Photo Credits: @shankarnag_sir_officil_fanpage (Instagram)
ಕರಾಟೆ ಕಿಂಗ್ ಶಂಕರ್ ನಾಗ್ ಅಂದರೆ ಕನ್ನಡಿಗರಿಗೆ ಎಂದಿಗೂ ಮುಗಿಯದ ಕ್ರೇಜ್. ಅವರು ಅಗಲಿ ದಶಕಗಳೇ ಕಳೆದರೂ ಅವರ ಆಲೋಚನೆಗಳು, ಸಿನಿಮಾಗಳು ಮತ್ತು ಆ ವಿಶಿಷ್ಟ ಧ್ವನಿ ಇಂದಿಗೂ ಅಮರ. ೧೯೮೮ರ ಜುಲೈನಲ್ಲಿ ಆಕಾಶವಾಣಿಯಲ್ಲಿ ಶಂಕರ್ ನಾಗ್ ನೀಡಿದ್ದ ಈ ಅಪರೂಪದ ರೇಡಿಯೋ ಸಂದರ್ಶನ, ಇಂದಿನ ತಲೆಮಾರಿಗೂ ಸ್ಫೂರ್ತಿ ನೀಡುವ ಒಂದು ಎವರ್ಗ್ರೀನ್ ಕಥನ.
ಕರಾಟೆ ಕಿಂಗ್ ಶಂಕರ್ ನಾಗ್ ಆಕಾಶವಾಣಿ ಸಂದರ್ಶನ: ಅಂದು ಆಡಿದ ಮಾತುಗಳಿವು…
ರೇಡಿಯೋ ಮುಂದೆ ಶಂಕರ್ ನಾಗ್ ವಿಶಿಷ್ಟ ಎಂಟ್ರಿ…
“ತೂರುರುರೂರು ತೂರುತುರೂರು… ಅರೆರೆರೆರೆ ಕ್ಷಮಿಸಿ, ನಿಮ್ಮ ರೇಡಿಯೋ ಆನ್ ಆಗಿರಬಹುದು ಅಂತ ಯೋಚನೆಯೇ ಬರಲಿಲ್ಲ ನೋಡಿ. ಅದಕ್ಕೆ ನನ್ನ ಪಾಡಿಗೆ ನಾನೇ ಹಾಡ್ತಾ ಇದ್ದೆ. ತಿರುಗ ಕ್ಷಮಿಸಿ, ನಾನು ಪರಿಚಯ ಮಾಡಿಕೊಳ್ಳದೇನೆ ಮಾತಾಡ್ತಾ ಇದ್ದೀನಿ. ಪರಿಚಯದಲ್ಲೇನಿದೆ ಮಹರಾಯ ಅನ್ಬೇಡಿ. ಪರಿಚಯ ಆದರೆ ನಾವು ನೀವು ಹತ್ತಿರ ಆಗ್ತೀವಿ. ನನ್ನ ಹೆಸರು ನಾಗರಕಟ್ಟೆ ಶಂಕರ ಉರುಫ್ ಶಂಕರ್ ನಾಗ್ ಅಂತ, ನಮಸ್ಕಾರ.”
ಬ್ಯಾಂಕ್ ಕ್ಲರ್ಕ್ ಟು ಸಿನಿಮಾ ಸ್ಟಾರ್…
ನಾನು ಸಿನಿಮಾ ನಟನಾಗುತ್ತೇನೆ ಎಂದು ಕನಸಿನಲ್ಲೂ ಅಂದುಕೊಂಡಿರಲಿಲ್ಲ. ಗಿರೀಶ್ ಕಾರ್ನಾಡ್ ಅವರ ‘ಒಂದಾನೊಂದು ಕಾಲದಲ್ಲಿ’ ಚಿತ್ರಕ್ಕೆ ಬರುವ ಮುಂಚೆ ನಾಟಕಗಳಲ್ಲಿ ಕೆಲಸ ಮಾಡ್ತಾ ಇದ್ದೆ. ಜೊತೆಗೆ ಬ್ಯಾಂಕಿನಲ್ಲಿ ಸಾಮಾನ್ಯ ಕ್ಲರ್ಕ್ ಆಗಿ ನೌಕರಿ ಮಾಡ್ತಿದ್ದೆ. ಒಂದು ದಿನ ರಿಹರ್ಸಲ್ ಮಾಡ್ತಿರುವಾಗ ಕಾರ್ನಾಡ್ ಅವರು ಬಂದು, ‘ಸಿನಿಮಾದಲ್ಲಿ ಪಾರ್ಟ್ ಮಾಡ್ತಿಯೇನೋ ಹುಡುಗ?’ ಅಂದರು. ಧೈರ್ಯ ಮಾಡಿ ಒಪ್ಪಿಕೊಂಡೆ. ಸಿನಿಮಾ ಹಿಟ್ ಆಯ್ತು, ಜನರು ನನ್ನ ನಟನೆಯನ್ನು ಇಷ್ಟಪಟ್ಟರು.
