶಿವು ಪಡುವ ನೋವನ್ನು ಪೂರ್ಣಿಮಾಳಿಂದ ನೋಡಲಾಗುವುದಿಲ್ಲ. ಈ ದುರಂತದ ಬದುಕಿಗೆ ಮುಕ್ತಿ ನೀಡಲು ಅವಳು ಶಿವುವಿಗೆ ವಿಷ ಬೆರೆಸಿದ ಸಿಹಿಯನ್ನು ನೀಡಿ, ತಾನೂ ಸೇವಿಸುತ್ತಾಳೆ. ಇಬ್ಬರ ಸಾವು ಮತ್ತು ಕಣ್ಣೀರಿನೊಂದಿಗೆ ಚಿತ್ರಕ್ಕೆ ಭಾವುಕ ಅಂತ್ಯ ಸಿಗುತ್ತದೆ.
ಪಾತ್ರವರ್ಗ ಮತ್ತು ವಿಶಿಷ್ಟ ಗುರುತು…
ನಟ ವಿಜಯ್ ಅವರು ಶಿವು ಪಾತ್ರಕ್ಕೆ ತಮ್ಮ ಜೀವವನ್ನೇ ಧಾರೆ ಎರೆದಿದ್ದಾರೆ. ರಶ್ಮಿ ತಮ್ಮ ಮುಗ್ಧ ನಟನೆಯ ಮೂಲಕ ವೀಕ್ಷಕರ ಮನ ಗೆದ್ದಿದ್ದಾರೆ. ಸತ್ಯಣ್ಣನಾಗಿ ರಂಗಾಯಣ ರಘು ಮತ್ತು ಪೋಲಿಸ್ ಅಧಿಕಾರಿಯಾಗಿ ಕಿಶೋರ್ ಅತ್ಯುತ್ತಮ ಅಭಿನಯ ನೀಡಿದ್ದಾರೆ.
ಈ ಸಿನಿಮಾದ ಮೂಲಕ ಹಲವು ಕಲಾವಿದರಿಗೆ ಹೊಸ ಗುರುತು ಸಿಕ್ಕಿತು. ನಾಯಕ ವಿಜಯ್ ‘ದುನಿಯಾ ವಿಜಯ್’ ಎಂದು ಹಾಗೂ ನಿರ್ದೇಶಕ ಸೂರಿ ‘ದುನಿಯಾ ಸೂರಿ’ ಎಂದು ಪ್ರಸಿದ್ಧರಾದರು. ಹಾಗೆಯೇ ಯೋಗೇಶ್ ಅವರು ‘ಲೂಸ್ ಮಾದ’ ಎಂದೇ ಜನಪ್ರಿಯತೆ ಪಡೆದರು.
ಸಂಗೀತ ಮೆರುಗು ಮತ್ತು ಬಾಕ್ಸ್ ಆಫೀಸ್ ಧಮಾಕ…
ವಿ. ಮನೋಹರ್ ಅವರ ಸಾಹಿತ್ಯ ಮತ್ತು ರಾಗ ಸಂಯೋಜನೆ ಪ್ರತಿಯೊಬ್ಬರ ಹೃದಯ ತಟ್ಟಿತು. ಸಾಧು ಕೋಕಿಲ ಅವರ ಹಿನ್ನೆಲೆ ಸಂಗೀತ ಚಿತ್ರದ ನೈಜತೆಗೆ ದೊಡ್ಡ ಶಕ್ತಿ ನೀಡಿತು. ಚಿತ್ರದ ಹಾಡುಗಳು ಗಲ್ಲಿ ಗಲ್ಲಿಯಲ್ಲೂ ಭಾರಿ ಸೌಂಡ್ ಮಾಡಿದವು.
ಈ ಸಿನಿಮಾ ಚಿತ್ರಮಂದಿರಗಳಲ್ಲಿ ಸತತ 25 ವಾರಗಳ ಕಾಲ ಪ್ರದರ್ಶನ ಕಂಡು ಬೆಳ್ಳಿ ಮಹೋತ್ಸವ ಆಚರಿಸಿತು. ಬಾಕ್ಸ್ ಆಫೀಸ್ನಲ್ಲಿ ಭಾರಿ ಗಳಿಕೆ ಮಾಡುವ ಮೂಲಕ ಸೂಪರ್ ಹಿಟ್ ಆಯಿತು. ಈ ಚಿತ್ರವು ಕನ್ನಡ ಸಿನಿಮಾ ಮಾರುಕಟ್ಟೆಗೆ ಹೊಸ ನಿರ್ದೇಶಕ ಮತ್ತು ಭರವಸೆಯ ಮಾಸ್ ನಾಯಕನನ್ನು ಕೊಡುಗೆಯಾಗಿ ನೀಡಿತು.
