ತುಮಕೂರು ನಗರದ ಕಾಲ್ ಟೆಕ್ಸ್ ವೃತ್ತದ ಬಳಿ ಇರುವ ಪ್ರಸಿದ್ಧ ಚಿನ್ನದ ಅಂಗಡಿಯೊಂದರಲ್ಲಿ ಯಾವುದೇ ಬಾಗಿಲು ಅಥವಾ ಶಟರ್ ಧ್ವಂಸಗೊಳ್ಳದೆ ಲಕ್ಷಾಂತರ ರೂಪಾಯಿ ಮೌಲ್ಯದ ಆಭರಣಗಳು ಕಣ್ಮರೆಯಾಗಿದ್ದವು. ಶೋ ಕೇಸ್ ಕೌಂಟರ್ನಲ್ಲಿದ್ದ ಹತ್ತು ಉಂಗುರಗಳು ಹಾಗೂ ಮೂರು ಚಿನ್ನದ ಸರಗಳು ಬೆಳಗಾಗುವುದರೊಳಗೆ ಮಾಯವಾಗಿದ್ದು, ಮಾಲೀಕರಲ್ಲಿ ತೀವ್ರ ಆತಂಕ ಮೂಡಿಸಿತ್ತು.
ಹೀಗಾಗಿ ಅಂಗಡಿಯಲ್ಲಿದ್ದ ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿದಾಗ ಅಸಲಿ ಕಳವಿನ ರಹಸ್ಯ ಹೊರಬಿದ್ದಿದ್ದು, ಈ ಕೃತ್ಯ ಎಸಗಿರೋದು ಮನುಷ್ಯರಲ್ಲ ಬದಲಿಗೆ ಇಲಿಯೊಂದು ಈ ಕಳ್ಳತನ ಎಸಗಿದ್ದು ಪತ್ತೆಯಾಗಿದೆ. ಕತ್ತಲಾದ ನಂತರ ಶಾಪ್ ಒಳಗೆ ಪ್ರವೇಶಿಸಿದ ಈ ಇಲಿಯು ಕೌಂಟರ್ನಲ್ಲಿದ್ದ ಸುಮಾರು 50 ಗ್ರಾಂ ತೂಕದ ವಜ್ರ ಖಚಿತ ಚಿನ್ನಾಭರಣಗಳನ್ನು ಒಂದೊಂದಾಗಿ ಬಾಯಿಯಲ್ಲಿ ಕಚ್ಚಿಕೊಂಡು ತನ್ನ ಬಿಲಕ್ಕೆ ಸಾಗಿಸಿತ್ತು. ಈ ದೃಶ್ಯವನ್ನು ಕಂಡು ಬೆರಗಾದ ಸಿಬ್ಬಂದಿ ತಕ್ಷಣವೇ ಅಂಗಡಿಯ ಮೂಲೆಗಳಲ್ಲಿದ್ದ ಇಲಿಯ ಬಿಲವನ್ನು ಅಗೆದು ಪರಿಶೀಲನೆ ನಡೆಸಿದ್ದಾರೆ.
ಅದೃಷ್ಟವಶಾತ್, ಬಿಲದೊಳಗೆ ಬಚ್ಚಿಡಲಾಗಿದ್ದ ಹತ್ತು ಲಕ್ಷ ರೂಪಾಯಿ ಮೌಲ್ಯದ ವಜ್ರಾಭರಣಗಳು ಯಾವುದೇ ಹಾನಿಯಾಗದೆ ಸುರಕ್ಷಿತವಾಗಿ ಮಾಲೀಕರ ಕೈಸೇರಿದವು.ಈ ಅಪರೂಪದ ಘಟನೆ ವಾಣಿಜ್ಯ ಮಳಿಗೆಗಳ ಭದ್ರತಾ ವ್ಯವಸ್ಥೆಯಲ್ಲಿ ಇರುವ ದೊಡ್ಡ ಕೊರತೆಯನ್ನು ಎತ್ತಿ ತೋರಿಸುತ್ತದೆ. ಹೆಚ್ಚಾಗಿ ವ್ಯಾಪಾರಿಗಳು ಸಿಸಿಟಿವಿ ಕ್ಯಾಮೆರಾ, ಸೆಕ್ಯುರಿಟಿ ಗಾರ್ಡ್ ಹಾಗೂ ಲಾಕರ್ಗಳ ಬಗ್ಗೆ ಮಾತ್ರ ಗಮನ ಕೊಡುತ್ತಾರೆ. ಆದರೆ ಹೀಗೆ ಇಲಿಗಳಂತಹ ಸಣ್ಣ ಪ್ರಾಣಿಗಳಿಂದ ಉಂಟಾಗಬಹುದಾದ ಅಪಾಯಗಳನ್ನು ಯಾರೂ ಊಹಿಸಲು ಸಾಧ್ಯವಿಲ್ಲ. ಹೀಗಾಗಿ ಬೆಲೆಬಾಳುವ ಆಭರಣಗಳನ್ನು ಮುಚ್ಚಿದ ಸುರಕ್ಷಿತ ಪೆಟ್ಟಿಗೆಗಳಲ್ಲಿ ಇಡದೇ ಮುಕ್ತವಾಗಿ ಕೌಂಟರ್ಗಳಲ್ಲಿ ಬಿಡುವುದರಿಂದ ಇಂತಹ ಅನಿರೀಕ್ಷಿತ ನಷ್ಟಗಳು ಸಂಭವಿಸಬಹುದು.
ಆದ್ದರಿಂದ ಹೊರಗಿನ ಕಳ್ಳರಷ್ಟೇ ಅಲ್ಲದೇ ಒಳಗಿನ ಕಳ್ಳರ ಮೇಲೂ ನಿಗಾ ವಹಿಸಬೇಕಿದೆ. ಬೆಲೆಬಾಳುವ ಸರಕುಗಳನ್ನು ಹೊಂದಿರುವ ಪ್ರತಿಯೊಂದು ಜ್ಯುವೆಲರಿ ಮಳಿಗೆ ದಿನದ ಅಂತ್ಯದಲ್ಲಿ ಎಲ್ಲಾ ಆಭರಣಗಳನ್ನು ಸಂಪೂರ್ಣವಾಗಿ ಸುರಕ್ಷಿತ ಲಾಕರ್ಗಳಿಗೆ ವರ್ಗಾಯಿಸುವ ಶಿಸ್ತನ್ನು ಬೆಳೆಸಿಕೊಳ್ಳಬೇಕು. ಇಲ್ಲವಾದರೆ, ಎಷ್ಟೇ ಸುಧಾರಿತ ಭದ್ರತಾ ಸಾಧನಗಳಿದ್ದರೂ ಇಂತಹ ಕಿತಾಪತಿ ಕಳ್ಳರು ವ್ಯಾಪಾರಿಗಳಿಗೆ ಭಾರಿ ಆರ್ಥಿಕ ಸಂಕಷ್ಟವನ್ನು ಉಂಟುಮಾಡುವ ಸಾಧ್ಯತೆ ಹೆಚ್ಚಾಗಿರುತ್ತದೆ.