ನಟಿ ಮಂಜುಳಾ ನೆನಪು ಹಾಗೂ ಮೊದಲ ಡ್ಯಾನ್ಸ್ ಸಾಹಸ…
‘ಸೀತಾರಾಮು’ ಚಿತ್ರದ ಮೂಲಕ ನನಗೊಂದು ದೊಡ್ಡ ಅವಕಾಶ ಸಿಕ್ಕಿತು. ಮೊದಲ ದಿನವೇ ‘ಒಂದೇ ಒಂದು ಆಸೆಯು’ ಹಾಡಿನ ಶೂಟಿಂಗ್ ಇತ್ತು. ನನಗೆ ಅದಕ್ಕೂ ಮುಂಚೆ ಡ್ಯಾನ್ಸ್ ಅಂದರೆ ಏನೆಂದೇ ಗೊತ್ತಿರಲಿಲ್ಲ. ಕೈ ಕಾಲುಗಳು ಸರಿಯಾಗಿ ಹೊಂದುತ್ತಿರಲಿಲ್ಲ. ಕೊನೆಗೆ ಸುಸ್ತಾಗಿ ಒಂದು ಮೂಲೆಗೆ ಹೋಗಿ ಕೂತುಬಿಟ್ಟೆ.
ಆಗ ನಾಯಕಿ ಮಂಜುಳಾ ಅವರು ಬಂದು ಧೈರ್ಯ ತುಂಬಿದರು. ‘ನನ್ನ ಜೊತೆ ಸ್ಟೆಪ್ ಹಾಕಿ, ಎಲ್ಲಾ ಸರಿಹೋಗುತ್ತೆ’ ಅಂದರು. ಅವರ ಪ್ರೋತ್ಸಾಹವನ್ನು ನಾನೆಂದು ಮರೆಯಲ್ಲ. ಇಂದು ಆ ಒಳ್ಳೆಯ ನಟಿ ನಮ್ಮ ಜೊತೆಗಿಲ್ಲ ಎನ್ನುವುದೇ ದೊಡ್ಡ ದುಃಖ.
‘ಒಂದು ಮುತ್ತಿನ ಕಥೆ’ ಮತ್ತು ಬೆಂಗಳೂರಿನ ಮೊದಲ ಸ್ಟುಡಿಯೋ…
‘ಒಂದು ಮುತ್ತಿನ ಕಥೆ’ ಚಿತ್ರಕ್ಕಾಗಿ ನಾವು ಕೆನಡಾದಿಂದ ಕ್ಯಾಮರಾ ತಂದು, ಲಂಡನ್ನಲ್ಲಿ ಆಕ್ಟೋಪಸ್ ಮಾಡಿಸಿ, ಮಾಲ್ಡೀವ್ಸ್ನಲ್ಲಿ ಅಂಡರ್ ವಾಟರ್ ಶೂಟಿಂಗ್ ಮಾಡಿದ್ದೆವು. ಅದು ಸವಾಲಿನ ಕೆಲಸವಾಗಿತ್ತು.
ಅದಕ್ಕೂ ಮುಂಚೆ ಸಿನಿಮಾ ಹಾಡುಗಳ ರೆಕಾರ್ಡಿಂಗ್ಗೆ ನಾವು ಮದ್ರಾಸ್ ಅಥವಾ ಬಾಂಬೆಗೆ ಹೋಗಬೇಕಿತ್ತು. ಅಲ್ಲಿ ತಿಂಗಟ್ಟಲೆ ಕಾಯಬೇಕಾಗುತ್ತಿತ್ತು. ಕನ್ನಡ ಚಿತ್ರರಂಗದ ಈ ಸ್ಥಿತಿ ನೋಡಿ ಬೇಸರವಾಗುತ್ತಿತ್ತು. ಅದಕ್ಕೆ ಗೆಳೆಯರ ಆರ್ಥಿಕ ಸಹಾಯ ಕೇಳ್ಕೊಂಡು ಬೆಂಗಳೂರಿನಲ್ಲೇ ಮೊದಲ ರೆಕಾರ್ಡಿಂಗ್ ಸ್ಟುಡಿಯೋ ಆರಂಭಿಸಿದೆವು. ಇದನ್ನು ಮುಖ್ಯಮಂತ್ರಿ ರಾಮಕೃಷ್ಣ ಹೆಗಡೆ ಅವರು ಉದ್ಘಾಟಿಸಿದರು.
ಇಳಯರಾಜಾ ಜೀನಿಯಸ್ ಹಾಗೂ ಅಭಿಮಾನಿಗಳಿಗೆ ಕರೆ…
ಸಂಗೀತ ನಿರ್ದೇಶಕ ಇಳಯರಾಜಾ ಅವರು ನಿಜಕ್ಕೂ ಜೀನಿಯಸ್. ಅವರ ಜೊತೆ ಮ್ಯೂಸಿಕ್ ಕಂಪೋಸಿಂಗ್ಗೆ ಕೂತರೆ ಸಮಯ ಹೋಗುವುದೇ ತಿಳಿಯುವುದಿಲ್ಲ. ಚಿಟಿಕೆ ಹೊಡೆಯುವುದರೊಳಗೆ ಎಂಟೊಂಭತ್ತು ಅದ್ಭುತ ಟ್ಯೂನ್ ರೆಡಿ ಮಾಡುತ್ತಾರೆ. ‘ಗೀತಾ’ ಚಿತ್ರದ ‘ಜೊತೆಯಲಿ ಜೊತೆ ಜೊತೆಯಲಿ’ ಹಾಡೇ ಅದಕ್ಕೆ ಸಾಕ್ಷಿ.
ಅಭಿಮಾನಿಗಳೇ, ಸದಾ ಹೀಗೆ ನನ್ನ ಜೊತೆಯಲ್ಲೇ ಇರಿ. ನನ್ನ ಸಿನಿಮಾ ಬಿಡುಗಡೆಯಾದ ಮೇಲೆ ದಯವಿಟ್ಟು ನನಗೆ ಪತ್ರ ಬರೆಯಿರಿ. ಏನಿಷ್ಟ ಆಯ್ತು, ಏನಿಷ್ಟ ಆಗಲಿಲ್ಲ ಅಂತ ಬಿಡಿಸಿ ಬರೆಯಿರಿ. ನನ್ನನ್ನು ತಿದ್ದುಪಡಿಸಿ. ಬೆಂಗಳೂರಿನ ೨೮ ಕ್ರೆಸೆಂಟ್ ರಸ್ತೆಗೆ ಬನ್ನಿ, ನನ್ನ ಬಾಗಿಲು ಸದಾ ತೆರೆದಿರುತ್ತದೆ. ಕಾರ್ಯಕ್ರಮ ಮುಗಿಯುವ ಸಮಯವಾಯಿತು, ನಮಸ್ಕಾರ, ಬರ್ತೀನಿ
ಶಂಕರ್ ನಾಗ್ ಅವರ ಈ ಅಪರೂಪದ ರೇಡಿಯೋ ಮಾತುಗಳು ಕೇವಲ ಸಂದರ್ಶನವಲ್ಲ; ಅದು ಕನ್ನಡ ಚಿತ್ರರಂಗದ ಸುವರ್ಣ ಇತಿಹಾಸ. ಒಬ್ಬ ನಟನಾಗಿ, ತಂತ್ರಜ್ಞನಾಗಿ ಅವರು ಪಟ್ಟ ಶ್ರಮ ಮತ್ತು ಕಂಡ ಕನಸುಗಳು ಈ ಸಂಭಾಷಣೆಯಲ್ಲಿ ಎದ್ದು ಕಾಣುತ್ತವೆ. ಅವರು ದೈಹಿಕವಾಗಿ ನಮ್ಮೊಂದಿಗಿಲ್ಲದಿದ್ದರೂ, ಈ ಧ್ವನಿಯಲ್ಲಿರುವ ಅವರ ಸಿನಿಮಾ ಪ್ರೀತಿ ಮತ್ತು ಕನ್ನಡಿಗರ ಮೇಲಿನ ಅಭಿಮಾನ ಎಂದಿಗೂ ಪ್ರತಿಯೊಬ್ಬರ ಎದೆಯಲ್ಲೂ ಹಸಿರಾಗಿರುತ್ತದೆ. ಶಂಕರ್ ನಾಗ್ ಎಂಬ ಚೇತನಕ್ಕೆ ಕಾಲದ ಮಿತಿಯಿಲ್ಲ, ಅವರ ನೆನಪುಗಳು ಸದಾ ಎವರ್ಗ್ರೀನ್.
